Hechos 10:1-48
10 Cesarea markachömi tarqan Cornelio jutiyuq runa. Pay karqan Italiano nishqan batallonpa capitanninmi.
2 Wayincho taqkunawanmi Corneliuqa Tayta Diosta *mantsakur pay munashqanno kawapäkuq. Waktsakunatapis yanaparmi Tayta Diosta imaypis manakuq.
3 Juk junaq malway intino kaykaptinmi revelacioncho rikarqan Tayta Diospa *angilnin chayaykur kayno niqta: “¡Cornelio!”
4 Tsawraqa pasaypa mantsakashqa rikaraykashqancho kayno nirqan: “¿Imataq, tayta?”
Tsayno niptinmi ángel kayno nirqan: “Manakushqaykitami Tayta Dios mayashushqanki. Waktsakunata yanapashqaykitapis rikashushqankimi.
5 Kananqa Simón jutiyuq runata pushamunanpaq Jope markaman kachakuy. Paypa jukaq jutinmi kaykan Pedro.
6 Lamar kuchuncho suëla ruraq Simónpa wayinchömi patsaraykan. [Paymi wilashunki imata ruranaykipaqpis]”.
7 Ángel aywakuptinnami Cornelio qayarqan ishkay ashmayninkunata y Dios munashqanno kawaq juk yanapaqnin soldädutapis.
8 Paykunatami ángel nishqankunata wilaparkur Jope markaman kacharqan.
9 Tsaypita jukaqnin pulan junaqnami Cornelio kachashqan runakuna Jope markaman yaykuykarqan. Tsay hörami Pedrupis patsarashqan wayi jananman witsarqan Tayta Diosta manakuq.*
10 Manakuykaptinmi pasaypa mikanay tsarikuykurqan. Mikuyta yanukapashqanyaqmi Tayta Dios revelaptin
11 jana patsa kicharaykämuqta rikarqan. Rikärishqanchömi jana patsapita chuskun puntanpa watashqa jatunkaray jaku niraq uraykämuqta rikarqan.
12 Tsay jakuchömi kaykarqan tukuy casta uywakuna, lashtaypa puriqkuna y päriqkunapis.
13 Rikaraykaptinmi jana patsapita kayno nimurqan: “Pedro, tsaykunata pishtarkur mikuy”.
14 Tsawraqa Pedro kayno nirqan: “Manami tsaykunata mikümantsu, Tayta. *Impüru uywakunataqa* manami imaypis mikushqätsu”.
15 Tsayno niptinmi yapay kayno nimurqan: “Mikunaykipaq püru kashqanta Tayta Dios niykäshuptikiqa impüru kashqanta ama niytsu”.
16 Tsay revelacionta kimsa kuti Pedro rikarkuptinmi jakuta jana patsapa kutitsikurqan.
17 “¿Imapaqraq rikatsimashqa?” nir yarpachakuykaptinmi Cornelio kachashqan runakuna tapukuraykar Simónpa wayiman chayarqan.
18 Chayaykushpanmi kayno tapukärirqan: “¿Kaychöku Simón Pedro patsaraykan?”
19 Revelacionta rikashqanpita Pedro yarpachakuykaptinmi Espíritu Santu kayno nirqan: “Kimsa runakunami ashirkaykäshunki.
20 Noqami tsay runakunata kachamushqä. Paykunawan mana mantsakuypa ayway”.
21 Tsawraqa wayi jananpita urarpamur tsay runakunata Pedro kayno nirqan: “Tsay ashirkaykashqayki runa noqami kaykä. ¿Imalapaqraq ashirkaykämanki?”
22 Tsawraqa kayno nipäkurqan: “Capitán Corneliumi kachamashqa, tayta. Payqa Tayta Diosta mantsakuq ali runami. Lapan Israel runakunami payta kuyapäkun. Qamta qayatsishunaykipaqshi Tayta Diospa *santu angilnin nishqa. Wayinmanshi aywaykuläshun Tayta Diospa wilakuyninta wilapänaykipaq”.
23 Tsayno niptinmi patsarashqan wayicho paykunata patsatsirqan.
Patsa wararkuptinnami Cornelio kachakushqan runakunawan y Jopicho taq wakin wawqikunawan Pedro aywarqan.
24 Jukaqnin junaqnami Cesarea markaman chayapäkurqan. Corneliumi aylunkunawan y kuyanakushqan runakunawan wayincho shuyarpaykarqan.
25 Chayaykuptinnami Pedrupa nawpanman Cornelio qonqurpakuykur payta adorarqan.
26 Tsawraqa Corneliuta Pedro kayno nirqan: “¡Sharkuy! Noqapis qamno runalami kä”. Tsayno nirmi sharkatsirqan.
27 Tsaypitanami paywan parlaraykar yaykushpan tarirqan atska runakuna juntarpaykaqta.
28 Tsawraqa Pedro kayno nirqan: “Qamkuna musyankimi Israel runa mana Israel runakunawan mana juntakänanpaq kashqanta ni wayinmanpis mana chayananpaq kashqanta. Tsayno kaykaptinpis Tayta Diosmi tantiyatsimashqa pipis impüru mana kashqanta.*
29 Tsaymi qayatsimaptiki jukla shamushqä. Kanan nimay imapaq qayatsimashqaykitapis”.
30 Tsayno niptinmi Cornelio kayno nirqan: “Chusku junaqnami kay hörano [ayunar] Tayta Diosta wayïcho manakuykarqä. Malway hörami chipchipyaykaq röpan jatishqa runa yuripämashqa.
31 Paymi kayno nimashqa: ‘Cornelio, manakushqaykita Tayta Dios mayashqami. Waktsakunata yanapashqaykitapis rikashqami.
32 Kananqa Simón jutiyuq runata pushamunanpaq Jope markaman kachakuy. Paypa jukaq jutinmi kaykan Pedro. Lamar kuchuncho suëla ruraq Simónpa wayinchömi patsaraykan. [Pay chaykamurmi wilapäshunki]’.
33 Tsayno nimaptinmi jukla qamman kachakamurqä. Shamushqaykipita kushikümi, tayta. Wilakuyninta mayayta munarmi Tayta Diospa nawpancho lapanï juntakashqa karkaykä”.
Corneliupa wayincho Pedro wilakushqan
34 Tsawraqa Pedro kayno nirqan: “Kanan rasunpami tantiyä Tayta Dios pitapis manakaqman mana churashqanta.*
35 May nacionpita kaptinpis payta *mantsakur cäsukuq kaqtaqa pïmaytapis kuyapanmi.
36 Tsayno kuyapämashpantsimi Jesucristo kayninpa perdonamantsi paywan ali kawanantsipaq. Jesucristuqa lapanpa Señorninmi kaykan. Tsay ali wilakuytami Israel runakunata Tayta Dios musyatsirqan.
37 “Musyapäkunkimi *bautizakärinanpaq Juan wilakushqanpitaraq Galileacho qalaykur intëru Judeacho ima pasashqantapis.
38 Tsay witsanmi Nazaret markapita kaq Jesús munayniyuq kananpaq Espíritu Santuta payman Tayta Dios kachamurqan. Tayta Dios yanapaptinmi markan markan Jesús purirqan alikunata rurar y diablu qeshyatsishqan runakunata aliyätsir.
39 “Noqakuna rikashqämi Jerusaléncho y intëru Judeacho Jesús rurashqankunata. Cruzcho wanutsiptinpis
40 kimsa junaqtami Tayta Dios kawaritsimushqa. Kawarirkamurmi noqakunata yuripämashqa.
41 Tsaytaqa manami lapan runakunatsu rikashqa, sinöqa nawpapita patsa Tayta Dios akrashqan kaqkunalami. Tsaymi kawarirkamuptin paywan juntu mikupäkushqä y upupäkushqä.
42 Nirkurnami noqakunata kachamashqa wilakuyninta wilakur kayno nipäkunäpaq: ‘Jesústami Tayta Dios churashqa wanushkunatapis kawaykaqkunatapis juzgananpaq’.
43 Paypitami lapan profëtakunapis wilakärirqan. Tsaynöpami musyantsi lapanpis payman yärakuq kaqtaqa jutsankunapita Tayta Dios paypa jutincho perdonashqanta”.
Mana Israel runakuna Espíritu Santuta chaskishqan
44 Pedro tsayno wilapaykaptinmi tsaycho kaykaq runakunaman Espíritu Santu chayarqan.
45 Tsayta rikarmi Pedruwan aywaq Israel runakuna espantashqa rikakur kayno nipäkurqan: “¡Mana Israel runakunatapis Espíritu Santutami Tayta Dios qarashqa*!”
46 Tsayno nipäkurqan juk idiömakunapa parlar Tayta Diosta alabarkaykaqta wiyarmi.
47 Tsawraqa Pedro kayno nirqan: “Paykunapis noqantsino Espíritu Santuta chaskikurkaykaptinqa manami pipis michanmantsu *bautizakärinanta”.
48 Tsayno nirmi Jesucristupa jutincho paykunata bautizarqan. Tsaypitanami Corneliupa wayincho juntaraykaqkuna Pedruta ruwarqan ishkay kimsa junaqlapis qoyäpänanpaq.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 10.9 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 10.14 Lev. 11.1-46.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 10.28 Israel runakuna nipäkurqan mana Israel runakuna impüru kashqantami. Tsawraqa paykunawan mana juntakaqtsu ni wayinmanpis mana chayaqtsu.
^ 10.34 Deut. 10.17.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 10.45 Wakin runakunaqa regalashqa nipäkun.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
