Hechos 16:1-40
16 Tsaypitanami Derbe y Listra markakunaman Pablo y Silas chayapäkurqan. Listra markachömi juk discïpulu tarqan Timoteo jutiyuq. Timoteupa taytan mana Israel runa kaptinpis mamanqa Jesucristuman yärakuq Israel warmimi karqan.
2 Timoteo ali mözu kashqantami Listra y Iconio markakunacho taq wawqi panikuna parlapäkuq.
3 Timoteupa taytan mana Israel runa kaptinmi pïmaypis musyarqan Timoteo *señaläni kashqanta. Tsawraqa Pablo pushayta munar tsay kinraycho taq Israel runakuna mana jamurpänanpaq Timoteuta señalatsirqan.
4 Tsaypita markan markan purirmi wawqi panikunata wilaparqan *apostolkuna y *mayor wawqikuna Jerusaléncho wilanakur nishqanta cumplipäkunanpaq.*
5 Tsaynöpami Jesucristuman shumaq yärakur wawqi panikuna waranlan waranlan atskayarqan.
Macedonia runa qayakamuqta Pablo revelacioncho rikashqan
6 Asia provinciaman wilakuq aywayta munapäkuptinpis Espíritu Santu manami munarqantsu. Tsaynami Galaciapa y Frigiapa pasapäkurqan.
7 Misia partiman chayaykärirnami Bitinia provinciaman aywayta yarpapäkuptinpis Jesúspa Espïritun mana munarqantsu aywapäkunanta.
8 Tsaymi Misia partipa pasar Troas markaman chayapäkurqan.
9 Juk tsakaynami revelacioncho Pablo rikarqan Macedonia provinciapita juk runa kayno nir qayakaykämuqta: “Macedoniaman shamur yanapaykalämay, tayta”.
10 Revelacioncho rikashqanta wilapäkamaptinmi tantiyapäkurqä* tsay markakunachöpis wilakuyninta wilakärinäta Tayta Dios munashqanta. Tsaymi Macedoniaman aywapäkunäpaq jukla kamarikärirqä.
Filipos markacho wilakushqan
11 Troaspita *büquiwan aywarmi Samotracia islaman chayapäkurqä. Jukaqnin junaqnami Neápolis markaman chayapäkurqä.
12 Tsaypitanami Filipos markaman chayapäkurqä. Filipos markaqa Macedonia provinciacho wakin markakunapita mas jatunmi kaykan. Tsaychöqa Roma runakunami tarkaykan. Juk ishkay junaqmi tsaycho qoyapäkurqä.
13 Tayta Diosta manakärinanpaq mayu kuchuncho imaypis juntakashqanta musyarmi jamay junaqcho markapita yarqur tsayman aywapäkurqä. Tsaycho warmikuna juntakashqa kaykaqtami Tayta Diospa wilakuyninta wilapäkurqä.
14 Tsaychömi Tiatira markapita Lidiapis kaykarqan. Payqa granäti tëlakunatami rantikuq. Mana Israel warmi karpis Tayta Diosta cäsukuqmi karqan. Lidiata Tayta Dios tantiyatsiptinmi Pablo wilapashqanta chaskikurqan.
15 Paypis y wayincho taqkunapis *bautizakurirmi ruwakamashpan kayno nipäkamarqan: “Señor Jesucristuman yärakuq mayiki kaykaptïqa wayïcho patsakärinaykipaq shapäkamuy”.
Tsayno niptinmi wayinman aywapäkurqä.
Pabluta y Silasta carcilman wichqashqan
16 Juk kutimi Tayta Diosta manakuq aywarkaykashqächo tinkupäkurqä *supaypa munayninwan suerti rikaq jipashwan. Tsay jipashmi patronninkunata atska qellayta gänatsirqan.
17 Paymi Pabluta y noqakunata qatirämar qayararqan kayno nir: “¡Kay runakunaqa munayniyuq Tayta Diostami sirvipäkun! ¡Paykunami tantiyatsishunki imano salvakärinaykipaq kashqantapis!”
18 Tsayno waran waran qatirämaptinmi Pablo rabyakushpan jipashcho kaykaq supayta kayno nirqan: “¡Jesucristupa jutinchömi qamta qarqü kay jipashpita yarqunaykipaq!”
Tsayno niptinmi jinan höra supay yarqurqan.
19 Tsawraqa jipashpa patronninkuna qellayta manana gänananpaq kashqanta tantiyakur Pablutawan Silasta prësu tsariykur autoridäkuna juzgananpaq pläzaman apapäkurqan.
20 Autoridäkunaman chayaykatsirmi kayno nipäkurqan: “Kay Israel runakunami marka mayintsikunata rabyaykätsin.
21 Israel runakunapa costumbrinkunata rurapäkunanpaqmi markantsicho yacharkaykätsin. Noqantsiqa Roma runa kashpantsi tsay costumbrikunata manami chaskipashwantsu”.
22 Tsayno niptinmi lapan runakuna Pablupa y Silaspa contran sharkapäkurqan. Tsawraqa autoridäkuna nipäkurqan Pabluta y Silasta qarapacharir wirupäkunanpaq.
23 Nirkurmi carcilman wichqarkatsir prësukunata täpaq wardiata nipäkurqan shumaq täpananpaq.
24 Tsayno niptinmi mas ruri kaq calapösuman wichqaykur paykunapa chakinta cëpuman* amutsirqan.
25 Pulan paqasno kaykaptinmi Pablo y Silas Tayta Diosta manakur alabapäkurqan. Tsaytami wakin kaq prësukunapis mayapäkurqan.
26 Tsay höra elaqpita patsa fiyupa siksikyar carciltapis kuyutsiptinmi lapan punkukunapis jukla kichakäkurqan y prësukuna watarashqan cadinakunapis paskakäkurqan.
27 Prësukuna täpaq wardianami rikcharkur punkukuna kicharpaykaqta tarirqan. Tsaymi prësukuna qeshpikärishqanta yarpar espädanwan wanutsikuyta munarqan.
28 Tsayta rikarmi Pablo lapan kalpanwan kayno nirqan: “¡Ama wanutsikuytsu! ¡Lapänïmi kaycho karkaykä!”
29 Tsawraqa atskita manakurir Pablo y Silas kaykashqanman warakayla yaykurir nawpanman siksikyaykar qonqurpakuykurqan.
30 Carcilpita jorqarkamurmi tapurqan kayno nir: “Taytakuna, ¿imatataq ruräman salvakunäpaq?”
31 Tsayno tapuptinmi kayno nipäkurqan: “Señor Jesucristuman yärakuy. Payman yärakurqa qampis y wayikicho taqkunapis salvakärinkipaqmi”.
32 Nirkurnami tsay wardiata y wayincho taykaqkunatapis Señor Jesucristupa wilakuyninta wilaparqan.
33 Tsay tsakaymi wardiaqa Pablupa y Silaspa qaran pishtaypa pishtashqantapis jampiparqan. Nirkurnami paypis y wayincho taqkunapis *bautizakurir
34 wayinman pushaykur mikuyta qararqan. Tayta Diosman yärakunanpaq tantiyakushqanpitami wayincho taqkunawan pasaypa kushikärirqan.
35 Patsa waraptinnami Pabluta y Silasta kacharinanpaq autoridäkuna wardiakunata kacharqan.
36 Tsaymi prësukuna täpaq wardia Pabluta kayno nirqan: “Autoridäkunami wilakatsimushqa qamkunata kacharinäpaq. Kananqa jawkalana aywakäriy”.
37 Tsawraqa wardiakunata Pablo kayno nirqan: “Roma runa karkaykaptïmi mana juzgamaylapa lapanpa nawpancho wirurkatsimar kay carcilman wichqatsimashqa. Kananqa ¿pakaylapa kachariykamaytaku munarkaykan? ¡Kikinkunaraq shamutsun jorqapäkamänanpaq!”
38 Tsayno nishqantami wardiakunaqa autoridäkunata wilarqan. Roma runa kapäkushqanta mayaykurmi autoridäkuna mantsakärirqan.
39 Tsaymi Pablo y Silas kaqman aywaykur perdonta manakärirqan. Nirkurnami carcilpita jorqurkur ruwakärirqan tsay markapita aywakärinanpaq.
40 Carcilpita yarqurirmi Lidiapa wayinman aywapäkurqan. Tsaycho wawqi panikunata shakyarkatsirmi Filipos markapita aywakärirqan.
Ichic wilacuycuna
^ señalakushqan Señalakuyqa chiwlakunanpa punta qaranta kutsurir jorqushqanmi kaykan. Abrahamwan Tayta Dios pactuta rurashqanta yarpashpanmi Israel runakunaqa tsayno señalakärin. Tsaymi olqu wamrakunata yurishqanpita pusaq junaqniyuq kaykaptin señalapäkun. Tsaytami castellänucho “circuncisión” nipäkun (Gén. 17.9-14; Col. 2.11; 1Cor. 7.18-20).
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ mayor wawqi Mayor wawqikunaqa iglesiacho yachatsiqkunami kaykan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churapäkurqan (Hech. 14.23). Apóstol Pedrumi wilamantsi wawqi panikunata imano rikananpaq kashqantapis (1Ped. 5.1-4). Wawqi panikunata imano rikashqanpitami mayor wawqikuna Tayta Diosta cuentata qonqa (Heb. 13.17). Mayor wawqikuna imano kawananpaq kashqantapis Bibliachömi wilamantsi (1Tim. 3.2-7; Tito 1.5-9). Mayor wawqi kananpaq pitapis manaraq churar imano kawashqantapis shumaq musyashun (1Tim. 5.22).
^ 16.4 Hech. 15.23-29.
^ 16.10 Troaspitami kay libruta qelqaq Lucaspis Pabluwan puriyta qalaykurqan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 16.24 Cëpuqa rakta tablapita rurashqami karqan. Tsaychömi runata chakipita karpis, makipita karpis y kunkapita karpis prësurätsirqan. Cëpuchöqa prësukuna pasaypami nakarqan.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
