Ester 8:1-17
8 Israel runakunapa contran Amánta wanutsishqan junaqmi rey Asuero Esterta qoykurqan Amánpa wayinkunata, chakrankunata, uywankunata y imaykankunatapis. Mardoqueo prïmun kashqanta Ester wilaptinmi rey Asuero Mardoqueuta qayatsirqan.
2 Chayaykuptinmi jatiparqan Amánpita shuntashqan sëllakunan sortëjata. Tsaynölami Amánpa imaykankunatapis chaskishqanta Esterqa Mardoqueupa makinman churarqan.
3 Nirkurnami Esterqa rey Asuero kaqman yapay aywarqan ruwakunanpaq. Nawpanman qonqurpakuykushpan waqar ruwakurqan Agagpa aylun Amán ordenashqanno Israel runakunata mana wanutsipäkunanpaq.
4 Tsayno ruwakuptinmi rey Asuero qori väranwan pay kaqpa toqrirqan. Tsaymi sharkurkur Ester kayno nirqan:
5 “Ruwakushqäta awnimarqa y rasunpa kuyamar waylumashpaykiqa mandashqayki lapan provinciakunacho Israel runakunata mana wanutsipäkunanpaq Amán apatsishqan ordinta anulaykulay.
6 Órden nishqanno Israel mayïkunata wanutsipäkuptinqa pasaypachari lakikushaqpaq”.
7 Tsaymi Esterta y Mardoqueuta rey Asuero kayno nirqan: “Israel runakunata wanutsipäkunanpaq yarpashqanpita maynami Amánta wanurkatsir ayanta tuyritsishqä. Tsaynöpis Amánpa wayinta y chakrankunata qamtanami qoykushqä.
8 Kananqa yarpashqaykino noqapa jutïcho juk ordinta qelqapäkuy Israel runakunapa favornin kananpaq. Tsay ordinta sëllüwan sëllapäkuy. Sëllüwan sëllaraptinqa manami pipis manakaqman churanqatsu”.
9 Rey Asuero tsayno nirmi secretariunkunata jukla qayatsirqan. Tsay junaq karqan kimsa killacho ishkay chunka kimsa (23) junaqmi.* Kimsa kaq killapa jutinmi karqan Siván. Secretariunkuna chayamuptinmi Mardoqueo tsay ordinta qelqatsirqan Israel runakunapaq, reyta mandäshiqninkunapaq, lapan provinciakunapa mandaqninkunapaq y rey mandashqan nacionkunapa autoridäninkunapaqpis. Tsaynöpami tsay órden karqan rey Asuero mandashqan pachak ishkay chunka qanchis (127) provinciakunacho taq autoridäkunapaq. Tsay provinciakuna karqan India nacionpita qalaykur Etiopía nacionyaqmi. Pïmaypis tantiyananpaqmi ordinta qelqapäkurqan rey mandashqan lapan provinciakunacho taq runakuna parlashqan idiömakunacho y imanöpis qelqashqan estïluncho. Tsaynölami qelqapäkurqan Israel runakuna parlashqan idiömacho y qelqashqan estïluncho.
10 Nirkurnami tsay ordinman rey Asuerupa jutinta qelqarkur sëllunwan sëllarqan. Tsaypitanami kachakuna aparqan reypa alinnin cawallunkunata muntakurkur.
11 Tsay ordinchömi qelqararqan Israel runakuna maytsaychöpis juntakaykur atacaqninkunata wanutsipäkunanpaq y wanurkatsir imaykantapis apakärinanpaq. Atacaq runakuna may markapita y may provinciapita kaptinpis warmintinta y wamrantinta lapanta wanutsipäkunanpaqmi tsay órden karqan.
12 Rey Asuero mandashqan lapan provinciakunacho fëchata jitaparqan chunka ishkay kaq killa chunka kimsa kaq junaqcho* wanutsipäkunanpaq. Tsay killapa jutinmi karqan Adar.
13 Tsaynöpis tsay ordincho qelqararqan maytsay markacho y provinciacho Israel runakuna kamarikuykur atacaq runakunata tsay junaq wanutsinanpaqmi.
14 Rey mandaptinmi ordinta apaqkuna alinnin cawallukunata muntakurkur jukla aywapäkurqan. Tsaynölami Susa markachöpis musyatsirqan tsay ordincho imata niykashqantapis.
15 Mardoqueuqa palaciupita yarqamurqan azulwan yoraq sotänan jatishqa, qori corönan jatishqa y granäti lïnu cäpan jatishqami. Rikaykurmi Susacho taq runakuna lapan shonqunwan kushikärirqan.
16 Israel runakunapis kushikärirqan salvashqana kashqanta musyar. Tsaypitanami pïmaypis Israel runakunata respitapäkurqan.
17 Maytsay provinciakunamanpis y markakunamanpis qelqashqan órden chayaptinmi Israel runakuna maytsaychöpis kushikushpan fiestata rurar mikuyta rurapäkurqan. Wakin runakunaqa wanutsinanta mantsakushpanmi Israel runa kayman yaykapäkurqan.
