Ezequiel 6:1-14
6 TAYTA DIOS kaynömi nimarqan:
2 “Runapa tsurin, Israel kaq lädu jirkakunapa rikärir castiganäpaq kaqta wilakunki.
3 Wilakur kayno ninki: ‘Israelcho kaykaq jirkakuna, TAYTA DIOS nishqanta mayapäkuy. Jirkakunata, jirkankunata, pampakunata, raqrakunatami TAYTA DIOS kayno nin: Noqami qamkuna kaqcho fiyupa guërra kananpaq kamakätsishaq. Ïdulukunata runakuna adoranan *altarkunatapis ushakätsishaqmi.
4 Inciensu qoshtatsikunan y uywakunata rupatsinan altarkunatapis juchutsirmi ushakätsishaq. Ïdulukunapa nawpancho runakunata wanutsipäkunanpaqmi kamakätsishaq.
5 Ayankunatapis ïdulukunapa nawpanmanmi qotushaq. Altarkunapa nawpankunapami tulunkunatapis mashtashaq.
6 “ ‘Israel runakuna tashqan lapan markakunami ushakanqa. Ïdulukunata adoranan altarkunapis talamashqanmi kanqa. Ïdulukunapis pasaypa aqulashqami qoturanqa. Inciensu qoshtatsikunan altarkunapis ushakanqami. Runakuna imaykata rurashqanpis chipyaqmi ushakanqa.*
7 Tsaytsika runa qamkuna kaqcho wanuptinmi maytsaychöpis tantiyakärinqa rasunpa TAYTA DIOS kashqäta.
8 “ ‘Tsayno ushakätsirpis wakin runakuna kawaykar quëdananpaqmi kamakätsishaq. Paykunatami maytsay nacionkunamanpis qarqushaq.
9 Prësu apashqan nacionkunacho tashpannami noqata yarpapäkamanqa. Tsaynöpis yarpapäkunqa mana cäsukamaypa ïdulukunata adorar fiyupa rabyatsimashqanta. Ïduluta ruraptin melanashqäta tantiyakurmi pasaypa penqakur lakikärinqa.
10 Tsaynöpami tantiyakärinqa noqa TAYTA DIOS nishqänöla castigashqäta’ ”.
11 TAYTA DIOSMI yapaypis kayno nimarqan: “Makitapis jitarraq jaytakachashpayki qaparar kayno niy: ‘¡Wawalaw! ¡Israel runakuna melanaypaq mana alikunata rurashqanpita fiyupami nakapäkunqa! Jutsankunapitami wakinkuna guërracho wanunqa, wakinkuna yarqaypita wanunqa y wakinkunanami fiyupa qeshyar wanunqa.
12 Karucho taqkunaqa pesti qeshyawanmi wanupäkunqa. Cercacho taqkunami guërracho wanupäkunqa. Kawaykar quëdaqkunanami yarqaypita wanupäkunqa. Tsayno castigaptïraqmi rabyaynï pasanqa.
13 “ ‘Maychöpis ïdulukunata adorar inciensuwan qoshtatsikunan altarkunapa nawpanchömi ayankuna jitarpanqa. Tsay altarkuna kashqanchöqa jirkankunachöpis, jirkakunachöpis y copösu yörakuna sikinkunachöpis jitarpanqami. Tsayno castigaptïraqmi TAYTA DIOS kashqäta tantiyakärinqa.
14 “ ‘Paykunata castigashaq sur kaq lädu chunyaq jirkapita hasta norti kaq lädu Ribla marka kaykashqanyaqmi. Maytsay nacioncho taptinpis tashqan partikunata chipyaqmi ushakätsishaq. Tsayraqmi TAYTA DIOS kashqäta musyapäkunqa’ ”.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 6.3-6 Lev. 26.30-31.
