Ezequiel 8:1-18
8 Judá nacionpita noqakunata prësu apamashqanpita pitsqa wata pitsqa killa y chusku junaqna Babiloniacho taykarmi Judá mayor runakunawan wayïcho jamaraykarqä. Tsaychömi TAYTA DIOSPA podernin elaqpita noqaman chayamurqan.
2 Tsaymi nukirkushqächo rikarqä runa niraq ichiraykaqta. Paymi tseqlanpita uraman karqan nina rataykaqno. Tseqlanpita janamanmi chipchipyaykaq broncino karqan.*
3 Tsay runa niraq aqtsäta aptarkuptinmi Tayta Diospa Espïritun joqarkamar revelacioncho Jerusalénman apamarqan. Nirkurmi chayatsimarqan *altar kashqan kaq patiuman yaykuna punku nawpanman. Tsay punku kaykarqan norti kaq lädupami. Tsaycho juk ïdulu kaykaqta rikarmi TAYTA DIOS pasaypa rabyakurqan.
4 Quebar mayu kuchuncho yuripämaptin rikashqänölami tsaychöpis Israel runakunata kuyaq TAYTA DIOSPA chipchipyayninta rikarqä.*
5 Tsaymi TAYTA DIOS kayno nimarqan: “Runapa tsurin, norti kaq lädupa rikay”.
Nimaptin norti kaq lädupa rikärirmi altarman yaykuna punku nawpancho TAYTA DIOS chikishqan ïduluta rikarqä.
6 Tsaymi kayno nimarqan: “Runapa tsurin, ¿rikankiku Israel runakuna ïduluta adorarkaykashqanta? Tsayno adorapäkushqan melanaypaq kaptinmi *sagrädu templüpita witikuykä. Tsaynöpis kanan rikashqaykipita mas peor melanaypaq rurashqantaraqmi rikankipaq”.
7 Tsaypitami apamarqan altar kashqan kaq patiu yaykunaman. Tsaychömi rikarqä perqacho uchkuta.
8 Tsaymi kayno nimarqan: “Runapa tsurin, tsay uchkuta mas jatunyätsiy”.
Uchkuta jatunyätsirmi punkuta tarirqä.
9 Tsaymi kayno nimarqan: “Tsay punkupa yaykuy. Tsaychömi tarinki pasaypa melanaypaq kaqkunata rurarkaykaqta”.
10 Tsaymi yaykur juk cuartucho rikarqä lapan casta lätaypa puriq uywakunata y wakin *impüru uywakunata intëru perqacho dibujaraykaqta. Tsaynöpis rikarqä Israel runakuna adorashqan tukuy niraq ïdulukuna dibujaraykaqta.
11 Tsaypitami rikarqä qanchis chunka (70) Israel mayor runakuna tsay dibujaraykaqkunata adorarkaykaqta. Tsay mayor runakunawanmi Safánpa tsurin Jaazaníaspis kaykarqan. Cada ünun tsararaykashqan inciensu qoshtatsikunanpitami qoshtaypis yanaraq sharkuykarqan.
12 Tsaychömi Tayta Dios kayno nimarqan: “Runapa tsurin, ¿rikankiku Israel mayor runakuna tsakaycho ïdulukunata pakaylapa adorarkaykaqta? Paykunaqa kaynömi nirkaykan: ‘TAYTA DIOS manami rikamantsinatsu. Payqa kaypita aywakushqanami’ ”.
13 Tsawraqa kayno nimarqan: “Kanan ruraykashqanpita peor melanaypaq kaqkunata rurarkaykaqtami rikankipaq”.
14 Nirkurmi apamarqan altar kashqan kaq patiuman yaykuna juk punkuman. Tsay punkupis karqan norti kaq lädupami. Tsaychömi rikarqä Tamuz diosta waqapar warmikuna jamarpaykaqta.
15 Tsawraqa Tayta Dios kayno nimarqan: “¿Tsayta rikankiku? Tsayta rikaykashqaykipitapis mas peortaraqmi rikankipaq”.
16 Tsaypitanami altar kashqan kaq patiupa pushamashpan Lugar Santuman yaykuna punku kaqpa chayatsimarqan. Tsaychömi rikarqä ishkay chunka pitsqano (25) runakuna TAYTA DIOSPA templunta sikipaykur intita adoraraykaqta. Tsayqa karqan sacrificiuta rupatsikuna altar kaq läduchömi.*
17 Tsaymi Tayta Dios kayno nimarqan: “Runapa tsurin, tsay melanaypaq kaqkunata rurarpis Judá runakuna mana ajayashqanta ¿rikaykankiku? Intëru kay nacioncho mana alikunata rurarmi fiyupa rabyaykätsiman. Intita adorashqanqa büdanöraqmi asyan.
18 Tsayno rurapäkushqanpitami fiyupa rabyashpä mana kuyapaypa paykunata castigashaq. Mayjina qayaraypa ruwakamaptinpis manami perdonashaqtsu”.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 8.16 Deut. 4.19.
