Hechos 23:1-35
23 Tsawraqa juezkunata rikärir Pablo kayno nirqan: “Taytakuna, Tayta Dios rikaykämashqanta tantiyakurmi kananyaqlaqa imatapis lutanta mana rurashqätsu”.
2 Tsayno niptinmi mas mandaq cüra Ananías nawpancho kaqkunata nirqan Pabluta shimicho laqyananpaq.
3 Laqyatsiptinmi Pablo kayno nirqan: “¡Ishkay cära runa!* ¡Kikikitami Tayta Dios castigashunki! Ley nishqanno juzgamänaykipaq jamaraykarqa ¿imanirtaq leyta mana cäsur laqyatsimanki?”
4 Tsayno niptinmi Pablupa nawpancho kaykaq runakuna kayno nipäkurqan: “¿Imanirtaq Tayta Dios akrashqan mas mandaq cürata qayapanki?”
5 Tsawraqa Pablo kayno nirqan: “Taytakuna, mandaq cüra kashqanta manami musyashqätsu. Musyarqa manami imatapis nïmantsu karqan. Tayta Diospa palabranchöpis kaynömi qelqaraykan: ‘Markaykicho autoridäkunata ama maldicionankitsu*’ ”.
6 Pablo musyarqanmi tsay juezkuna wakin *saduceo kashqanta y wakin fariseo kashqanta. Tsawraqa fuertipa kayno nirqan: “¡Taytakuna! Noqa *fariseumi kä.* Taytäpis fariseumi kashqa. Wanushkunata Tayta Dios kawaritsimunanpaq kashqanta criyiptïmi juzgarkaykämanki”.
7 Tsayno niptinmi fariseukunaqa Pablupa favornin sharkur saduceukunawan shimi shimi rimanakärirqan.
8 Saduceukuna yachatsipäkun wanushkuna manana kawarimunanpaq kashqantami.* Tsaynöpis yachatsipäkun *angilpis ni runapa almanpis mana kashqantami. Fariseukunanami yachatsipäkun wanushkuna kawarimunanpaq kashqanta, ángel kashqanta y almapis kashqanta.
9 Tsayno rimanakuptinmi ley yachatsiq fariseukuna kayno nipäkurqan: “Kay runaqa manami imatapis mana alita rurashqatsu. Capazchari ángel karpis o alma karpis parlapashqa. [Cuidädu Tayta Diospa contran karkaykankiman]”.
10 Rimanakur apta apta kaptinmi comandanti mantsakur kayno nirqan: “Capazchari Pabluta wanuykatsinmanpis”.
Tsawraqa soldädukunata qayatsimurqan Pabluta carcilman kutitsinanpaq.
11 Tsay tsakaymi Pabluta yuriparkur Señor Jesucristo kayno nirqan: “Pablo, ama mantsakuytsu. Jerusaléncho wilakuynïta wilakushqaykinömi Romachöpis wilakunki”.
Pabluta wanutsinanpaq wilanakushqan
12 Autoridäkuna juntakashqanpita jukaqnin junaqmi Pabluta wanutsinanpaq wakin Israel runakuna jurar kayno nipäkurqan: “Pabluta manaraq wanutsirqa imatapis ama mikushuntsu ni upushuntsu”.
13 Tsayno wilanakuq runakuna karqan chusku chunkapita (40) masmi.
14 Paykunami mandaq cürakunaman y Israel mayor runakunaman aywaykur kayno nipäkurqan: “Noqakuna jurashqä Pabluta manaraq wanutsirqa imatapis mana mikunäpaq ni upunäpaqmi.
15 Tsawraqa ‘Pablutami shumaq tapuyta munapäkü’ niq tumpala comandantita nipäkuy wara tuta Pabluta apatsimunanpaq. Noqakuna kamarikushqalami kaykäshaq apaykämuqlata wanutsinäpaq”.
16 Tsayno wilanakushqanta mayaykurmi Pablupa paninpa olqu wawan carcilman aywaykur Pabluta wilarqan.
17 Wilaptinmi Pablo juk capitanta qayaykur kayno nirqan: “Kay mözuta comandantiman pushay. Paytami wilayta munaykan”.
18 Mözuta comandantiman pushaykurmi capitán kayno nirqan: “Prësu kaykaq Pablumi ruwakamashqa kay mözuta qamman pushamunäpaq. Paymi imata mayashqantapis wilashunki”.
19 Tsawraqa tsay mözuta janchashqa juk läduman pushaykur comandanti tapurqan kayno nir: “¿Imataq kaykan wilamänaykipaq?”
20 Tsawraqa mözu kayno nirqan: “Wakin Israel runakunami wilanakushqa *Sanedrín juezkuna juntakänanman Pabluta wara tuta apatsinaykipaq. Tsayno apatsinaykita munarkaykan Pabluta shumaq tapuyta munaq tumpalashi.
21 Tsayta ama criyiytsu. Chusku chunkapita (40) masmi runakuna jurashqa Pabluta manaraq wanutsirqa imatapis mana mikupäkunanpaq ni upupäkunanpaq. Paykunami shuyarpaykan Pabluta pushaykämuptilan wanutsinanpaq”.
22 Wilaykuptinnami tsay mözuta comandanti kayno nirqan: “Wilamashqaykita ama pitapis wilapankitsu”.
Tsayno yätsirkurmi tsay mözuta despacharqan.
Cesarea markaman Pabluta apashqan
23 Tsayta musyarkurmi comandanti ishkay capitankunata qayaykatsir kayno nirqan: “Kanan kamarikäriy ishkay pachak (200) soldädukuna chakipa aywananpaq, qanchis chunka (70) soldädukuna cawallun muntashqa aywananpaq y ishkay pachak (200) soldädukuna lanzankunawan aywananpaq. Paykunami kanan tsakay las nuëvi Cesarea markaman yarqupäkunqa.
24 Pablo muntakunanpaqpis cawallukunata kamaripay. Gobernador Félixman Pabluta apapäkuptin imapis ama pasatsuntsu”.
25 Tsaynölami cartata qelqarqan paykunawan apatsinanpaq. Tsay cartachömi kayno nirqan:
26 Gobernador Tayta Félix:
Noqa Claudio Lisiasmi qampaq salüdüta apatsikamü.
27 Israel runakunami kay runata tsarirkur wanutsinanpaqna kaykashqa. Tsaymi Roma runa kashqanta musyashpä soldädükunawan aywaykur washämushqä.
28 Nirkurnami imapita contran sharkushqantapis musyayta munar *Sanedrín juezkuna juntakashqanman apashqä.
29 Tsaychönami contrankuna nishqa leyninkunata mana cumplishqanta. Tsayno niptinpis manami ima jutsantapis tarishqätsu wanutsishqa kananpaq ni carcilcho wichqaränanpaqpis.
30 Israel runakuna payta wanutsinanpaq wilanakushqanta musyaykurmi qamman apaykätsimü. Tsaynölami paykunata nishqä qampa nawpaykicho arreglananpaq kashqanta. Tsaylatami kanan qelqarkamü.
31 Comandanti mandashqannölami soldädukuna tsay tsakay Pabluta apapäkurqan Antípatris markayaq.
32 Jukaqnin tutami cawallun muntashqa aywaqkunalana Cesareaman Pabluwan aywapäkurqan. Wakin soldädukunaqa cuartilninmannami kutikärirqan.
33 Cesareaman chayaykurnami gobernador Félixta cartata entregaykur Pablutapis entregaykurqan.
34 Tsay cartata Félix liyirirnami Pabluta tapurqan maypita kashqantapis. Cilicia provinciapita kashqanta musyaykurmi
35 kayno nirqan: “Contraykikuna chayamuptinraqmi declaracionnikita mayashaq”.
Nirkurmi Pabluta wichqatsirqan rey Herodes sharkatsishqan despächuncho kaykaq carcilman.
Ichic wilacuycuna
^ 23.3 Mat. 23.27.
^ 23.5 Éxo. 22.28.
^ saduceo runa Saduceo runakunaqa yarpapäkurqan Moisés qelqashqankunala Tayta Diospa yachatsikuynin kashqantami. Paykunaqa manami criyirqantsu runakuna wanushqanpita kawarimunanpaq kashqanta ni alman kashqanta ni angilkuna kashqantapis. Saduceukunaqa mas rïcu runakunami karqan. Fariseo runakunapitaqa mas munayniyuqmi karqan (Luc. 20.27-40).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 23.6 Hech. 26.5; Fil. 3.5.
^ 23.8 Mat. 22.23; Mar. 12.18; Luc. 20.27.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Sanedrín juezkuna Sanedrín juezkunaqa Israel nacioncho mas mandaq juezkunami karqan. Tsay juezkunapa mandaqninqa mas mandaq cürami karqan. Sanedrín juezkunami juzgarqan Jesústa (Mat. 26.57-68), Pedruta y Juanta (Hech. 4) y apóstol Pabluta (Hech. 22.30–23.20).
^ Sanedrín juezkuna Sanedrín juezkunaqa Israel nacioncho mas mandaq juezkunami karqan. Tsay juezkunapa mandaqninqa mas mandaq cürami karqan. Sanedrín juezkunami juzgarqan Jesústa (Mat. 26.57-68), Pedruta y Juanta (Hech. 4) y apóstol Pabluta (Hech. 22.30–23.20).
