Ester 9:1-32
9 Rey Asuero apatsishqan ordinta cumplipäkunanpaq junaqmi Israel runakunata wanutsipäkunanpaq contrankuna kamarikushqa shuyarparqan. Tsayno shuyarpaptinpis manami paykuna yarpashqannötsu karqan, sinöqa Israel runakuna tikrapashpan vincipäkurqan. Tsay junaq karqan chunka ishkay kaq killa chunka kimsa kaq junaqmi. Tsay killapa jutinmi karqan Adar.
2 Contran sharkuqkunata tsay junaq atacananpaqmi rey Asuero mandashqan lapan provinciakunacho Israel runakuna juntakarqan. Tsayta rikaykurmi contrankunaqa pasaypa mantsakushpan atacananpaqpis valornin mana karqannatsu.
3 Rey Asuero mandashqan kaq lapan provinciakunacho Mardoqueo mas munayniyuq kaptinmi maytsaychöpis pay nishqanta rurapäkuq. Tsaymi Mardoqueuta mantsakushpan lapan provinciakunapa mandaqninkuna, reyta mandäshiqkuna y markakunapa autoridäninkunapis Israel runakunapa favornin sharkapäkurqan.
4 Reypa palaciuncho wakinpita mas respitashqa kaptinmi Mardoqueuta mantsakärirqan. Munayniyuq kashqanqa maytsay provinciakunachöpis mayakarqanmi. Tsaymi Mardoqueutaqa waranlan waranlan pïmaypis respitapäkurqan.
5 Jitapashqan junaqnami Israel runakuna contran sharkuqkunata espädawan wanutsipäkurqan.
6 Susa markalacho wanutsipäkurqan pitsqa pachak (500) runakunata.
7 Tsaynöpis wanutsipäkurqan Parsandatata, Dalfónta, Aspatata,
8 Poratata, Adalíata, Aridatata,
9 Parmastata, Arisaita, Aridaita y Vaizatata.
10 Paykunaqa Amánpa chunka tsurinkunami karqan. Wanutsirpis paykunapataqa manami imaykantapis apapäkurqantsu.
11 Susa markacho aykata wanutsishqanta mayaykurmi tsay junaqla rey Asuero
12 reina Esterta kayno nirqan: “Susa markachömi Israel runakuna wanutsipäkushqa pitsqa pachak (500) runakunata y Amánpa chunka tsurinkunatapis. Juk markalacho tsaytsika contran runakunata wanuykätsirqa wakin provinciakunacho ¿aykataraq wanuykatsishqa? Kanan ¿imata mas kaykan manakamänaykipaq? Imata manakamashqaykitapis awnishaykimi”.
13 Tsaymi Ester kayno nirqan: “Tayta rey, alimi kanman kanan junaq Israel runakuna contran sharkuqkunata wanutsishqannöla wara junaqpis kay Susa markacho wanutsipäkuptin. Tsaynöpis ruwakushayki Amánpa chunka tsurinkunapa ayankunata qeruman tuyritsinaykipaq”.
14 Tsawraqa Ester ruwakushqannöla Susa markacho Israel runakuna contrankunata waraynin* junaqpis wanutsinanpaq rey Asuero wilakatsirqan. Tsaynöpis Ester ruwakushqannöla Amánpa chunka tsurinpa ayankunata qeruman tuyritsirqan.
15 Tsaymi Adar killa chunka chusku junaqcho Israel runakuna Susa markacho yapay juntakarqan. Tsay junaqmi kimsa pachak (300) runakunata wanutsipäkurqan. Paykunata wanutsirpis manami imaykantapis apakurqantsu.
16 Rey mandashqan provinciakunachöpis Israel runakuna juntakarqan contrankunapita defiendikunanpaq. Tsaymi tikrapar wanutsipäkurqan qanchis chunka pitsqa waranqa (75,000) runakunata. Tsayno wanutsirpis manami imaykantapis apakurqantsu.
17 Provinciakunacho tsayno rurapäkurqan Adar killa chunka kimsa kaq junaqmi. Chunka chusku kaq junaqnami Israel runakuna kushikushpan mikur upur fiestata rurapäkurqan.
18 Susa markacho taq Israel runakunanami chunka kimsa junaqcho y chunka chusku junaqcho defiendikärirqan. Tsaynöpami paykunaqa chunka pitsqa junaqchöraq kushikushpan mikur upur fiestata rurapäkurqan.
19 Kananyaqmi muralläni taksha markakunacho taq y jalqacho taq Israel runakuna Adar killa chunka chusku junaqcho kushikushpan fiestata rurar jukninpis jukninpis mikuyta yawatsinakärin.
Purim fiestata rurapäkunanpaq Mardoqueo nishqan
20 Tsay pasashqankunatami Mardoqueo lapanta qelqarqan. Nirkurnami rey Asuero mandashqan provinciakunacho taq Israel runakunaman karucho taptinpis cercacho taptinpis cartata apatsirqan.
21 Tsay cartachömi nirqan cada wata Adar killa chunka chusku junaqcho y chunka pitsqa junaqcho* mana qonqaypa fiestata rurapäkunanpaq.
22 Fiestata rurapäkunanpaq tsayno nirqan Israel runakuna contrankunata vincir kushikärishqanta imaypis mana qonqananpaqmi. Tsaynöpis nirqan fiestata rurashpan kushishqala mikur upur jukninpis jukninpis mikuyta yawatsinakunanpaq y waktsakunata yanapananpaqmi.
23 Tsaymi Mardoqueo lapan nishqankunata Israel runakuna mana qonqaypa kananyaqpis rurapäkun.
24 Israel runakunapa contran sharkushpanmi Agagpa aylun Hamedatapa tsurin Amánqa suertita jitarqan Israel runakunata wanutsir ushakätsinanpaq.
25 Rey Asuero kaqman aywaykur Ester ruwakuptinnami juk ordinta qelqarkatsir apatsirqan Amánta wanutsinanpaq. Tsay ordinchömi kayno nirqan: “Amánqa Israel runakunata ushakätsiyta munashqanpita kikin wanutsishqa katsun”.
Tsaynöpami Amánta y tsurinkunata wanurkatsir qeruman tuyritsirqan.
26 Tsaykunata yarparmi Israel runakuna imaypis fiestata rurapäkun. Suerti jitaypa jutin Purim kaptinmi tsay fiestapa jutinta churaparqan Purim jutin kananpaq. Fiyupa nakapäkushqanta yarpar y imano pasashqanta yarparmi Mardoqueo cartata apatsishqannöla
27 tsay fiestata rurapäkun. Tsaynöpis cartacho nishqannömi Israel runakunapita miraqkunapis y Israel runa kayman yaykuqkunapis cada wata mana qonqaypa ishkay junaq tsay fiestata rurapäkun.
28 Tsay cartacho nirqan lapan Israel runakuna may provinciachöpis may markachöpis fiestata cada wata rurapäkunanpaq. Tsaynöpami Israel runakuna imaypis mana qonqapäkuntsu contrankunata tikrapar ushakätsishqanta.
29 Tsaypitanami tsay cartacho nishqanno Abihailpa tsurin reina Esterwan Mardoqueo mas juk cartatapis Purim fiestata rurapäkunanpaq qelqarqan.
30 Nirkurmi tsay cartata apatsirqan rey Asuero mandashqan pachak ishkay chunka qanchis (127) provinciakunaman. Tsay cartacho shakyätsirmi
31 punta kaq cartacho nishqannöla Mardoqueo y reina Ester nirqan Israel runakuna y paykunapita miraqninkunapis tsay nishqan junaqkunacho Purim fiestata rurapäkunanpaq. Tsaynöpis tsay cartacho nipäkurqan Israel runakuna ayünuta rurananpaq.
32 Purim fiestata rurapäkunanpaq Ester apatsishqan cartaqa punta kaq cartacho Mardoqueo nishqannölami karqan. Fiestata rurapäkunanpaq nishqantaqa lapantami libruman qelqapäkurqan.
