Ezequiel 43:1-27
43 Nirkurnami pushamaq runa kutitsimarqan inti jeqamunan kaq lädu punkuman.
2 Tsaypitami rikarqä Israel runakunata kuyaq Tayta Diospa chipchipyaynin inti jeqamunan lädupita aywaykämuqta. Cargashqa mayu qaparashqannöraqmi shamushqan mayakämurqan. Chipchipyayninwanmi kay patsapis fiyupa atsikyarqan.*
3 Tsay rikaykashqäqa karqan Jerusalénta ushakätsinanpaq Tayta Dios aywashqanta rikashqänömi. Tsaynöpis karqan Quebar mayu nawpancho nawpata rikashqänömi. Tsaymi pampaman jukla lätakuykurqä.
4 Tsaypitami inti jeqamunan kaq lädu punkupana TAYTA DIOSPA chipchipyayninpis qoshtaypis templuman yaykurqan.
5 Tsayno rikaykaptïmi TAYTA DIOSPA Espïritun joqarkamar ruri kaq patiuman yaykatsimarqan. Tsaychömi rikarqä tsay qoshtay templucho juntaraykaqta.*
Templucho imano kananpaqpis
6 Pushamaq runapa nawpancho kaykarmi mayarqä templu rurinpita
7 kayno nimaqta: “Runapa tsurin, kay wayichöqa jamakunä trönümi kaykan. Chakï ichiräkunan kaycho kaptinmi imayyaqpis Israel runakunawan kay templucho täshaq.* Paykunapis ni mandaqnin reykunapis manami ïdulukunata yapay adorapäkunqanatsu. Tsaynöpis mandaqnin reykuna wanuptin reträtunta ruraykur mananami adorapäkunqanatsu. Tsaynöpami *santu jutïta manakaqman mana churanqanatsu.
8 “Punta kaq templüpita reykunapa palaciunman juk perqami rakirqan. Tsayno cercala kaptinmi palaciuncho ïdulukunata adorashpan santu jutïta manakaqman churapäkurqan. Tsaymi fiyupa rabyar paykunata ushakätsishqä.
9 “Kananqa ïdulukunata amana adorapäkutsunnatsu. Unay reykuna pamparaykashqanman aywaykur tsay reykunatapis amana adorapäkutsunnatsu. Tsaykunata kachariptinqa imayyaqpis paykunawanmi kaykäshaq.
10 “Runapa tsurin, rikashqayki templu imano kashqanta y ima tamäñu kashqantapis Israel runakunata wilanki. Tsayta musyarqa capazchari jutsa rurashqankunapita penqakärinmanpis.
11 Penqakäriptinqa templu y punkunkuna imano kashqantapis rikashqaykita lapanta tantiyatsinki. Tsaynöpis wilanki templucho imano sirvipäkamänanpaq yachatsishqä leykunata. Tsay leykuna nishqannöla shumaq rurapäkunanpaq y cumplipäkunanpaq lapanta qelqay.
12 Jirkan janancho templu kaykashqan pampakuna lapanmi *sagrädu kanqa. Tsayta tantiyarqa templucho imano sirvipäkamänanpaqpis lapan leynïkunatami cumplinqa”.
Templucho altar imano kananpaqpis
13 Kaychömi qelqaraykan *altar* ima tamäñun kashqanpis. Altarpa zanjanmi intëru kuchun tumariq pulan metru hondu karqan. Anchunpis pulan metrumi karqan. Zanjapa kuchunmi karqan juk cuartapita maslan.
14 Altar jamaränan karqan juk metru altumi. Anchunnami karqan pulan metru. Altarpa chawpi kaq partinmi karqan ishkay metru altu. Tsaychömi pulan metru anchu juk gräda karqan.
15 Altarpa janannami ishkay metru altu karqan. Chuskun esquïnankunachömi waqrankuna karqan.
16 Altar jananqa chuskun lädunpa tsay tamäñulami karqan. Soqta metru largun y soqta metru anchun kaptinmi cuadrädu karqan.
17 Altarpa janancho jiruruypami canalëtanpis qanchis metru karqan. Tsay canalëtapa anchunmi karqan pulan metru y hondunami karqan cuarta maslan. Altarman witsaraq grädankunapis inti jeqamunan lädupami karqan.
18 Nirkurmi pushamaq runa kayno nimarqan: “Runapa tsurin, TAYTA DIOSMI kayno nin: ‘Sacrificiuta rupatsipäkunaykipaq y yawarta tsaqtsupänaykipaq altarta rurayta usharkuptin purificapäkunki. Kanan tantiyatsishayki imano purificanaykipaqpis.*
19 Sadocpita miraq Leví aylu cürakuna purificatsina sacrificiuta rupatsipäkunanpaq juk turituta kamaripanki. Tsay cürakunalami altarnïcho sirvipäkaman. Noqa TAYTA DIOSMI tsayno nï.
20 “ ‘Tsay turituta pishtarkur yawarninwan altarpa chuskun waqrankunata, waqranpa ura lädun chuskun esquïnankunata y altarpa wirpancho kaykaq canalëtakunata tumariq tsaqtsupanki. Tsaynöpami tsay altarta purificanki.
21 Nirkur purificatsina sacrificiupaq pishtashqan turitupa aytsanta templupita jorqurir rupatsinanpaq kaq particho rupatsinki.
22 “ ‘Jukaqnin junaqnami sänu chïvuta purificatsina sacrificiupaq rupatsipäkunqa. Tsaypa yawarninwanpis turitupa yawarninwan rurashqaykinöla altarta purificanki.
23 Tsayno purificarkur sänu turituta y sänu carnita
24 nawpäman apamunki.* Tsaykunata pishtarirmi cürakuna kachitsarkur noqa TAYTA DIOSPAQ sacrificiuta rupatsipäkunqa.
25 “ ‘Qanchis junaqyaqmi purificatsina sacrificiupaq juk chïvuta, juk turituta y juk carnita sänuta rupatsipäkunqa.
26 Tsayno sacrificiuta rupatsirmi cürakuna waran waran qanchis junaqyaq altarta purificapäkunqa.
27 “ ‘Tsayno rurarkurnami pusaq junaqpitaqa rupatsina sacrificiupaq y jawka kawakuy sacrificiupaq apapäkamushqantapis cürakuna rupatsiyta qalaykunqa. Tsayno rurapäkuptinmi kushishqa chaskishaq’. TAYTA DIOSMI tsayno nin”.
Ichic wilacuycuna
^ 43.2 Eze. 10.3-4, 18-19; 11.22-23.
^ 43.5 1Rey. 8.10-11.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 43.13-17 Éxo. 27.1-2; 2Crón. 4.1.
^ 43.18-27 Éxo. 29.35-37.
^ 43.24 Nawpäman apamunki nishqanqa altarnïman apamunki ninanmi.
