Ezequiel 44:1-31
44 Tsaypitanami pushamaq runa yapay pushamarqan templupa jatun patiunman yaykuna juk punkuman. Tsay punkuqa karqan inti jeqamunan kaq lädupami. Tsay punkuqa wichqashqami kaykarqan.
2 Tsaychömi TAYTA DIOS kayno nimarqan: “Kay punkuqa imaypis wichqaraykanqami. Israel runakunata kuyaq TAYTA DIOS kar kay punkupa yaykushqa kaptïmi pipis mana yaykunanpaq kichanqatsu. Tsaymi imaypis wichqaräkunqa.
3 Mandaq autoridämi itsanqa kay punkucho kaykaq ruri cuartulaman yaykunqa nawpächo mikunanpaq. Tsay cuartuman yaykunanpaq y tsaypita yarqunanpaq patiuparaqmi tumanqa”.
Templuman pï yaykunanpaq nishqan
4 Tsaypitami norti kaq lädu yaykuna punkupa pasatsimarqan. Nirkurmi templu ruri kaq patiuman pushamashpan templu frentinyaq chayatsimarqan. Tsaypita rikärinäpaqmi TAYTA DIOSPA chipchipyaynin templucho juntaraykarqan. Tsaymi pampaman jukla lätakuykurqä.
5 Tsaychömi TAYTA DIOS kayno nimarqan: “Runapa tsurin, shumaq mayamay. Templücho imano kananpaq kaqtapis nishqäkunata shumaq tantiyakuy. Tsaynöpis templuman pï yaykunanpaq y pï mana yaykunanpaq kaqtapis tantiyakuy.
6 “Mana cäsukuq Israel runakunata kayno ninki: ‘TAYTA DIOSMI kayno nin: Israel runakuna, melanashqäkunata ama rurapäkuynatsu.
7 *Señaläni* mana cäsukamaq jäpa runakunata templüman ama yaykatsipäkuynatsu. Paykunata yaykatsirqa tsaki mikuy ofrendakunata, uywakunapa wiranta y yawarninta *altarnïman churarpis templütami *impüruyaykätsinki. Tsayno rurarqa *pactu rurashqantsita manakaqmanmi churarkaykanki.
8 “ ‘Nishqäno rurapäkunaykipa trukanqa jäpa runakunata templücho sirvimänanpaq churapäkushqanki.
9 Israel markakunacho taykarpis señaläni mana cäsukamaq jäpa runakuna manami templüman yaykunqatsu’. TAYTA DIOSMI tsayno nin.
Levitakuna templucho imata rurananpaqpis nishqan
10 “ ‘Israel runakuna mana cäsukamaypa ïdulukunata adorapäkushqannölami *levitakunapis ïdulukunata adorapäkushqa. Tsaymi levitakunaqa
11 templu punku täpaqlana kanqa y runakuna apamushqan uywakunata rupatsina sacrificiupaq y wakin sacrificiukunapaq pishtaqlana kanqa. Tsaynöpis runakunata templucho yanapananpaqmi listu kaykanqa.
12 Tsayno kanqa ïdulukunata adorar Israel runakunata jutsata ruratsishqanpitami’. TAYTA DIOSMI tsayno nin.
13 “ ‘Levitakunaqa manami cüra kanqanatsu ni nawpäman witimunqanatsu.* *Sagrädu ofrendakunata ni templucho wakin sagrädu kaqkunatapis manami yataylapis yatapäkunqanatsu. Lutanta rurashqanpitami pasaypa penqakärinqa.
14 Paykunataqa churashaq templu täpaqlana y tsaycho ruraypaq kaqkunata ruranalanpaqnami.
Cürakuna imano kananpaq y imata rurananpaqpis nishqan
15 “ ‘Israel runakuna mana cäsumar ïdulukunata adorapäkuptinpis Sadocpita* miraq cürakunami itsanqa nishqäkunata cäsukur templucho sirvipäkamashqa. Tsaymi paykunaqa nawpächo sirvimar wiratapis yawartapis *altarnïman churapäkunqa’. TAYTA DIOSMI tsayno nin.
16 ‘Paykunalami templüman yaykapäkunqa y altarnïcho sirvipäkamanqa. Paykunaqa lapan nishqätami cäsukamanqa.
17 “ ‘Ruri kaq patiupa yaykurmi lïnupita rurashqa sotänata cürakuna jatikärinqa.* Manami milwapita rurashqa röpan jatishqaqa patiuchöpis ni templu rurinchöpis sirvipäkamanqatsu.
18 Umantapis watakärinqa lïnupita rurashqa pañuëluwanmi. Lïnupita rurashqa calzoncïllutami jatikärinqa. Südatsikuq röpataqa manami jatikärinqatsu.
19 Jatun patiuman manaraq yarqur y runakunawan manaraq tinkurmi jatirashqan lïnu röpankunata trukakärinqa. Trukakushqan röpankunata templupa nawpancho kaykaq cuartukunamanmi churapäkunqa.* Tsaynöpami jatun patiucho kaykaq runakunata ima desgraciapis mana pasanqatsu.
20 “ ‘Cürakunaqa aqtsantapis manami qara putuypaqa rututsikärinqatsu* ni aläpa winatsipäkunqatsu. Tsaypa trukanqa kamaraqla kananpaqmi rututsikärinqa.
21 Altar kashqan patiuman yaykunanpaq kaptinqa vïnuta manami upupäkunqatsu.*
22 Viüda warmiwan ni runan kacharishqa warmiwanpis manami casaranqatsu. Tsaypa trukanqa Israel aylu virginlaraq jipashlawan o cürapa viüdalanwanmi casaranqa.*
23 “ ‘Cürakunami qamkunata tantiyatsipäkushunki imapis *sagrädu kashqanta y imapis mana sagrädu kashqanta, imapis püru kashqanta y imapis *impüru kashqanta.*
24 Quejakuptinpis leynïkuna nishqannömi juzgapäkushunkipaq. Fiestakunachöpis imano ruranaykipaq nishqänömi cumplitsipäkushunkipaq. Jamay junaqkunatapis paykunami respitatsipäkunqa.
25 “ ‘Impüru mana rikakunanpaq ayatapis manami yatapäkunqatsu.* Maman, taytan, olqu tsurin, warmi tsurin, wawqin o virginlaraq panin wanuptinmi itsanqa yatapäkunqa.
26 Ayata yatashqanpita armakurirmi qanchis junaqyaq shuyarpanqa purificakunanpaq.
27 Tsaypitaraqmi altar kashqan kaq patiuman kutiykur yapay sirvimänanpaq purificatsina sacrificiuta apapäkamunqa’. TAYTA DIOSMI tsayno nin.
28 “ ‘Cürakunapaqa manami chakranpis kanqatsu. Chakran kananpa trukanqa noqami herencian kashaq. Israelcho particionnin ni chakran mana kaptinpis noqami paykunata ashmashaq.*
29 Apapäkamushqayki tsaki mikuy ofrendakunata, purificatsina sacrificiukunata y consagratsina sacrificiukunatami paykuna mikupäkunqa. Noqapaq apapäkamushqayki lapanpis paykunapaqmi kanqa.
30 Punta wayuqkunapita *primiciata apapäkamushqaykita y lapan ofrendaykikunatapis cürakunami chaskipäkunqa. Tsaynölami tantata masarar puntata hornupita jorqupäkushqaykipis paykunapaq kanqa. Tsayno ruraptikiqa bendicionnïtami qamkunaman churamushaq.*
31 “ ‘Kikilan wanushqata o jirka uywa wanutsishqan aytsata cürakuna manami mikupäkunqatsu. Uywapa kaptinpis pishqupa kaptinpis tsay aytsata manami mikupäkunqatsu.*
Ichic wilacuycuna
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ 44.7 Gén. 17.10; Deut. 10.16; Rom. 2.25-29.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 44.13 Nawpäman witimunqanatsu nishqanqa sacrificiuta rupatsinanpaq altarnïman mana witinqanatsu ninanmi.
^ sagrädu Liyinki santupita tantiyatsikuyta.
^ 44.15 2Sam. 15.24-29; 1Rey. 1.5-8, 32-45; 2.27, 35.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 44.17-18 Éxo. 28.39-43; Lev. 16.4.
^ 44.19 Lev. 16.23.
^ 44.22 Lev. 21.7, 13-14.
^ sagrädu Liyinki santupita tantiyatsikuyta.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 44.23 Lev. 10.10.
^ 44.25 Lev. 21.1-4.
^ 44.28 Núm. 18.20.
^ primicia Primiciaqa kaykan Israel runakuna qechpa kaqkunata y chakrancho punta poquqkunata Tayta Diospaq apashqanmi (Éxo. 23.19; Lev. 2.11-12; Deut. 14.23; 18.3-4; 26.1-11; 2Crón. 31.11-12; Neh. 10.35-37; 12.44; Eze. 44.30; Rom. 8.23; Apoc. 14.4).
^ 44.29-30 Núm. 18.8-19.
^ 44.31 Lev. 7.24; 22.8.
