Ester 4:1-17
4 Tsay ordinta maytsaymanpis apashqanta musyaykurmi Mardoqueuqa pasaypa lakikushpan röpantapis rachirqan. Nirkurna qachqa röpata jatikurkur uchpata umanman winakurkur cällikunapa waqar purirqan.
2 Tsayno waqaraykarmi chayarqan reypa palaciun punkuyaq. Tsay niraq röpan jatishqa pipis palaciuman mana yaykuptinmi ruriyaqqa mana yaykurqantsu.
3 Mardoqueo lakikushqannölami maytsay provinciachöpis rey Asuero apatsishqan ordinta musyaykur Israel runakuna pasaypa lakikärirqan. Tsayno lakikur waqashpanmi qachqa röpan jatishqa uchpa jananman jitakakuykur ayunapäkurqan.
4 Esterpa ashmaynin warmikuna y payta cuidaq *eunucukunami Mardoqueuta rikarqan qachqa röpan jatishqa puriykaqta. Tsayta wilaptinmi reina Ester pasaypa lakikushpan röpata apatsirqan Mardoqueo trukakunanpaq. Tsayno apaykätsiptinpis manami trukakuyta munarqantsu.
5 Tsawraqa Atacta qayaykatsir Ester kacharqan Mardoqueo imanir tsayno puriykashqanta tapumunanpaq. Hatacqa karqan Esterta cuidaq wardiakunapa capitanninmi.
6 Tsaymi reypa palaciu frentin kaq pläzaman Hatac aywarqan Mardoqueuwan parlananpaq.
7 Hatac tapuptinmi Mardoqueo wilarqan Israel runakunata maytsaychöpis ushakätsinanpaq ordinta Amán apatsishqanta. Tsaynöpis wilarqan gastukunapaq ayka qellayta Amán kamarinanpaq nishqanta.
8 Nirkurnami Israel runakunata ushakätsinanpaq kaq ordinta Ester liyinanpaq Hatacta Mardoqueo apatsirqan. Entregaykurmi Hatacta kayno nirqan: “Israel runakunata mana ushakätsinanpaq Esterta niykulay rey Asueruman ruwakuq aywananpaq”.
9 Tsaymi Hatac kutiykur Esterta wilarqan Mardoqueo nishqankunata.
10 Tsayno wilaptinmi Hatacta Ester yapay kacharqan Mardoqueuta kayno ninanpaq:
11 “Rey Asuero mana qayatsiptinqa manami pipis palaciu ruricho kaq patiuman yaykuntsu paywan parlananpaq. Mana qayaykätsiptin yaykuq kaqtaqa warmitapis olqutapis wanutsinmi. Tsaytaqa reypa yanapaqninkuna y provinciacho taq runakunapis musyapäkunmi. Wanunanta mana munar qori väranwan rey toqrishqan kaqtami itsanqa pitapis mana wanutsintsu. Estertaqa juk killanashi mana qayatsishqatsu”.
12 Hatac tsayno wilaptinmi Mardoqueo
13 encargakurqan Esterta kayno wilananpaq: “Qampis Israel aylu kaykarqa ama yarpaytsu reina kashqaykipita japalayki salvakunaykipaq kashqanta.
14 Rey Asueruta mana ruwakuptikiqa Israel runakunata salvananpaq juk lädupitami shamunqa. Noqantsitami itsanqa lapantsita ushakätsimäshun. Capazchari Israel runakunapa favornin ruwakunaykipaqpis reina kayman yaykushqanki”.
15 Tsayno wilaptinmi Esterqa Hatacta yapay kacharqan Mardoqueuta kayno wilananpaq:
16 “Susa markacho taq lapan Israel runakunata shuntay kimsa junaq y kimsa paqas ayunapäkunaykipaq. Tsaynölami noqapis ashmaynïkunawan ayunashaq. Nirkurnami mana aywanäpaq ley niptinpis rey Asueruman aywashaq. Wanutsimaptinqa jina imanäshaqtaq”.
17 Tsaymi Mardoqueuqa Ester nishqannöla lapanta rurarqan.
Ichic wilacuycuna
^ eunucu Eunucu runakunaqa capashqa runakunami karkaykan. Tsay witsanmi runakunata akraykur reykuna capatsiq warmikunata mana munapänanpaq. Nirkurnami tsay capashqa runakunata churaq reypa warminkunata cuidananpaq karpis o mandäshinanpaq karpis (Est. 2.3, 14; Hech. 8.27).
