Ester 7:1-10
7 Tsawraqa rey Asuero y Amán aywapäkurqan Ester kamarishqan mikuyta mikupäkunanpaq.
2 Tsay junaqpis mikur upur jamaraykashqanchömi yapay rey Asuero reina Esterta kayno nirqan: “Manakamashqaykitaqa imatapis awnishaykimi. Hasta pulan mandashqä nacionkunata mandayta munaptikipis qoykushaykimi”.
3 Tsaymi Ester kayno nirqan: “Tayta rey, kuyamarqa manakushqäta awniykalämay. Noqata y aylükunata wanutsimänanpaq kashqanpita salvaykalämay, tayta. Mastaqa manami imatapis manakütsu.
4 Lapan Israel mayïkunata y noqata wanutsimänanpaqnami kaykan. Ashmay kapäkunäpaq maytsaymanpis rantikamaptinqa manami imatapis parlakümantsu ni umaykita nanätsïmantsu. Wanutsipäkamänanpaq kashqanta musyarmi ruwakulä, tayta”.
5 Tsayno niptinmi rey Asuero kayno nirqan: “¿Pitaq tsayno wanutsishunaykipaq yarpaykan? ¿Maychötaq kaykan tsay runa?”
6 Tsawraqa Ester kayno nirqan: “¡Lapanïta wanutsimänanpaq yarpaq runaqa Amánmi kaykan!”
Tsayta mayaykurmi Amánqa reypa y reinapa nawpancho pasaypa mantsakashqa rikakurqan.
7 Tsawraqa fiyupa rabyakushpan rey Asuero mikuykashqanpita sharkurkur yarqurqan patiu kaqman. Tsayno rabyakurkuptinmi Amánqa pasaypa mantsakushpan Esterta ruwakurqan rey Asuero mana wanutsinanpaq.
8 Patiupita rey Asuero kutiykurnami Amánta tarirqan reina Ester wequraykaptin makalakurkur ruwakuykaqta. Tsaymi fiyupa rabyakushpan kayno nirqan: “¿Warmïtaku burlakuyta munaykanki?”
Rey Asuero tsayno niptinmi wardiakuna jukla Amánta tsarirkur umanta qepirkurqan.
9 Tsawraqa Harbona jutiyuq *eunucu kayno nirqan: “Amánpa wayinchömi aya tuyriränanpaq ishkay chunka ishkay (22) metru qeru listu jawiraykan. Tsay qeruta Amán jawitsishqa favorniki sharkuq Mardoqueupa ayanta tsayman tuyritsinanpaqmi”.
Tsawraqa rey Asuero kayno nirqan: “¡Tsayman kikinpa ayanta tuyripäkuy!”
10 Tsaynöpami Amánpa ayanta Mardoqueupaq jawitsishqan qeruman tuyritsipäkurqan. Tsayno rurarkuptinmi rey Asuerupa rabyaynin pasarqan.
Ichic wilacuycuna
^ eunucu Eunucu runakunaqa capashqa runakunami karkaykan. Tsay witsanmi runakunata akraykur reykuna capatsiq warmikunata mana munapänanpaq. Nirkurnami tsay capashqa runakunata churaq reypa warminkunata cuidananpaq karpis o mandäshinanpaq karpis (Est. 2.3, 14; Hech. 8.27).
