Ester 1:1-22
1 Juk reymi karqan Asuero jutiyuq. Paymi India nacionpita qalaykur hasta Etiopía nacionyaq pachak ishkay chunka qanchis (127) provinciakunapa mandaqnin karqan.
2 Rey Asueruqa Susa markapitami lapan tsay provinciakunata mandarqan.
3 Kimsa wata mandaq kaykarmi fiestata rey Asuero rurarqan lapan mandäshiqninkunapaq, Persiacho y Mediacho soldädukunapa capitanninkunapaq y provinciakunapa autoridäninkunapaq.
4 Tsay fiestata soqta killa ruratsirqan pasaypa rïcu y munayniyuq kashqanta runakuna musyananpaq.
5 Fiesta rurayta usharkurnami Susa markacho taq runakunata rey Asuero qayatsirqan palaciunpa patiuncho qanchis junaq fiestata rurar mikupäkunanpaq. Tsaymi rïcupis waktsapis tsayman aywapäkurqan.
6 Palaciupa patiunchömi juk ramädata yoraq y azul fïnu toldukunawan qatarqan. Lïnupita rurashqa granäti cordonkunawanmi tsay toldukuna watararqan qellaypita rurashqa argöllakunaman. Tsay argöllakunami marmolpita* rurashqa columnakunacho laqararqan. Tsaynölami qoripita y qellaypita rurashqa kuyaylapaq bancakunapis tsaycho karqan. Tsay patiupa pïsunmi adornararqan kuyaylapaq läja rumikunawan, pórfido rumikunawan y yoraq y yana marmolkunawan.
7 Rey Asueruqa vïnutapis tsaytsika kaptinmi qoripita rurashqa cöpakunawan jichay jichay sirvitsirqan. Cada cöpami jukniraq jukniraq rurashqa karqan.
8 Vïnuta sirviqkunatami rey Asuero nirqan upuyta mana munaq kaqtaqa pitapis mana obligananpaq, sinöqa upuyta munaq kaqla upunanpaq.
9 Tsay qayatsishqan runakunapa warminkunapaqnami reina Vastipis mikuyta ruratsirqan. Paykunaqa rey Asuerupa palaciun rurinchömi mikupäkurqan.
Reina kaykashqanpita Vastita qarqushqan
10 Fiesta qalaykushqanpita qanchis junaqtami rey Asuero shinkatashqa kar yärakushqan kaq qanchis *eunucu runakunata qayatsirqan. Paykuna karqan Mehumán, Bizta, Harbona, Bigtán, Abagta, Zetar y Carcas.
11 Chayaykuptinmi tsay runakunata kacharqan warmin Vastita corönan jatishqata pushamunanpaq. Común runakunapis y autoridäkunapis Vasti kuyaylapaq kashqanta rikananpaqmi tsayman pushananpaq nirqan.
12 Pushananpaq qanchis eunucu runakunata rey kachaykaptinpis Vastiqa manami aywayta munarqantsu. Aywayta mana munashqanta wilaptinmi rey Asueruqa pasaypa rabyakurqan.
13 Tsay witsanmi imapis kaptin leyta yachaqkuna reyta imaypis yätsiq. Tsaymi paykunata rey qayatsirqan imata rurananpaq kashqantapis tantiyatsipäkunanpaq.
14 Ley yachaq runakunacho rey Asuerupa mas amïgunkuna karqan Carsena, Setar, Admata, Tarsis, Meres, Marsena y Memucán. Tsay runakunaqa intëru Persiacho y Mediacho respitädumi karqan. Paykunami reypa yätsiqninkuna y mandäshiqnin autoridäkuna karqan.
15 Paykunatami rey Asuero tapurqan kayno nir: “Kachashqä eunucu runakunawan qayaykätsiptï Vasti manami cäsumashqatsu. ¿Imano arreglanäpaqtaq ley niykan?”
16 Tsaymi mandäshiqnin autoridäkunapa nawpancho rey Asueruta Memucán kayno nirqan: “Tayta rey, warmiki Vasti manami qamlatatsu manakaqman churashushqanki, sinöqa mana cäsushushpayki maytsaycho mandäshishuqnikikunatapis y mandashqayki provinciakunacho taq runakunatapis manakaqmanmi churashqa.
17 Reina Vasti mana cäsukushqanta musyaykurqa wakin warmikunapis tsaynölami runanta mana cäsukunqatsu. Mana cäsukurmi kayno nipäkunqa: ‘Rey Asuero qayatsiptinpis reina Vasti manashi aywarqantsu’.
18 Persiacho y Mediacho mandäshishuqniki autoridäkunapa warminkunapis reina Vasti tsayno rurashqanta mayaykurqa runanta mananami cäsukärinqatsu. Tsayno rurapäkuptinqa rimanakularmi kawapäkunqapaq.
19 “Tayta rey, tsayno mana kananpaq juk leyta rurashun mandashqayki kaqchöqa lapan cumplipäkunanpaq. Tsay leyta imaypis cumplipäkunanpaq Persiacho y Mediacho kaq wakin leykuna qelqaraykashqan librucho qelqashqa katsun. Tsay ley katsun warmiki Vasti imaypis nawpaykiman mana kutimunanpaq y mas cäsukuq kaq ali warmina paypa trukan reina kananpaq.
20 Tsay leyta maytsaychöpis mandashqayki kaqcho musyatsishun. Tsayta musyarmi warmikuna mantsakur runan rïcu kaptinpis waktsa kaptinpis respitapäkunqa”.
21 Memucán tsayno niptinmi rey Asuero y yanapaqninkunapis kayno nipäkurqan: “Tsay nishqaykiqa alimi kaykan”. Tsaymi tsay nishqannöla lapanta qelqarkur
22 ordinta apatsirqan mandashqan kaqmanqa maytsay provinciakunamanpis. Tsay órden qelqararqan kikinkunapa idiömankunacho y imanöpis qelqashqan estïlunkunachömi. Tsay ordinmi nirqan lapan runakuna warminta munaynincho tsararänanpaq.
Ichic wilacuycuna
^ 1.6 Marmol nishqan rumitaqa runakuna lushukyätsin kuyaylapaq kananpaqmi. Marmolpitami runakuna rurapäkun pïsukunata, columnakunata, grädakunata y imayka adornukunatapis.
^ eunucu Eunucu runakunaqa capashqa runakunami karkaykan. Tsay witsanmi runakunata akraykur reykuna capatsiq warmikunata mana munapänanpaq. Nirkurnami tsay capashqa runakunata churaq reypa warminkunata cuidananpaq karpis o mandäshinanpaq karpis (Est. 2.3, 14; Hech. 8.27).
