Ester 5:1-14
5 Tsaypita kimsa junaqtanami Esterqa reina kay röpanta jatikurkur aywarqan rey Asuerupa palaciun ruri kaq patiuman. Tsay patiuqa rey jamarashqan trönun frentinchömi karqan. Chayaykurmi shuyaraykarqan rey qayananta.
2 Ester ichiraykaqta rikaykurmi reyqa kushikushpan qori väranwan pay kaqpa toqrirqan. Tsawraqa yaykurishpan väranpa puntanta jukla Ester yataykurqan.
3 Yataykuptinmi rey Asuero kayno tapurqan: “Ester, ¿imataq kashqa? ¿Imatataq nistaykanki? Manakamaptikiqa hasta pulan mandashqä nacionkunacho mandayta munaptikipis awnishaykimi”.
4 Tsayno niptinmi Ester kayno nirqan: “Tayta rey, mikuy ruratsishqäta mikunantsipaq Amánta pushakurkur aywaykalämuy”.
5 Tsayno niptinmi ashmayninta rey Asuero kayno nirqan: “Ester invitamashqanman aywapäkunäpaq Amánta jukla ashimuy”.
Nirkurnami rey Asuero Amánwan aywapäkurqan Ester yanukatsishqan mikuyta mikupäkunanpaq.
6 Mikurkaykashqanchömi Esterta rey Asuero kayno nirqan: “Manakamashqaykitaqa imatapis kamaripäshaykimi. Hasta pulan mandashqä nacionkunata mandayta munaptikipis awnishaykimi”.
7 Tsawraqa Ester kayno nirqan:
8 “Tayta rey, kuyamarqa manakushqäta awniykalämay. Warapis Amánwan kutiykalämunki yapay kaycho mikupäkunantsipaq. Tsaychönami imata munaykashqätapis manakuläshaykipaq”.
Mardoqueuta wanutsinanpaq Amán kamarikushqan
9 Mikuyta usharkurnami Amán pasaypa kushishqa yarqurqan. Tsay hörami Mardoqueuqa palaciu punkucho jamaraykarqan. Amán pasaykaqta rikarpis manami sharkurqantsu, kuyukurqantsu ni winchikurqantsu. Tsaymi Amánqa fiyupa rabyakurkurqan.
10 Tsayno kaykarpis manami imatapis Mardoqueuta nirqantsu.
Wayinman chayaykurnami Amán qayatsirqan amïgunkunata y warmin Zeresta.
11 Tsaychömi alabakurqan rïcu kashqanpita, wamrankuna atska kashqanpita y lapan mandäshiqninkunapita mas ali respitashqa kananpaq rey churashqanpitapis.
12 Nirkurmi mastapis kayno nirqan: “Noqalatami reina Esterpis rey Asueruwan mikuq aywanäpaq qayatsimashqa. Tsaynöpis waraynin* junaq yapay rey Asueruwan mikuq kutinäpaqmi nimashqa.
13 Tsayno kaptinpis palaciu punkucho Israel runa Mardoqueo jamaraykaqta rikarmi shonqü pasaypa rabyanan”.
14 Tsayno niptinmi warmin Zeres y amïgunkunapis kayno nirqan: “Ishkay chunka ishkay (22) metruno qeruta jawitsiy. Nirkur wara tuta reyta manakunki Mardoqueuta wanurkatsir ayanta tsayman tuyritsinanpaq. Tsayno rurarkurmi itsanqa reina Ester yanukatsishqan mikuyta mikuq kushishqa aywankipaq”.
Paykuna tsayno niptinmi qeruta Amán jawitsirqan.
Ichic wilacuycuna
^ 5.12 Wakin runakunaqa warantin nipäkun.
