Ester 3:1-15
3 Tsaypitanami rey Asuero churarqan Hamedatapa tsurin Amánta mandashqan kaq provinciakunacho lapan mandaqkunapa mandaqnin kananpaq. Amánqa Agag aylu runami karqan.*
2 Tsayno churarkurmi rey Asuero ordenarqan palaciucho aruqkuna qonqurpakuykur y umpuykurraq Amánta winchikärinanpaq. Tsayno mandaykaptinpis Mardoqueuqa manami qonqurpakurqantsu ni umpurqantsu.
3 Tsaymi palaciu punkucho aruqkuna Mardoqueuta tapupäkurqan kayno nir: “¿Imanirtaq rey Asuero ordenashqanta mana cäsukunkitsu?”
4 Waran waran niptinpis Mardoqueo manami Amánta winchikunanpaq qonqurpakurqantsu. Israel runa kashqanta Mardoqueo wilaykuptinmi Amánman aywaykur kayno nir wilapäkurqan: “Mardoqueuqa Israel runa karshi winchikushunaykipaq qonqurpakuntsu”. Tsayno wilapäkurqan Amán imata rurananpaq kashqantapis rikayta munarmi.
5 Mardoqueo mana qonqurpakushqanta y mana umpukushqanta rikaykurnami Amánqa pasaypa rabyakurqan.
6 Israel runa kashqanta musyaykurmi kayno yarpachakurqan: “Kay runalata wanutsinäpa trukanqa lapan Israel aylu kaqtaqa maytsaychöpis rey Asuero mandashqan kaqcho wanutsishaq”.
Israel runakunata wanutsinanpaq ordinta maytsaymanpis apatsishqan
7 Chunka ishkay watana rey Asuero mandaq kaykaptinmi punta kaq killacho* Amánpa nawpancho suertita jitapäkurqan. Tsay suerti jitaypa jutinmi karqan Pur. Punta kaq killapa jutinnami karqan Nisán. Tsayno suertita jitapäkurqan mayqan junaqcho y mayqan killacho Amán yarpashqanno Israel runakunata wanutsipäkunanpaq. Suertita jitaptinmi yarqamurqan chunka ishkay kaq killa y kimsa kaq junaq.* Chunka ishkay kaq killapa jutinmi karqan Adar.
8 Tsaymi Amánqa rey Asuero kaqman aywaykur kayno nirqan: “Tayta rey, mandashqayki provinciakunachömi juk aylu runakuna kaykan wakin runakunawan mana juntakaq. Paykunaqa kikinkunapa leyninkunalata cäsukurmi mandashqaykikunatapis mana cäsukärintsu. Tsay aylu runakunataqa lapanta ushakätsishun.
9 Awniptikiqa tsay aylu runakunata wanutsinanpaq maytsaymanpis ordinta apatsishun. Nishqäta awniptikiqa noqami kamarimushaq kimsa pachak kimsa chunka waranqa (330,000) kïlu qellayta gastukunapaq”.
10 Amán tsayno niptinmi rey Asueruqa sëllakunan sortëjanta jorqurir Israel runakunapa contran Amánta aptaparqan paypa jutincho ordinta sëllananpaq.
11 Nirkurmi kayno nirqan: “Kamarimunaykipaq kaq qellaytaqa kikikipaq churakuy. Tsay aylu runakunataqa yarpashqaykino lapanta ushakätsiy”.
12 Tsaymi punta kaq killa chunka kimsa kaq junaqcho* Asuerupa secretariunkunata Amán qayaykatsir ordinta qelqatsirqan. Rey mandashqan provinciakunacho y markakunacho atska idiömata parlaptinmi tsay ordinta qelqapäkurqan lapan idiömakunacho y runakuna imanöpis qelqashqan estïluncho. Qelqarkatsirmi apatsirqan reyta mandäshiqninkunapaq, lapan provinciakunapa mandaqninkunapaq y rey mandashqan nacionkunapa autoridäninkunapaqpis. Ordincho nishqanta cumplinanpaqmi rey Asuerupa jutinta qelqarkur sortëjawan sëllapäkurqan.
13 Tsay qelqashqan ordintami lapan mandashqan provinciakunaman apatsirqan. Tsay ordinchömi nirqan juk junaqlacho awkintapis, mözutapis, wamratapis y warmitapis lapan Israel runakunata wanutsipäkunanpaq. Tsaynöpis nirqan Israel runakunata wanurkatsir lapan imaykantapis apakärinanpaq. Tsayno wanutsinanpaq jitapashqan junaqmi karqan chunka ishkay kaq killacho kimsa kaq junaq.* Tsay killapa jutinmi karqan Adar.
14 Tsay nishqanta cumplipäkunanpaqmi ordinta maytsaymanpis apatsirqan. Tsaymi rey mandashqan lapan provinciakunacho y markakunacho musyapäkurqan. Tsaynöpami maytsaychöpis runakuna kamarikurqan jitapashqan junaq Israel runakunata wanutsipäkunanpaq.
15 Ordinta apananpaq rey niptinmi kachashqan runakuna jukla aywapäkurqan. Tsaynölami Susa markachöpis tsay ordincho nishqanta lapan runakuna musyaykur pasaypa mantsakarqan. Rey Asueruwan Amánmi itsanqa kushikushpan upyapäkurqan.
Ichic wilacuycuna
^ 3.1 Agagqa amalecita runakunapa unay mandaqnin reymi karqan. Amalecita runakuna Israel runakunapa contran kashqanta musyanaykipaq liyinki Éxo. 17.8-16; Deut. 25.17-19.
^ 3.7a Calendariuntsichöqa tsay killa abril killami karqan.
^ 3.7b Tsay junaqqa juknin watan 7 de marzumi karqan.
^ 3.12 Tsay junaqqa 17 de abrilmi karqan.
^ 3.13 Tsay junaqqa juknin watan 7 de marzumi karqan.
