El Cantar de los Cantares 1:1-17
1 Kaychömi qelqaraykan lapanpitapis mas kuyaylapaq kaq cantakuna. Kay cantakunaqa Salomónpami kaykan.
Punta kaq cantakuna
Jipash:*
2 ¡Shumaq mutsarkamankiman itsanqa!Kuyamar mutsamashqaykiqa vïnupitapis masmi mishkin.
3 Perfümikipa ali asyaynin* maypis mushkiräkuypaqmi kaykan.Jutikipis perfüminömi kuyaylapaq kaykan.¡Tsaymi jipashkunapis pasaypa kuyashunki!
4 ¡Cuartuykiman jukla pushakalämay, tayta rey!*Tsaychömi pasaypa kushishqa qoyäshun.Vïnuta upur kushikushqantsipitapis masmi kuyanakur kushikushun.¡Rasuntachari jipashkuna kuyashunki!
5 Jerusalén jipashkuna, noqaqa yanala karpis Cedar runakunapa toldunno kuyaylapaqmi kaykä.*Salomón ruratsishqan cortïnakunano kuyaylapaqmi kaykä.
6 Shanaywan yanayashqa kashqätaqa ama rikapämaytsu.Turïkunami rabyapämashpan üva chakrakunata täpanäpaq churamarqan.Tsaymi kikïpa üva chakräta mana täpashqätsu.*
7 Kuyaylapaq mözu, wilaykalämay.Uyshaykikunata ¿maychötaq mitsikunki?Pulan junaq fiyupa shanaptin ¿may lantumantaq qatinki?Wilamaptikiqa manami amïguykikuna mitsikushqancho qamta ashir pantakashqa purishaqtsu.
Yanasankuna:
8 Lapan jipashkunapitapis mas kuyaylapaq jipash, ashiykashqayki mözu maychöpis kashqanta mana musyashpaykiqa uyshakunapa yupilanpa ayway tarinaykiyaq.Mitsikuqkunapa tsuklankuna kaqman chayaykur cabraykikunata mitsikuy.
Mözu:
9 Mamïta, Faraónpa carrëtanta qarachaq fïna yëwanömi kuyaylapaq kaykanki.
10 Zarcïlluykita jatikuptikiqa qaqlaykipis kuyaylapaqmi kaykan.Perlasyuq walqaykita walqakuptikiqa kunkaykipis kuyaylapaqmi kaykan.
11 Qellaywan adornashqa qori zarcïllutami rurapäshayki.
Jipash:
12 Perfümïpa ali asyayninqa chayan kuyashqä rey jamaraykashqanyaqmi.
13 Taksha bolsawan tsararashqä mïrra perfümi pëchulächo kashqannömi kuyaynï pëchulächo warayta punun.
14 En-gadi parti üva chakracho kaykaq kuyaylapaq alheña waytanömi kuyaynïqa kaykan.
Mözu:
15 Pasaypa kuyaylapaqmi kaykanki, mamïta.Maypis kuyaykuylapaqmi kaykanki.Nawikipis ishkay palumano kuyaylapaqmi kaykan.
Jipash:
16 Papïtu, pasaypa kuyaylapaqmi kaykanki.Kamaraqla karmi munapaypaq kaykanki.
Mözu:Verdiraykaq qewami cämantsipis kaykan.
17 Cedru yörami wayintsipis.Ciprés yörami lantuntsipis.
Jipash:
Ichic wilacuycuna
^ 1.1 1Rey. 4.32; Cant. 3.9-11.
^ 1.3 Wakin runakunaqa mushkuynin nipäkun.
^ 1.4 Tsay witsanmi warmi runanta kuyar tayta rey niq.
^ 1.5 Cedar runakunapa toldunkunaqa yanami karqan.
^ 1.6 Kikïpa üva chakräta mana täpashqätsu ninanqa cuerpüta cuidashqätsu ninanmi.