El Cantar de los Cantares 4:1-16
4 Pasaypa kuyaylapaqmi kaykanki, mamïta.Maypis kuyakuylapaqmi kaykanki.Nawikipis vëluyki rurincho ishkay palumanömi kuyaylapaq kaykan.Aqtsaykipis atska cabra malwakuna Galaad jirkakunapa pañar puriqnömi kaykan.
2 Kiruykikunapis majädacho tsayraq armatsishqa y rutushqa yoraq uyshakunanömi kaykan.Parninpa parninpa kuyaylapaqmi kaykan.Manami juklaylapis pishintsu.*
3 Shimikipis kuyaylapaq puka hïlunömi kaykan.Rimashqaykiqa maypis mayakuylapaqmi kaykan.Vëluyki rurincho qaqlaykipis granädanömi kuyaylapaq ishkan lädu pukaraykan.
4 Kunkaykipis David ruratsishqan törrinömi kuyaylapaq kaykan.Kunkaykicho walqaykipis tsay törricho warkaraykaq waranqa (1,000) escüdunömi kaykan.Ali chölu soldädukunapa escüdun kuyaylapaq kashqannömi walqaykipis kuyaylapaq kaykan.
5 Chuchuykipis milïshu luychu malwakuna liriu waytakunapa chawpincho mikuykaqnömi kuyaylapaq kaykan.*
6 Noqaqa manaraq patsa waraptin y lantuypis manaraq pasaptinmi mïrra perfümi kashqan jirkaman y inciensu kashqan jirkanman* aywashaq.
7 ¡Qamqa kuyaylapaqmi kanki, mamïta!¡Chaki puntaykipita uma pukshuykiyaq kamaraqlami kaykanki!
8 Kuyakuylä, Líbanupita nawpäman aywaykalämuy.*Líbano puntakunacho kashqaykipita shakalämuy.Amaná nishqan puntapita shamuykulay.Senir nishqan Hermón jankapita shakalämuy.Leonkuna tänan machaypita y tigrikuna tänan puntapita aywaykalämuy.
9 Qampaqmi shonqüpis shonqu nirantsu, mamïta.Rikäramaptiki shonqüpis pasaypami kurun kurunyan.Walqaykipa hïlunwanmi shonqüta suwashqanki.
10 Kuyamashqaykiqa shonqüyaqraqmi chayaykun.Kuyamashqaykiqa vïnupitapis mas alimi kaykan.Perfümita winakushqaykipis lapan perfümikunapita mas alimi kaykan.
11 Shimikipis abëjapa mishkinnömi mishkiykun.Mutsamaptiki abëjapa mishkinwan lëchi mishkiqnömi mishkiykun.Röpaykipis Líbanucho kaykaq muntipa ali asyayninnömi munapaypaq kaykan.
12 Qam kaykanki tumariq qenchashqa huertami, mamïta.Qam kaykanki tsapashqa yaku pözumi.
13 Cuerpuykiqa granäda frütayuq huertami kaykan.Tsay huertachömi kaykan tukuy casta mishkiq frütakuna,alheña waytakunay nardo waytakuna.
14 Tsaychömi kaykan nardo y azafrán,ali asyaq cäña y canëla,tukuy casta inciensu jachakuna,mïrra, áloe y wakin ali asyaq jachakunapis.
15 Tsay huertata parqunaykipaq pukyumi kaykanki.Nawin pukyumi kaykanki.Líbanupita urämuq yakumi kaykanki.
Jipash:
16 ¡Witsaypa aywaq wayra, shumaq wayrämuy!¡Uraypa aywaq wayra, shumaq wayrämuy!¡Huertäman wayrämushpayki kuyaylapaq asyayninta kuyaynïman apay!¡Kuyaynïqa huertanman shamutsun!¡Mishkiq frütakunapa wayuyninta tsaycho mikutsun!
Mözu:
Ichic wilacuycuna
^ 4.1-2 Cant. 6.5-6.
^ 4.6 Mïrra perfümi kashqan jirkapaq parlar y inciensu kashqan jirkanpaq parlarqa jipashpa cuerpunpaqmi parlaykan.
^ 4.8 Líbanuqa karu nacionmi karqan. Manami Líbanucho kashqanpitatsu jipash shamunanpaq mözu nirqan, sinöqa paypita juk läducho kashqanpita shamunanpaqmi. Nawpancho mana karqa tsay jipash maycho karpis mözupaqqa karuchönömi karqan.
