Ezequiel 15:1-8
15 TAYTA DIOSMI kayno nimarqan:
2 “Runapa tsurin, ¿üva yöraqa imalapaqpis välintsuraq? ¿Wakin yörakunapita mas alitsuraq üva yöra kaykan?
3 ¿Üva yörapita tablata rurapäkunmantsuraq? ¿Imata warkukunalanpaqpis estäcata rurapäkunmantsuraq?
4 “Üva yöraqa yantalapaqmi ali kaykan. Ishkan puntanpa rupariptinqa shonquntapis rupanmi. Tsayno rupashqana karqa imapaqpis manami alinatsu.
5 Manaraq rupatsiptin imalapaqpis mana ali kaykarqa peorraqchari rupashqana kaykarqa imapaqpis mana alitsu.
6 “Tsaymi TAYTA DIOS kayno nin: ‘Munticho üva yörata ninawan rupatsiqnömi Jerusaléncho taq runakunatapis ushakätsishaq.
7 Noqami paykunapa contran sharkushaq. Tsaymi ninapita qeshpiptinpis juklächöpis ninawan ushakätsishaq. Tsayno contran rikakuptïraqmi TAYTA DIOS kashqäta musyapäkunqa.
8 “ ‘Imaypis cäsukamänanpaq promitimarpis mana cäsukamashqanpitami nacionninta pasaypa ushakätsishaq’. TAYTA DIOSMI tsayno nin”.
