El Cantar de los Cantares 8:1-14
8 ¡Alimi kanman mamäpa chuchunta chuchur qeshpiq turï kaptiki!Tsayno kaptikiqa cällicho tinkushpantsi mutsarkuptïpis manami pipis jamurpämanmantsu.
2 Makipita janchakurkurmi mamäpa wayinman pushäman.Tsaychömi kuyakuq kayta yachatsimankiman.Granädapita qaptsishqa yakunwan talurkurmi noqapis alinnin kaq vïnuta qaräman.*
3 Itsuq kaq rikraykita jawnapämay.Alawqa kaq rikraykiwan makalarkamay.
Mözu:
4 Jerusalén jipashkuna, promitiykalämay kuyaynï punukuqta mana rikchatsinaykipaq.Punuyta yamashqanyaq* punukutsun.
Soqta kaq cantakuna
Yanasankuna:*
5 ¡Rikapäkuy!¡Chunyaq jirkapita jipash aywaykämun kuyaynin makalashqa!
Mözu:Manzäna yöra sikincho punukuykaqtami qamta rikchatsishqä.*Tsaychömi mamayki qeshyaq rikakushqa.Tsaychömi mamaykita wachay nanay tsarishqa.
Jipash:
6 Imaypis yarparämänaykipaq shonquykiman churaykalämay.Mana qonqamänaykipaq rikraykiman jutïta qelqaykulay.Kuyanakuytaqa wanuytano manami pipis tsapantsu.Waylunakuypitapis sepultürapitano manami qeshpintsitsu.Kuyanakuyqa Tayta Diospita shamuq nina karmi imaypis mana upintsu.
7 Kuyanakuytaqa manami ni lamarpis ni mayupis upitsiyta kamäpakuntsu.Kuyanakuqkuna kachanakunanpaq rïcu runa lapan riquëzankunata munatsipaptinpis manami chaskipantsu.
Jipashpa turinkuna:
8 Panintsipaqa chuchunpis manami yurinraqtsu.Pipis payta ashiq shamuptinqa ¿imatataq nishun?
9 Panintsi murällano kaptinqa qellaypita palaciuta ruratsiqnöchi adornashwan.Adornuynaq punkuno kaptinqa cedru tablakunawan adornaqnöchi adornashwan.
Jipash:
10 Noqaqa murällanömi kaykä.Chuchükunapis rikachakuna törrikunanömi kaykan.Kuyamaqnïpa nawpanchöqa pasaypami kushikü.
11 Baal-hamónchömi Salomónpa üva chakran karqan.Tsay chakrantami runakunata arriendakuykurqan.Cada wata cosëchata usharkurmi cada ünun waranqa (1,000) qellayta arrindunpita pägapäkuq.
12 Salomón, tsay runakunapita waranqa qellayta chaskiptikipisy chakra rikaqkunata ishkay pachak (200) qellayta pägaptikipisnoqaqa üva chakräta kikïmi rikaykä.*
Mözu:
13 Huertakunacho jamakuq reina, amïgükuna mayaq mayaqlami karkaykan rimashqaykita mayananpaq.Noqapis mayanäpaq imalatapis rimarkalämuy.
Jipash:
14 Luychuno karpis o tarushno karpis ali asyaykaq* jirkakuna jananpa cörrimuy, papïtu.
Ichic wilacuycuna
^ 8.2 Tsay ninanqa noqapis qamwan punuküman ninanmi.
^ 8.4 Wakin runakunaqa ajashqanyaq nipäkun.
^ 8.4 Cant. 2.7; 3.5.
^ 8.5 Manzäna yöra nishqanqa warmiwan runa kuyanakushqantami niykan. Qamta rikchatsishqä ninanqa kuyakuyta noqami yachatsishqä ninanmi.
^ 8.12 Jipashpa üvas chakranqa kikinpa cuerpun kashqantami niykan. Tsaynöpami jipash nirqan juk runa aykata pägayta munaptinpis cuerpunqa kuyashqan mözulapaq kashqanta.
^ 8.14 Wakin runakunaqa mushkuykaq nipäkun.
