Habacuc 1:1-17
1 Kaychömi qelqaraykan profëta Habacucta Tayta Dios revelashqan.
Habacuc lakikur manakushqan
2 TAYTA DIOS, lapan shonqüwan manakamuptïpis ¡imayraq mayaykamanki!Tsayjina manakaykämuptïpis ¡imayraq fiyu runakunapa makinpita noqakunata salvamanki!*
3 ¡Imayyaqraq mana alikunata rurapäkushqanta rikashaq!Kaychöqa wanutsinakuyla y ushakätsinakuylami kaykan.Maytsaychöpis rimanakuyla y chikinakuylami kaykan.
4 Tsayno kawapäkushpanmi leykunata mana cäsukurkaykantsu.Tsaymi ima ruraytapis mana kamäpakuqkunata makitsakurkaykan.Munashqaykino kawaq runakunatami pasaypa chikirkaykan.Juezkunapis manami leykuna qelqarashqannötsu arreglarkaykan.
Habacuc manakushqanta Tayta Dios contestashqan
5 Tsaymi Tayta Dios kayno nirqan:“Wakin nacionkunata ima pasashqantapis tantiyakur pasaypa mantsakäriy.Pasaypa mantsakuypaq kaqkunata ruranäpaqnami kaykä.Imano ruranäpaq kashqanta wilapäshuptikipis manami criyipäkunkipaqtsu.*
6 Noqami kamakaykätsï Babilonia* fiyu runakuna guërrata rurapäkunanpaq.*Paykunaqa maytsaypapis purirkaykan runakunapa wayinta y chakrankunata qechurmi.
7 Pasaypa mantsakuypaq fiyu runami karkaykan.Juk nacionman chayarpis tsay nacionpa leyninkunata cäsupänanpa trukanqa kikinkunapa leyninkunalatami välitsin.
8 “Paykunapa cawallunkunaqa tigripitapis masmi cörripäkun.Tsakaypa puriq *löbu mantsariypaq kashqanpitapis mas mantsariypaqmi karkaykan.Tsay cawallunkuna muntashqami yupaytapis mana atipaypaq purirkaykan.Chipshaman anka karupita aywashqannömi pelyamanqa karupita aywarkaykan.
9 Tinkushqan kaqtaqa pïmaytapis wanurkaykätsinmi.Mayman chayaptinpis runakuna pasaypami mantsakärin.Prësu tsarishqan runakunaqa lamar kuchuncho aquyshanöraqmi karkaykan.
10 “Nación mandaq reykunatapis y autoridäkunatapis asiparmi manakaqman churapäkun.Markacho runakuna amparakunanpaq murallashqanta rikar asikärinmi.Murälla waqtanman alpata qotuykurmi tsay markakunaman yaykapäkun atacapäkunanpaq.
11 Löcu wayra imatapis ushakätsishqannömi pïmaytapis ushakätsin.Tayta Diosman yärakärinanpa trukanqa kikinkunapa kalpanmanmi yärakärin”.
Tayta Diosta Habacuc yapay manakushqan
12 Tayta Dios tsayno niptinmi Habacuc kayno nirqan:“TAYTA DIOS, imaypitapis kawaq *santu Diosmi kaykanki.Imaypis mana ushakaqmi kaykanki.Tsapämaq qaqami kaykanki.Kikiki yanapaptikimi Babilonia runakuna shamunqa castigapäkamänanpaq.
13 Tsayno kaptinpis qamqa manami rikaytapis munankitsu jutsa ruraq runakunataqa.Jutsasapa runakunataqa imaypis manami chaskinkitsu.Tsayno kaykarqa ¿imanirtaq tsay fiyu runakunata mana ushakätsinkitsu?¿Imanirtaq tsay jutsasapa runakuna jutsaynaq runakunata wanutsiptin upälakunki?*
14 ¿Imanirtaq kachapanki lamarcho pescäduta redwan tsarirkur apakushqanno runakunata apakärinanpaq?¿Imanirtaq kachapanki pipis mana cäsushqa shulaktano wanutsipäkunanpaq?
15 “Anzuëluwan karpis redwan karpis atska pescäduta tsariqnömi maytsay nacionpita runakunata wanutsir pasaypa kushikärin.
16 Mikunanpaq putsuy putsuy kaptin pescädu tsariq runa redninkunata y anzuëlunta adorar sacrificiukunata rupatsishqannömi armankunata adorapäkun y kalpayuq kashqanpita sumätsikärin.
17 ¿Tsaynölatsuraq wanutsipäkunqa? ¿Tsaynölatsuraq nacionkunata mana kuyapaypa ushakätsinqa?”
Ichic wilacuycuna
^ 1.5 Hech. 13.41.
^ 1.6 Hebreo idiömachöqa Caldea ninmi. Caldeaqa Babiloniapa jukaq jutinmi kaykan.
^ 1.6 2Rey. 24.2.
^ löbu Löbuqa jatusaq fiyu alquno munti uywami kaykan.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 1.13 Sal. 5.4-6.
