El Cantar de los Cantares 7:1-13
7 (2) Reypa tsurinnöraq mamïta, sandaliaykita jatikurkuptiki chakikipis kuyaylapaqmi kamaran.Adornu rurayta yachaqkuna rurashqan adornunömi tseqlaykipis kuyaylapaq kaykan.
2 (3) Pupuykipis ali vïnu juntaraykaq cöpanömi kaykan.Pachaykipis liriu waytawan intëru kuchunpa tsapashqa trïgu qoturaykaqnömi kaykan.
3 (4) Chuchuykipis milïshu luychu malwakunanömi kuyaylapaq kaykan.*
4 (5) Kunkaykipis *marfilpita rurashqa törrinömi kuyaylapaq kaykan.Nawikipis Hesbón markacho kaykaq Bat-rabim punku nawpancho ishkay yaku estanquinömi kaykan.Senqaykipis Damascuman rikaraykaq Líbanucho kaykaq törrinömi kuyaylapaq kaykan.
5 (6) Umaykipis Carmelo puntano kuyaylapaqmi kaykan.Aqtsaykipis fïnu hïluno karmi reytapis löcutätsin.
6 (7) Qamqa kanki pasaypa kuyaylapaqmi, mamïta.Mana kachaypa maypis kuyakuylapaqmi kaykanki.
7 (8) Palma yöra ichiraykaqnömi kuyaylapaq jatunkaray kaykanki.Chuchuykipis palma yörapa wayuynin warkuraykaqnömi kaykan.
8 (9) Wayuyninta palanäpaq palma yöramanmi witsayta munä.Tsaychömi tarishaq sartanpa üvano chuchuyki kaykaqta,jämayniki poqushqa manzänano ali asyaykaqta*
9 (10) y shimiki ali kaq vïnuno pasaypa mishkiykaqta.Mutsamaptikimi vïnuta upuptï kirüpa y qallüpa mishkir pasarpuqno kaykan.
Jipash:
10 (11) Noqaqa kuyayniläpaqmi kaykä.Paypis nawpalächo kaytami munaykan.
11 (12) Markapita jukla yarqushun, papïtu.Kuyaylapaq waytakunapa chawpincho warämushun.
12 (13) Patsa wararkuptinnami üva chakrakunapa aywashun.Tsaycho rikamushun üvakuna murkuraykannakush y granädapis tukturaykannakush.Tsaychömi munashqaykita yawatsishayki.
13 (14) Tsaychömi mandrägorapis ali asyaykämun.Tsaychöqa tukuy casta frütakunami kaykan.Reqishqayki y mana reqishqayki frütakunatapis tsaychömi yawatsishayki.*
Jipash:
Ichic wilacuycuna
^ marfil Marfilqa elefantipa waqshunmi kaykan (\xt 1Rey. 10.18; 22.39; Sal. 45.8; Cant. 5.14; 7.4; Amós 3.15; 6.4; Apoc. 18.12).
^ 7.8 Wakin runakunaqa mushkuykaqta nipäkun.
^ 7.13 Frütacunatapis tsaychömi yawatsishayki ninanqa tsaychömi qamwan punushun ninanmi.