Ezequiel 28:1-26
28 TAYTA DIOSMI kayno nimarqan:
2 “Runapa tsurin, Tiro markapa mandaqnin reyta kayno ninki:“ ‘TAYTA DIOSMI kayno nin:Runala kaykarmi pasaypa orgullösu rikakushpayki kayno niykanki:“Noqapis juk diosmi kaykä.Jamaraykäpis dioskuna jamaränanchömi.Lamar chawpinchömi kaykäpis.*Dios yarpashqannömi yarpäpis”.
“ ‘Tsayno nishpaykipis manami diostsu kaykanki.
3 ¿Danielpitapis mas yachaqtsuraq kaykanki?¿Sasa tantiyaypaq kaqkunatapis lapantatsuraq tantiyanki?
4 Musyaq y yachaq karmi imaykatapis tarir rïcuyashqanki.Babulnikikunamanmi qellayta y qoritapis juntaqpaq winashqanki.
5 Negociu rantikuyta yacharmi rïcuyashqanki.Imaykaykikunapis kaptinmi pasaypa orgullösu rikakushqanki.
6 “ ‘Tsayno kaptikimi noqa TAYTA DIOS kayno nï:Qam niykanki juk diospano yarpayniki kashqantami.
7 Tsayno kashqaykipitami fiyu runakunata atacashunaykipaq kachamushaq.Paykunami lapan shuntashqaykikunata y sharkatsishqaykikunata ushakätsinqa.Ali chölu tukuykaptikimi ushakätsishunkipaq.
8 Elaqpita wanutsishuptikimi lamarcho shenqaypa wanuqkunano qampis kankipaq.
9 Wanutsishuqniki runakunapa nawpanchöpis ¿dios kashqaykitatsuraq ninkipaq?Qamtaqa pïmay runakunatanölami wanutsishunkipaq.
10 Suwa alqutanömi mana cäsukamaq jäpa runakuna wanutsishunkipaq’ ”.TAYTA DIOSMI tsayno nin.
11 Tayta Diosmi kayno nimarqan:
12 “Runapa tsurin, Tiro markapa mandaqnin reypaq wanupakuy cantata cantashpayki kayno ninki:“ ‘TAYTA DIOSMI kayno nin:Pïmaypis rikakushunaykipaqmi ali yachaq y kuyaylapaq karqayki.
13 Tayta Diospa Edén huertanchömi tarqayki.Röpaykipis chipchipyaykaq rumikunawan bordashqami karqan.Tsay kuyaylapaq rumikunami karqan cornalina, topacio, jaspe, crisólito, berilo, ónice, zafiro, carbunclo y esmeralda.Alhäjaykikuna y arëtikikunapis qoripitami karqan.Kamashushqayki junaqpita patsami lapan tsaykuna kamarishqana kaykarqan.
14 “ ‘*Querubinno täpakuq kanaykipaqmi qamta churarqä.*Sagrädu jirkächo karmi chipchipyaykaq rumikuna chawpincho purishqanki.
15 Kamashqä junaqpita patsami alilata rurar kawashqanki.Tsayno kaykarmi jutsa rurayman churakashqanki.
16 Negociuykita ali rantikurmi mala mäñata yachakushqanki.Tsaymi sagrädu jirkäpita qarqushqä.Täpakuq querubinno kaptikipis chipchipyaykaq rumikuna chawpinpitami qamta qarqushqä.
17 “ ‘Kuyaylapaq karmi runa tukushqanki.Pïmaypitapis alabashqa karmi ali chölu tukuykashqaykicho mana väliq rikakushqanki.Kananqa pipis mana cäsushunaykipaqmi kacharishqä.Reykuna asipäshunaykipaqmi qamta manakaqman churashqä.
18 “ ‘Negociuykikunatapis engañaypa rantikurmi pasaypa jutsata rurashqanki.Templuykitapis manakaqmanmi churashqanki.Tsaymi qamta y makikicho kaqkunata manakaqman churashqä.Lapan runakunapis suwa alqutanömi rikaykäshunki.
19 Maytsay markacho lapan reqishuqnikikunapis tsayno kashqaykita rikarmi fiyupa mantsakashqa rikakärishqa.Pasaypa mantsakuypaqmi ushakashqanki.Manami pipis rikashunkipaqnatsu’ ”.
Sidón imano kananpaqpis nishqan
20 TAYTA DIOSMI kayno nimarqan:
21 “Runapa tsurin, Sidón marka* kaq lädupa rikärir
22 kayno ninki:“ ‘TAYTA DIOSMI kayno nin:Sidón marka, contraykimi rikakushqä.Qamta castigaptïmi *santu kashqäta pïmaypis musyapäkunqa.Tsaynöpami TAYTA DIOS kashqäta musyankipaq.
23 “ ‘Tukuy niraq qeshyatami qamman kachamushaq.Contrayki soldädukunami qamcho taykaq runakunata wakcho kaychöpis espädawan wanutsipäkunqa.Intëru cällikikunachöpis yawarmi mashtaranqa.Tsaynöpami TAYTA DIOS kashqäta musyapäkunqa.
24 “ ‘Tsayno castigaptïmi Israel runakunata nawpan nacionkunacho taq runakuna mana nakatsinqanatsu.Israel runakuna manami kashakuna chawpincho kaykaqnönatsu kanqa.Tsaynöpami TAYTA DIOS kashqäta musyapäkunqa.
25 “ ‘TAYTA DIOSMI kayno nin:“ ‘Juk lädu nacionkunacho mashtakashqa kaykaq Israel runakunatami shuntamushaq.Sirvimaqnï Jacobta unay qoykushqä nacionmanmi kutitsimushaq.Kutitsimuptïmi maytsay nacioncho taq runakuna santu kashqäta musyapäkunqa.
26 Wayinkunata rurakur y üvankunata plantakurmi pipis achäquita mana ashipaptin jawkana täkärinqa.Mayqan nación runakunatapis Israel runakunata nakatsiptinqa castigashaqmi.Tsaynöpami TAYTA DIOSNIN kashqäta Israel runakuna musyapäkunqa’ ”.
Ichic wilacuycuna
^ 28.2 Tsayno nirqan Tiro marka islacho kaptinmi.
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ sagrädu Liyinki santupita tantiyatsikuyta.
^ 28.20-26 Joel 3.4-8; Zac. 9.1-2.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
