El Cantar de los Cantares 5:1-16
5 Huertächönami kaykä, mamïta.Shuntaykä mïrra perfümita y kuyaylapaq asyaq waytakunatami.Panalnincho kaykaq mishkitapis yawaykänami.Lëchita y vïnutapis upuykänami.
Yanasankuna:Amïgukuna, yamashqaykiyaq* mikuy y upuy.
Chusku kaq cantakuna
Jipash:
2 Punurpis mayaq mayaqlami punuykarqä.Tsayno punuykashqächömi kuyamaqnï qayakamuqta mayarqä.
Mözu:¡Kuyaylapaq palumita, punkuykita kichapaykalämay!¡Umäpis shulyapashqami kaykan!¡Tsakay shulya yakumi umäpitapis jutuykan!*
Jipash:
3 Maynami röpätapis loqtikushqä.¿Yapaytsuraq jatiküman?Maynami chakïtapis maylakushqä.¿Yapaytsuraq qanratäman?
4 Kuyashqä mözuqa makinta jatimurqan punku uchkupami.*Makinta jatimuptinmi shonqüpis kurun kurunyarqan.
5 Pasaypa kuyarmi jinan höra sharkurqä punkuta kichapänäpaq.*Makïpita dëdükunapitami mïrra perfümi punkupa trancanmanpis juturqan.*
6 Punkuta kichariptï kuyashqä mözu manami kashqanatsu.Aywakushqa kaptinmi pasaypa lakikurqä.Ashirpis manami tarirqätsu.Qayakuptïpis manami contestamarqantsu.
7 Tsayno ashir puriykaptïmi taripäkamarqan marka täpaq runakuna.Paykunami yawarlana maqarkamar kachaykamashqa.*Tsapakushqä vëlutapis qechupäkamashqa.
8 Jerusalén jipashkuna, qamkunatami ruwakü.Kuyashqä mözuta rikashpayki wilaykulanki paypaq lakikur qeshyaykashqäta.
Yanasankuna:
9 Pïmaypitapis mas kuyaylapaq jipash, ¿imanirtaq tsay mözuta tsayjinanpa kuyaykunki?Tsayno encargakamänaykipaqqa ¿imano kaptintaq tsayjinanpa kuyaykunki?
Jipash:
10 Kuyashqä mözuqa kamaraqlami kaykan.Chunka waranqa (10,000) runakunapa chawpincho karpis payqa reqipalami kaykan.
11 Umanpis qorinömi kuyaylapaq kaykan.Qoshpu aqtsanpis cuervuno* yanami kaykan.
12 Nawinkunapis pasaypa kuyaylapaqmi kaykan.Lëchiwan armakushqa ishkay paluma pözu kuchuncho jamaraykaqnömi nawinkuna kaykan.
13 Qaqlanpis ali asyaq* waytakuna huertacho pashtaraykaqnömi kaykan.Shiminpis liriu waytapita mïrra perfümi jutuykaqnömi kaykan.
14 Makinkunapis jacinto rumikunawan adornashqa qori sortëjanömi kaykan.Cuerpunpis zafiro rumikunawan adornashqa kuyaylapaq *marfilnömi kaykan.
15 Chankankunapis qoripita rurashqa jawiräkunan janancho marmolpita* rurashqa tusha ichiraykaqnömi kaykan.Líbanucho kaykaq mas jatun cedru yöranöraqmi kuyaylapaq kaykan.
16 Rimakuynin maypis mayakuylapaqmi kaykan.Paynöqa manami pipis kantsu.Jerusalén jipashkuna, tsaynömi kuyashqä mözuqa.Tsaynömi kuyaynïqa.
Yanasankuna:
Ichic wilacuycuna
^ 5.1 Wakin runakunapa ajashqaykiyaq nipäkun.
^ 5.2 Punkuykita kichapaykalämay nishqanqa jipashpa cuerpunpaqmi niykan. Shulya yakumi umäpitapis jutuykan nishqanqa mözupa cuerpunpaqnami niykan.
^ 5.4 Tsay nishqanqa ishkay sentïduyuqmi kaykan. Wayi punkupa makinta jatimushqanta nishqannölami jipashman mözu yaykunanpaq kashqantapis niykan.
^ 5.5a Tsay nishqanpis ishkay sentïduyuqmi kaykan. Punkuta kichapänanpaq sharkushqanta nishqannölami mözuwan kakuyta munashqanta niykan.
^ 5.5b Tsay nishqanpis ishkay sentïduyuqmi kaykan. Makincho y punkupa trancancho perfümi kashqanta nishqannölami mözuta munapar jipashpa cuerpun ushmashqana kaykashqantapis niykan.
^ 5.7 Tsay witsan kikilanqa warmi manami tsakaypa puriqtsu. Tsaymi wayrapakuq warmi kashqanta yapar maqapäkurqan tsayno mana purinanpaq.
^ 5.11 Cuervuqa yukishpita mas jatun yana pishqumi kaykan.
^ 5.13 Wakin runakunaqa mushkuq nipäkun.
^ marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
^ 5.15 Marmol nishqan rumitaqa runakuna lushuyätsin kuyaylapaq kananpaqmi. Marmolpitami runakuna rurapäkun pïsukunata, columnakunata, grädakunata y imayka adornokunatapis.
