El Cantar de los Cantares 2:1-17
2 Saróncho rösa waytami noqaqa kaykä.Pampacho winaq liriu waytami kaykä.
Mözu:
2 Mamïta, kashakuna chawpincho kaykaq liriu waytami kaykanki.Qamqa lapan jipashkunapitapis mas kuyaylapaqmi kaykanki.
Jipash:
3 Munti rurincho manzäna wayuraykaqnömi qamqa lapan mözupitapis mas kuyaylapaq kaykanki, papïtu.Nawpaykiman jamaykurqa manami yarquytapis munätsu.Mishkinömi kuyakuynikipis kaykan.
4 Ali alita mikukunayki wayikimanmi pushamashqanki.*Tsaychömi kuyamashpayki makalarämashqanki.
5 Qamta kuyaylawanmi shonqüpis shonqu niraqnatsu.Päsasnikita y manzänaykita jukla qaramay.*
6 Itsuq kaq rikraykita jawnapämay.Alawqa kaq rikraykiwan makalarkamay.
Mözu:
7 Jerusalén jipashkuna, luychukunapa jutincho y tarushkunapa jutincho promitiykalämay kuyaynï punukuqta mana rikchatsinaykipaq.Punuyta yamashqanyaq* punukutsun.
Ishkay kaq cantakuna
Jipash:
8 ¡Kuyashqä mözu rimamushqanta mayaykänami!¡Payqa aywaykämunnami!¡Puntakunapa y jirkakunapa pañaykacharraqmi aywaykämun!
9 Kuyashqä mözuqa luychunöraqmi kaykan.Payqa kuyaylapaq tarushnöraqmi kaykan.¡Wayï waqtanchönami kaykan!¡Ventänapanami watqaraykämun!¡Rejïllanpanami rikapaykäman!
Mözu:
10 Mamïta, jukla sharkuy.Kuyashqä warmi, jukla aywakushun.
11 Tamya tiempupis pasashqanami.Usya tiempuchönami kaykantsi.
12 Intëru jirkachömi waytakunapis pashtaraykan.Cantanantsi tiempupis chayamushqanami.Kulkushkuna cantashqanpis maytsaychömi mayakaykan.
13 Hïgus yörakunapis wayuraykanmi.Üva yörakunapapis ali asyaynin* mayakaykämunmi.Jukla shamuy aywakunantsipaq, mamïta.
14 Kuyashqä paluma, qaqakunacho y chunyaq jirkakunacho amana pakakuynatsu.Parlashqaykitami mayayta munä; qaqlaykitami rikayta munä.Qam rimashqaykiqa maypis mayakuylapaqmi kaykan.Qaqlaykipis kuyaylapaqmi kaykan.
Mözuwan Jipash:
15 Üva yörantsikunaqa tuktuykanmi.Tsaykunataqa cuidädu atuq malwakuna ushanman.*¡Tsay atuqkunata wanutsishun!
Jipash:
16 Kuyaynïqa noqalapaqmi kaykan.Noqapis paylapaqmi kaykä.Payqa liriu waytakuna kaqchömi mitsikun.* *
17 Papïtu, manaraq patsa waraptin y lantuypis manaraq pasaptin luychunöraq y tarushnöraq Beter puntakunaman* kutikalämuy.
Jipash:
Ichic wilacuycuna
^ 2.4 Ali alita mikukunayki wayikimanmi pushamashqanki ninanqa kuyanakunantsipaq pushamashqanki ninanmi.
^ 2.5 Päsasnikita y manzänaykita jukla qaramay ninanqa jukla kuyamay ninanmi.
^ 2.7 Wakin runakunaqa ajashqanyaq nipäkun.
^ 2.13 Wakin runakunaqa mushkuynin nipäkun.
^ 2.15 Üva yörantsikunaqa tuktuykanmi ninanqa kuyanakushqantsi kushikuypaqmi kaykan ninanmi. Cuidädu atuq malwakuna ushanman ninanqa cuidakushun kuyanakushqantsita imapis mana malogrananpaq ninanmi.
^ 2.16 Liriu waytakunaqa kikin jipashmi. Mitsikun ninanqa noqata kuyaman ninanmi.
^ 2.17 Hebreo idiömacho Beter ninanqa ishkayman rakishqa ninanmi. Beter puntakunapaq parlarqa kikinpa chuchunpaq o cuerpunpaqmi jipash parlaykan.