Hechos 5:1-42
5 Tsaychömi juk runa karqan Ananías jutiyuq. Paymi warmin Safirawan chakranta rantikurqan.
2 Ishkan yachatsinakurirmi chakranta rantikushqan qellayta rakikurir wakilantana *apostolkunaman Ananías aparqan.
3 Tsaymi Pedro kayno nirqan: “Ananías, ¿imanirtaq *Satanásta chaskipar Espíritu Santuta lulapaykanki? ¿Imanirtaq niykanki chakraykipa chanin qellayta lapanta apamushqaykita?
4 Rantikushqayki chakrapis y tsay qellaypis ¿manaku kikikikunapa kashqa? Tsayno kaykaptinqa ¿imanirtaq lulakushqanki? Manami runakunataku lulapashqanki, sinöqa Tayta Diostami”.
5 Pedro tsayno niptinmi Ananías jinan höra wanurqan. Tsayno wanushqanta musyaykurmi runakuna pasaypa *mantsakarqan.
6 Tsawraqa mözukuna Ananíaspa ayanta piturkur pampaq apapäkurqan.
7 Tsaypita kimsa höratanömi Ananíaspa warmin Safira chayarqan. Payqa manami musyarqanraqtsu runan wanushqanta.
8 Chayaykuptinmi Pedro tapurqan kayno nir: “¿Rasunpaku runayki apamushqan qellaylacho chakraykita rantikärishqanki?”Tsawraqa Safira kayno nirqan: “Aw, tsaylachömi rantikärishqä”.
9 Niptinmi Pedro kayno nirqan: “Señornintsipa Espïritun musyaykaptin ¿imanirtaq lulakunaykipaq yachatsinakushqanki? ¡Rikay! Punkuchönami kaykan runaykipa ayanta pampaq mözukuna. Kanan qamtanami apapäkushunki”.
10 Tsayno niptinmi Pedrupa nawpancho Safirapis wanurqan. Tsayman mözukuna yaykurmi taripäkurqan wanushqana jitaraykaqta. Tsawraqa paytapis apaykur runanpa nawpanman pampapäkurqan.
11 Ananías y Safira wanushqanta mayaykurmi Jesúsman yärakuqkunapis y mana yärakuqkunapis pasaypa mantsakashqa rikakärirqan.
Qeshyaqkunata apostolkuna aliyätsishqan
12 Runakuna rikarkaykaptinmi *apostolkuna atska milagrukunata rurapäkurqan. Tsaynöpis Jesúsman lapan yärakuqkunami templuman aywar Salomónpa Alarnin nishqanman juntapäkuq.
13 Wakin runakunaqa Jesúsman yärakuqkunata ali rikarpis paykunawan talukayta mantsakärirqanmi.
14 Tsayno kaptinpis Jesúsman yärakuqkuna warmipis olqupis masmi atskayarqan.
15 Runakunanami qeshyaqkunata cämantinta cälliman jorqamuq kayno yarpapäkushpan: “Pedro pasaptin lantuylanpis jananman chayaptinqa aliyanqami”.
16 Cercan markakunapitapis Jerusalénmanmi shapäkamuq qeshyaykaqkunata y *supay nakatsishqankunata apakurkur. Tsay apashqan qeshyaykaqkunata lapantami apostolkuna aliyätsirqan.
Apostolkunata autoridäkuna prësu tsarishqan
17 Tsawraqa mas mandaq cüra y *saduceo runakuna apostolkunata chikishpan
18 prësu tsariykatsir carcilman wichqatsirqan.
19 Wichqarpaykaptinmi tsay tsakay Tayta Dios kachamushqan ángel chayaykur cárcel punkukunata kicharqan. Pedruta y Juanta waqtaman jorqurirmi kayno nirqan:
20 “Templu patiuman aywapäkuy runakuna salvakärinanpaq ali wilakuyta wilakärinaykipaq”.*
21 Tsawraqa waraynin* tuta templu patiuman apostolkuna yaykur runakunata wilaparqan.
Tsayyaqmi yanapaqninkunawan mas mandaq cüra *Sanedrín juezkunata y Israel runakunapa lapan autoridäninkunata qayatsirqan sesionta rurananpaq. Nirkurmi wardiakunata kacharqan carcilpita apostolkunata jorqamunanpaq.
22 Wardiakuna carcilman chayaykushpannami apostolkunata mana tarirqannatsu. Tsawraqa kutiykur kayno nipäkurqan:
23 “Cárcel punku shumaq wichqaraykaqtami taripäkushqä. Prësu täpaqkunatapis punkukunacho ichirpaykaqtami taripäkushqä. Ruriman yaykurmi itsanqa mayqan prësutapis mana taripäkushqätsu”.
24 Tsayno nipäkuptinmi [mas mandaq cüra,] templucho wardiakunapa capitannin y wakin mandaq cürakunapis yarpachakurqan kayno nir: “¿Imanöparaq qeshpishqa? ¿Imaraq pasashqa?”
25 Tsayno yarpachakurkaykaptinmi juk runa chayaykur kayno nirqan: “¡Carcilman wichqashqayki runakuna templu patiuchömi yacharkaykätsin!”
26 Tsayno niptinmi wardiakunata pushakurkur capitán aywapäkurqan apostolkunata prësu tsarinanpaq. Chayaykurmi runakuna saqmananta mantsakushpan mana maqaylapa prësu aparqan.
27 Sanedrín juezkuna juntaraykashqanman chayaykatsiptinmi mas mandaq cüra apostolkunata kayno nirqan:
28 “¿Manaku qamkunata nishqä Jesúspa jutincho manana yachatsipäkunaykipaq? Tsayno niykaptïpis qamkunaqa Jesúspita yachatsirmi intëru Jerusaléncho purirkaykanki. Tsaynöpis jitaparkaykämanki noqakuna Jesústa wanutsipäkushqäta”.*
29 Tsayno niptinmi Pedro y paywan kaykaq *apostolkuna kayno nipäkurqan: “Runakunata cäsukunäpa trukanqa Tayta Diostami cäsukärishaq.
30 Qamkuna Jesústa crucificaypa wanutsishqa kaptikipis unay ayluntsikuna yärakushqan Tayta Diosmi kawaritsimushqa.
31 Paymi mandamaqnintsi y salvamaqnintsi kaykan. Jutsa ruraykunata kacharir perdonashqa kanantsipaqmi alawqa kaq nawpanman jamatsishqa.
32 Tsaytami noqakunapis musyatsipäkü y Espíritu Santupis runakunata musyatsin. Payta cäsukuqkunamanmi Espíritu Santuta Tayta Dios kachamushqa”.
33 Tsayno nipäkuptinmi autoridäkuna fiyupa rabyakushpan wanutsiyta munapäkurqan.
34 Tsawraqa lapan runakuna respitashqan juk *fariseo runa sharkurkur wardiakunata nirqan apostolkunata waqtaman rätula jorqunanpaq. Tsay fariseo runapa jutinmi karqan Gamaliel. Payqa Tayta Diospa leyninkunata alimi yachatsiq.
35 Tsayno jorqurkatsirmi kayno nirqan: “Israel runakuna, kay runakunapa contran imatapis manaraq rurar shumaq yarpachakäriy.
36 ¿Yarpapäkunkiku nawpata Teudas jutiyuq runa ‘mandaqmi kä’ nir purishqanta? Payta qatirarqan chusku pachak (400) runakunami. Tsayno puriykaqta wanuykatsiptin qatiraqninkuna wakpa kaypa aywakärirmi elqashqa.
37 Tsaypita censakuy kashqan witsan Galileapita shamuq Judas yurimuptinpis atska runakunami qatirarqan. Paytapis wanuykatsiptin qatiraqninkuna wakpa kaypa aywakurmi elqarqan.
38 Tsawraqa noqa yätsï kay runakunata mana cäsupänantsipaq. Kikinkunapa yarpaynilanpita wilakuptinqa niykashqalanchömi ushakäkunqa.
39 Wilakärinanpaq Tayta Dios churashqa kaptinqa manami imanöpapis elqätsinkitsu. Elqätsiyta munarqa cuidädu Diospa contran rurarkaykankiman”.
40 Tsawraqa Gamaliel nishqanta cäsukärishpanmi apostolkunata mana wanutsirqannatsu. Tsaypa trukanqa qayaykatsir astapäkurqan. Nirkurmi Jesúspa jutincho manana wilakärinanpaq juraparkur kacharirqan.
41 Kachariptinmi apostolkuna Tayta Diosta kushishqa alabapäkurqan kayno nir: “Kuyamashpaykimi kamakätsishqanki qampa jutikicho wilakärishqäpita nakanäpaq”.
42 Paykunaqa waran waranmi templu patiucho y wayikunachöpis runakunata yachatsir Jesúsqa salvamaqnintsi Cristo kashqanta wilakäriq.
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ saduceo runa Saduceo runakunaqa yarpapäkurqan Moisés qelqashqankunala Tayta Diospa yachatsikuynin kashqantami. Paykunaqa manami criyirqantsu runakuna wanushqanpita kawarimunanpaq kashqanta ni alman kashqanta ni angilkuna kashqantapis. Saduceukunaqa mas rïcu runakunami karqan. Fariseo runakunapitaqa mas munayniyuqmi karqan (Luc. 20.27-40).
^ 5.20 Juan 11.25; 14.6; Rom. 6.4.
^ 5.21 Wakin runakunaqa warantin nipäkun.
^ Sanedrín juezkuna Sanedrín juezkunaqa Israel nacioncho mas mandaq juezkunami karqan. Tsay juezkunapa mandaqninqa mas mandaq cürami karqan. Sanedrín juezkunami juzgarqan Jesústa (Mat. 26.57-68), Pedruta y Juanta (Hech. 4) y apóstol Pabluta (Hech. 22.30–23.20).
^ 5.28 Mat. 27.25.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
