Hechos 20:1-38
20 Tsaypitanami discïpulukunata qayaykatsir Tayta Dios munashqanno imaypis kawananpaq Pablo shakyätsirqan. Despidikurirnami Macedonia provinciapana aywakurqan.
2 Tsay provinciacho markan markan purirmi Jesucristuman yärakuqkunata shakyätsirqan.
Tsaypitanami Greciaman* chayaykur
3 kimsa killa tsaycho tarqan. Tsaypita Siriaman *büquiwan kutikunanpaqna kaykarmi mayarqan Israel runakuna payta wanutsinanpaq wilanakushqanta. Tsaymi büquiwan aywananpa trukanqa chakilapana Macedonia provinciamanraq aywarqan.
4 Payta yanaqarmi aywarqan Pirrupa tsurin Sópater, Aristarco, Segundo, Gayo, Timoteo, Tíquico y Trófimupis. Sópaterqa Berea markapitami karqan. Aristarco y Segunduqa Tesalónica markapitami karqan. Gayuqa Derbe markapitami karqan. Timoteo, Tíquico y Trófimunami Asia provinciapita karqan.
5 Paykunaqa nawparkurmi Troas markacho shuyarpämarqan.*
6 Levadüraynaq Tantata Mikupäkunan fiesta pasariptinmi Filipuspita büquiwan yarqupäkurqä. Pitsqa junaqta Troasman chayaykurmi nawpaqkunawan tinkuykur juk semäna tsaycho qoyäpäkurqä.
Euticuta Pablo kawaritsimushqan
7 Domingu junaqmi Santa Cënata upupäkunäpaq wawqi panikunawan juntakarqä. Jukaqnin tuta aywakunanpaqna karmi pulan paqasyaq Pablo yachatsirqan.
8 Yachatsishqan cuartuchömi atska mechërukunata ratatsipäkurqan.
9 Tsay cuartuqa kimsa kaq pïsuchömi karqan. Ventänanchömi juk mözu Eutico jutiyuq jamaraykarqan. Atska höra Pablo yachatsiptinmi jamaraykashqancho punukäkushpan ventänapita jeqakurqan. Tsaymi wanushqatana joqarkärirqan.
10 Pablo urarpurnami tsay mözuta makalakurkur wawqi panikunata kayno nirqan: “¡Ama mantsakaytsu! ¡Kawaykanmi!”
11 Juntakashqan cuartuman kutirnami Santa Cënata upupäkurqan. Nirkurmi patsa waränanyaq yacharkatsir Pablo aywakurqan.
12 Tsay mözuta kawaykaqtami wayinman pushapäkurqan. Kawarimushqanta rikarmi lapanpis kushikärirqan.
Troaspita Miletuman Pablo aywashqan
13 Troas markapita Asón markayaq chakilapami Pablo aywarqan. Noqakunanami *büquiwan nawpakärirqä Asónchöna Pabluta shuntanäpaq.
14 Asóncho tinkurkurnami lapanï büquiwan Mitilene markaman aywakärirqä.
15 Mitilenipita aywakurnami jukaqnin junaq Quío nishqan isla nawpanpa pasarqä. Tsaypita jukaqnin junaqnami chayarqä Samos islaman. Tsaypita [Trogilio markacho jamaparkur] juk junaqtaraqmi Mileto markaman chayarqä.
16 *Pentecostés fiestapaq Jerusalénman imaykanöpapis chayayta munarmi Asia provinciacho qoyayta Pablo mana munarqantsu. Tsawraqa Éfesuman mana chayaylapana pasakärirqä.
Éfesucho mayor wawqikunata Pablo yätsishqan
17 Mileto markaman chayaykurnami Éfesucho taq *mayor wawqikunata Pablo qayatsirqan.
18 Chayaptinmi kayno nirqan: “Qamkuna musyankimi kay Asia provinciaman chayamushqä junaqpita patsa imano kawashqätapis.
19 Israel runakuna conträ sharkuptin nakarpis y waqarpis Señor Jesucristuta lapan shonqüwanmi sirvishqä.
20 Tayta Dios munashqanno kawanaykipaq kaqtaqa runakunapa nawpanchöpis y wayikikunachöpis lapantami yachatsishqä.
21 Israel runakunata y mana Israel runakunatapis tantiyatsishqä jutsa ruraykunata kacharir Señornintsi Jesucristuman yärakärinanpaqmi.
22 “Kananqa Espíritu Santu pushamaptinmi Jerusalénman aywaykä. Itsanqa tsayman chayaptï ima pasamänanpaq kaqtapis manami musyätsu.
23 May markaman aywaptïpis Espíritu Santu musyatsiman carcilman runakuna wichqamänanpaq y nakatsimänanpaq kashqantami.
24 Tsayta musyarpis manami lakikütsu. Noqaqa wanunäyaqmi Señor Jesucristo nimashqanno [kushishqa] wilakushaq Tayta Dios kuyapäkuq kashqanta.
25 “Qamkuna kaqcho purir Tayta Dios *mandaykashqanpita wilakushqäta mayamaqkuna, kananpitaqa manami mayqanikipis rikamankipaqnatsu.
26 Tayta Diospa wilakuyninta lapantami qamkunata wilapashqä. Tsawraqa mayqanikitapis Tayta Dios juzgar condenashuptiki manami jutsayuqtsu kashaq.
27 -
28 Tsayno kaykaptinqa cuidädu jutsata rurapäkunkiman. Mayor wawqikuna kanaykipaq Espíritu Santu churaykäshuptikiqa mitsikuq runa uyshankunata ali rikashqanno Tayta Diospa *iglesianta* shumaq rikapäkunki. Paymi iglesianta rantinanpaq kikinpa yawarninta jicharqan.
29 “Noqa musyämi aywakuptï lutan yachatsikuqkuna mikanaq *löbunöpis shamunanpaq kashqanta. Paykunaqa lutankunata yachatsirmi Tayta Diosman yärakuqkunata pantakätsinqa.
30 Tsaynölami qamkunapitapis lutan yachatsikuqkuna yurir discïpulukunata* criyitsiyta munapäkunqa.
31 Tsayno kananpaq kaptinqa shumaq cuidakäriy. Yarpapäkuy kimsa wata tsakaypapis junaqpapis jukniki juknikita waqapaypa yachatsishqäta.
32 [Wawqikuna,] kananqa kuyapäkuq Tayta Diospa makinmanmi qamkunata kachaykü. Paypa wilakuynin munayniyuqmi kaykan shumaq tantiyatsishunaykipaq. Tsaynöpami lapan salvashqa kaqkunawan juntu herenciata* chaskipäkunkipaq.
33 “Noqa manami pipa qellaynintapis, qorintapis ni röpantapis munapashqätsu.
34 Musyashqaykinöpis nistashqäkunapaq y noqawan puriqkuna nistashqankunapaqpis kikïmi arushqä.
35 Tsaynöpami qamkunata yachatsishqä noqano arur waktsakunata yanapanaykipaq. Señor Jesucristupis kaynömi nirqan: ‘Imatapis chaskir kushikushqantsipitapis mas kushikuypaqmi kaykan pitapis yanapashqantsi’ ”.
36 Pablo tsayno yacharkatsirmi paykunawan qonqurpakuykur Tayta Diosta manakurqan.
37 Manakuyta usharkuptinmi lapanpis waqashpan payta makalakur mutsapäkurqan.
38 Payta mana rikananpaqna niptinmi pasaypa lakikärirqan. Tsaypitanami aywakunanpaqna *büqui kaykashqanyaq pushapäkurqan.
Ichic wilacuycuna
^ 20.2 Greciapaq parlarqa Acaya provinciapaqmi parlaykan. Acaya provinciachömi Corinto marka karqan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ 20.5 Kay libruta qelqaq Lucaspis Pabluwanmi purirqan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ Pentecostés fiesta Pentecostés fiestata rurapäkuq mayo killa ushay o juniu killa qalaykunanchömi. Tsay fiestata rurapäkurqan Pascua fiesta ushashqanpita pitsqa chunka (50) junaqtami. Tsay fiestata rurapäkuq cosëchan kashqanpita Tayta Diosnintsita agradëcikushpanmi. Pentecostés fiestapa jukaq jutinmi kaykan Semäna Fiesta y Cosëcha Ushay fiesta (Éxo. 23.16; Lev. 23.15-16; Deut. 16.9-12; Hech. 2.1-4).
^ mayor wawqi Mayor wawqikunaqa iglesiacho yachatsiqkunami kaykan (1Tim. 3.2). Bernabéwan apóstol Pablumi mushuq iglesiakunacho mayor wawqikunata churapäkurqan (Hech. 14.23). Apóstol Pedrumi wilamantsi wawqi panikunata imano rikananpaq kashqantapis (1Ped. 5.1-4). Wawqi panikunata imano rikashqanpitami mayor wawqikuna Tayta Diosta cuentata qonqa (Heb. 13.17). Mayor wawqikuna imano kawananpaq kashqantapis Bibliachömi wilamantsi (1Tim. 3.2-7; Tito 1.5-9). Mayor wawqi kananpaq pitapis manaraq churar imano kawashqantapis shumaq musyashun (1Tim. 5.22).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 20.28 1Tim. 3.15.
^ löbu Löbuqa jatusaq fiyu alquno munti uywami kaykan.
^ 20.30 Discïpulukunapaq parlarqa Jesucristuta chaskikuqkunapaqmi parlaykan.
^ 20.32 Col. 1.12; 3.24; Tito 3.7; Heb. 10.34; 1Ped. 1.4.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
