Esdras 8:1-36
8 Kay listachömi qelqaraykan Babiloniapita Jerusalénman shamuq cada aylupa mandaqninpa jutinkuna. Paykunami noqawan shapäkamurqan Artajerjes rey kaykänan witsan:
2 Fineespita miraq Gersón;Itamarpita miraq Daniel;Davidpita miraq Hatús
3 (Hatúsqa Secaníaspa tsurinmi karqan);Paruspita miraq Zacarías (paywanmi pachak pitsqa chunka (150) runakuna padrunakurkur shapäkamurqan);
4 Pahat-moabpita miraq Zeraíaspa tsurin Elioenai (paywanmi ishkay pachak (200) runakuna shapäkamurqan);
5 Zatupita miraq Jahazielpa tsurin Secanías (paywanmi kimsa pachak (300) runakuna shapäkamurqan);
6 Adínpita miraq Jonatánpa tsurin Ebed (paywanmi pitsqa chunka (50) runakuna shapäkamurqan);
7 Elampita miraq Atalíaspa tsurin Isaías (paywanmi qanchis chunka (70) runakuna shapäkamurqan);
8 Sefatíaspita miraq Micaelpa tsurin Zebadías (paywanmi pusaq chunka (80) runakuna shapäkamurqan);
9 Joabpita miraq Jehielpa tsurin Abdías (paywanmi ishkay pachak chunka pusaq (218) runakuna shapäkamurqan);
10 Banípita miraq Josifíaspa tsurin Selomit (paywanmi pachak soqta chunka (160) runakuna shapäkamurqan);
11 Bebaipita miraq Bebaipa tsurin Zacarías (paywanmi ishkay chunka pusaq (28) runakuna shapäkamurqan);
12 Azgadpita miraq Hacatánpa tsurin Johanán (paywanmi pachak chunka (110) runakuna shapäkamurqan);
13 Elifelet, Jeiel y Semaías (paykuna karqan Adonicampita miraqkunami. Tsay aylupita paykuna mas mözunami karqan. Paykunawanmi soqta chunka (60) runakuna shapäkamurqan);
14 Utai y Zabud (paykunami Bigvaipita miraqkuna karqan. Paykunawanmi qanchis chunka (70) runakuna shapäkamurqan).
Jerusalénman aywananpaq kamarikärishqan
15 Noqa Esdrasmi lapan tsay runakunata shuntarqä Ahava markapa pasaq mayu kuchunman. Tsaychömi kimsa junaq lapanï qoyarqä. Cürakunata y runakunata listata qayaptïmi *levitakuna ni juklaylapis mana karqantsu.
16 Tsaymi qayatsirqä Eliezerta, Arielta, Semaíasta, Elnatánta, Jaribta, Elnatánta, Natánta, Zacaríasta y Mesulamta. Paykunaqa karqan mayor runakunami. Tsaynöpis qayatsirqä Joiaribta y Elnatánta. Paykunami karqan leykunata yachatsiq runakuna.
17 Lapan tsay runakunatami kacharqä Casifia markacho taq mayor runa Idduwan parlananpaq. Iddo y aylunkunaqa templucho sirviq levitakunami karqan.
Manaraq kacharmi yätsirqä paykunata kayno nir ruwakunanpaq: “Tayta Diosnintsipa templuncho sirvipäkunanpaq levitakunata kachaykalämuy”.
18 Chayaykur yätsishqäno ruwakuptinmi Serebíasta, tsurinkunata y wawqinkunata kachapäkamurqan. Paykunami karqan chunka pusaq runakuna. Serebías imaykatapis yachaq runami kaykan. Payqa Levípa tsurin Mahli aylu runami kaykan. Kuyapäkuq Tayta Diosnintsitami agradëcikü paykunata kachamushqanpita.
19 Tsaynöpis kachamurqan Merari aylu Hasabíasta y Jesaíasta. Paykunami karqan tsurinkunawan y wawqinkunawan ishkay chunka (20) runakuna.
20 Levitakunata templucho yanapananpaqmi ishkay pachak ishkay chunka (220) runakunata kachamurqan. Paykunapa unay aylunkunatami rey David y mandäshiqninkuna templucho sirvinanpaq churapäkurqan. Tsay kachamushqan runakunatami padrunapäkurqä.
21 Tsaypitanami Ahava mayu kuchuncho lapan runakunata kayno nirqä: “Jutsa rurashqantsipita Tayta Diosnintsita perdonta manakur lapanintsi ayunashun. Ayunashpantsi payta manakushun shumaq pushamänantsipaq, tsurintsikunata imapis mana pasananpaq y apashqantsikunata pipis mana qechumänantsipaq.
22 Suwakunapita tsapämänantsipaq soldäduntsikunapis manami kantsu. Reytapis maynami kayno nishqä: ‘Tayta Diosnïta *ashipäkuptï kikinmi tsapäman. Jutsata rurapäkuptïqa rabyarmi castigaman’. Reyta tsayno nishqa karmi penqakü cawallun muntashqa soldädunkunawan yanapamänantsipaq manakuyta”.
23 Israel mayïkunata tsayno wilaparkurmi Tayta Diosnintsi tsapämänanpaq ayunar payta manakärirqä. Tsayno manakäriptïmi nänicho shumaq yanapamarqan.
24 Nirkurnami akrarqä chunka ishkay mandaq cürakunata. Paykuna karqan Serebías, Hasabías y chunka cüra mayinkuna.
25 Paykunatami pësaparqä qellayta, qorita y manëjukunatapis. Tsaykunatami rey, yätsiqninkuna, mandäshiqninkuna y Babiloniacho taq lapan Israel runakunapis Tayta Diosnintsipa templunpaq kamaripämarqan.
26 Pësapaptï karqan ishkay chunka juk waranqa chusku pachak pitsqa chunka (21,450) kïlu qellay y kimsa waranqa kimsa pachak (3,300) kïlu qori. Tsaynöpis karqan qellaypita rurashqa pachak (100) manëjukuna
27 y qoripita rurashqa ishkay chunka (20) tazonkuna. Tsay tazonkuna lasarqan pusaq kïlumi. Tsaynöpis karqan alinnin broncipita rurashqa kuyaylapaq ishkay väsu. Tsay väsukuna chanin cuestarqan qoripita rurashqanöraqmi.
28 Entregarkurnami tsay mandaq cürakunata kayno nirqä: “Sirviqnin cüra kanaykipaqmi TAYTA DIOS qamkunata akrapäkushushqanki. Tsay manëjukunapis TAYTA DIOSPAQ *sagrädumi kaykan. Tsay qellay y qoripis lapan voluntäninwan runakuna churamushqan ofrendami kaykan. Tsayno churamurqan unay ayluntsikuna yärakushqan TAYTA DIOSPAQMI.
29 Mandaq cürakunata, levitakunata y Israel autoridäkunata entreganaykipaq shumaq següru Jerusalényaq apapäkuy. Paykunami pësarkur Jerusalén templucho kaykaq almacén cuartuman churapäkunqa”.
30 Tsayno nir entregaykuptïmi Tayta Diosnintsipa templunman apananpaq pësashqan qellayta, qorita y chanin cuestaqkunatapis cürakuna y levitakuna chaskipäkurqan.
Jerusalénman chayapäkushqan
31 Punta kaq killa chunka ishkay junaqchömi Ahava mayu kuchuncho juntaraykashqäpita Jerusalénman shapäkamurqä. Aywapäkamuptïmi Tayta Diosnintsi tsapämarqan chikimaqnïkunapita y asaltantikunapitapis.
32 Jerusalénman chaykamurmi kimsa junaq jamapäkurqä.
33 Chusku kaq junaqchönami apapäkamushqan qellayta, qorita y chanin cuestaqkunata Tayta Diosnintsipa templuncho pësarkatsir Uríaspa tsurin cüra Meremotta entregarqan. Paywanmi kaykarqan Fineespa tsurin Eleazar, Josuépa tsurin Jozabad y Binúipa tsurin Noadías. Jozabad y Noadíasqa *levitakunami karqan.
34 Tsay junaqlami lapanta pësarkur yupapäkurqan. Nirkurnami aykata chaskishqantapis acta libruman qelqapäkurqan.
35 Tsaypitanami Jerusalénman noqawan shamuqkuna Israel runakunapa jutincho sacrificiuta rupatsinanpaq cürakunaman entregapäkurqä chunka ishkay turitukunata, isqun chunka soqta (96) carnikunata y qanchis chunka qanchis (77) carnishkunata. Tsaynöpis purificatsina sacrificiupaq chunka ishkay chïvukunata entregapäkurqä. Tsaykunatami Tayta Diosta adorar lapanta rupatsipäkurqan.
36 Nirkurnami rey Artajerjes apatsimashqan cartata apatsirqä tsaycho taq autoridäkunaman y gobernadorkunaman. Cartacho rey nishqannölami runakunapaq y Tayta Diospa templunpaq imaykatapis kamaripämarqan.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ sagrädu Liyinki santupita tantiyatsikuyta.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
