Hebreos 1:1-14
1 Nawpataqa profëtankunawanmi Tayta Dios yaparir yaparir unay ayluntsikunata tukuynöpa wilaparqan.
2 Kay ultimu tiempuchönami itsanqa Tsurin Jesucristuwanna wilakuyninta wilapämantsi. Paywanmi kay patsatapis jana patsatapis kamarqan. Paytami churarqan lapantapis munaynincho tsararänanpaq.
3 Jesucristumi musyatsimantsi Tayta Dios imano kashqantapis. Payta *reqirqa kikin Tayta Diostami reqintsi.* Munayniyuq palabranwanmi lapan kamashqankunatapis mandan munashqanno kananpaq. Jutsa rurashqantsipita purificashqa kanantsipaq wanurkurmi gloriaman kutirqan. Kananqa Tayta Diospa trönun alawqa kaq nawpanchömi jamaraykan.
Angilkunapitapis Jesucristo mas munayniyuq kashqan
4 Tsayno karmi Tayta Diospa Tsurin Jesucristo lapan *angilkunapitapis mas munayniyuq kaykan. Paypa jutinqa angilkunapa jutinpitapis mas respitashqami kaykan.*
5 Tayta Dios manami imaypis angilkunata kayno nirqantsu:“Qamqa tsurïmi kanki.Kanan junaqpitaqa taytaykinami kaykä”.* *
Tsaynölami mastapis Tayta Dios nirqan:“Noqami paypa taytan kashaq.Paynami noqapa tsurï kanqa”.*
6 Tsaynölami japalan Tsurinta kay patsaman kachamushpan Tayta Dios kayno nirqan: “Lapan angilkunapis payta adoratsun”.*
7 Angilkunapaqmi Tayta Dios nirqan:“Angilnïkunata wayratanömi kachä.Sirvimaqnï karmi bunyaypa bunyar rataykaq ninano kaykan”.*
8 Tsurinpaqnami itsanqa kayno nirqan:“Tayta Dios, trönuykichömi imayyaqpis mandaq kaykanki.Qamqa lapantapis alimi mandanki.
9 Pipis alita ruraptinqa kushikunkimi.Mana alita ruraptinqa rabyankimi.Tsaymi Tayta Dios qamta churashushqanki pïmaypitapis mas kushishqa kanaykipaq”.*
10 Tsaynöpis Tsurinpaq kaynömi nirqan:“Tayta Dios, qammi kamashqayki höra kay patsatapis shumaq takyatsishqanki.Jana patsatapis makikiwanmi kamashqanki.
11 Lapan kamashqayki ushakaptinpis qamqa imaypis kaykankimi.Röpa makwayar ushakashqannömi lapanpis ushakanqa.
12 Punchuta luyluqnömi kamashqaykikunatapis luylurinkipaq.Röpata trukatsiqnölami trukaratsinkipaq.Lapan ushakaptinpis qamqa imaypis kashqalanmi kaykanki.Qamqa manami imaypis awkinyankitsu”.*
13 Manami mayqan angilkunatapis Tayta Dios kayno nirqantsu: “Alawqa kaq nawpäman jamakamuy lapan chikishuqnikikunata munaynikiman churanäyaq”.*
14 Tsaymi angilkunaqa Tayta Dios mandaykashqanta ruranalanpaq kaykan. Paykunatami Tayta Dios kachamun salvashqa kaqkunata yanapananpaq.*
Ichic wilacuycuna
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 1.2-3 Juan 1.1-3; Col. 1.15-17.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 1.4 Jutinpaq parlarqa Jesús Diospa Tsurin kashqanpita y salvamaqnintsi kashqanpitami parlaykan.
^ 1.5 Kanan junaqpitaqa taytaykinami kaykä nishqanqa manami puntata Tsurin mana kashqantatsu niykan, sinöqa Jesucristo Tayta Diospa Tsurin kashqanta tsay junaqpita musyatsishqantami niykan. Tsayno musyatsirqan wanushqanpita Jesucristuta kawaritsimurmi (Hech. 13.33).
^ 1.5b 2Sam. 7.14; 1Crón. 17.13.
^ 1.6 Deut. 32.43.
^ 1.7 Sal. 104.4.
^ 1.8-9 Sal. 45.6-7.
^ 1.10-12 Sal. 102.25-27.
^ 1.14 Mat. 4.11; Luc. 1.19.
