Ezequiel 35:1-15
35 TAYTA DIOSMI kayno nimarqan:
2 “Runapa tsurin, Seir* jirkapa tikraykur edomita runakunata ima pasananpaq kaqtapis wilakuy.
3 Wilakur kayno ninki:“ ‘TAYTA DIOSMI kayno nin:Edomita runakuna, qamkunapa contraykimi noqa kaykä.Castigarmi markaykikunatapis chunyaraykaq raqälatana kachaykushaq.
4 Chipyaq ushakätsiptïmi markaykikuna chunyaqna rikakunqa.Tsayraqmi TAYTA DIOS kashqäta musyapäkunkipaq.
5 “ ‘Qamkunaqa imaypis Israel runakunapa contranmi kashqanki.Tsaymi juk nación runakuna atacaptinpis yanapanaykipa trukanqa wanutsishqa kananpaq entregashqanki.
6 Paykunata entregashqaykinömi qamkunatapis wanutsishunaykipaq entregashayki.Noqa TAYTA DIOSMI tsayno kananpaq jurä.
7 “ ‘Edom nacionnikita pasaypa chunyaraykaqtami kacharishaqpaq.Nacionnikipita yarquq kaqta y kutimuq kaqtapis wanutsishaqmi.
8 Maytsaychöpis espädawan wanutsipäkushunaykipaqmi kamakätsishaq.Tsaymi jirkakunacho, jirkankunacho, mayukunacho y mayu kuchun pampakunachöpis ayakunalana jitarpanqa.
9 Imayyaqpis chunyaq kananpaqmi kamakätsishaq.Markaykikunatapis chipyaq ushakashqatami kacharishaq.Tsayraqmi TAYTA DIOS kashqäta musyapäkunkipaq.
10 “ ‘Qamkunaqa nipäkushqanki Judá nacionta y Israel nacionta duëñu tukunaykipaq kashqantami.Tsayno nipäkushqanki tsay nacionkunata noqa TAYTA DIOS yanapaykaptïmi.
11 Tsaymi jurashpä kayno nï:Israel runakunata rabyapashqaykiman tupu, chikishqaykiman tupu y contran sharkushqaykiman tupumi noqapis qamkunata ushakätsishaykipaq.Tsaynöpami Israel runakunapis tantiyakärinqa qamkunata castigashqäta.
12 “ ‘Israel runakunata castigaptïmi kushipar kayno nipäkushqanki:“Benëchu Israel nación pasaypa chunyaq rikakushqa.Tsay jananmanmi mas peor noqantsipis usharpatsishun”.Tsayno nishqaykipita kikikikunatami ushakätsishayki.Tsayraqmi musyapäkunkipaq noqa TAYTA DIOS lapan nishqaykita mayashqäta.
13 Qamkunaqa noqapa conträ karmi imaykatapis shimiki tarishqanta rimapäkushqanki.Pasaypa ali chölu tukur tsayno rimapäkushqaykitami mayashqä.
14 “ ‘TAYTA DIOSMI kayno nin:Edom nacionnikita ushakätsiptï maytsay nación runakunami kushikärinqa.
15 Israel nacionta ushakätsiptin kushipashqaykinömi qamkunata ushakätsishuptiki noqapis kushipäshayki.Edom nacionniki chipyaqmi ushakanqa.Tsayraqmi TAYTA DIOS kashqäta musyapäkunki’.
