Job 13:1-28
13 “Qamkuna rikashqaykita noqapis rikashqämi.Qamkuna mayashqaykita noqapis mayashqämi.
2 Qamkuna musyashqaykita noqapis musyämi.Noqapis qamkunanömi kaykä.
3 “Noqaqa kikin Tayta Dioswanmi parlayta munä.Lapanpaq munayniyuq Tayta Diostami tapukuyta munä.
4 Qamkunaqa lulapämashpaykimi rasun kaqta mana rimapäkunkitsu.Jampikuyta mana yachaq mëdicunömi karkaykanki.
5 ¡Alimi kanman upälakäriptiki!¡Upälakurqa tantiyakuq runanömi karkaykanki!*
6 “Kanan tantiyatsiptï shumaq mayapäkamay.Kananmi imata yarpashqätapis tantiyatsishayki.
7 “¿Imanirtaq lulakur Diospa favornin kashqaykita yarparkaykanki?¿Imanirtaq lutanta rimarpis alita rimashqaykita yarparkaykanki?
8 Kikilaykikunapaqqa Diospa favorninchari karkaykanki ¿aw?¿Tayta Diospa abogädun kaytaku munarkaykanki?
9 “¿Imanöraq kapäkunki lulakushqaykipita Tayta Dios juzgashuptiki?¿Runata criyitsiqnötsuraq paytapis criyitsinaykipaq yarparkaykanki?
10 Tayta Diospa favornin sharkuq tukur lulakäriptikiqa mana kuyapaypami castigashunkipaq.
11 Castigashuptiki munayniyuq kashqanta tantiyar ¿manatsuraq mantsakankipaq?
12 “Qamkuna rimashqaykikunaqa liptano pishi töpaylami kaykan.Yachaq tukärishqaykipis manami imapaqpis välintsu.
13 “Rimashqäta tantiyapäkunaykipaq upälakäriy.Lutanta rimaptïqa Tayta Dios jukla juzgamätsun.
14 Wanutsimayta munarqa wanutsimätsun.Ima pasamänan kaptinpis manami mantsakütsu.
15 Wanutsimänan kaptinpis paymanmi yärakushaq.Munashqanno kawashqätaqa kikintami nishaq.
16 Tsawraqa kikinmi salvamanqa.Jutsa ruraq runapaqa tsayno rimananpaq manami valorninpis kanmantsu.
17 “Nishqäkunata shumaq tantiyakäriy.Parlashqäkunata shumaq mayapäkamay.
18 Imata ninäpaqpis shumaqmi yarpachakushqä.Tsaymi rasun kaqlata nishaq.
19 Manami pipis ‘jutsayuqmi kanki’ nimanqatsu.Jutsäta tariptinqa wanushqäyaqmi upälakushaq.
20 “Ishkay cösalata ruwakushayki, Tayta Dios.Manakushqäta awnimaptikiqa qampita manami pakakushaqtsu.
21 Amana castigaykalämaytsu.Amana mantsakätsimaytsu.
22 Qayamaptiki ‘kaychömi kaykä’ nishaykimi.Puntata parlanäpaq nimaptikipis yarpashqäkunatami nishayki.
23 “Jutsä ima kashqantapis wilaykalämay, Tayta.Lutanta rurashqäkunatapis tantiyaykatsilämay.
24 ¿Imanirtaq noqapita *pakakunki?*¿Imanirtaq contraykitano rikaykämanki?
25 Wayra tumaykätsishqan raprano kaykaptïqa ¿imanirtaq ushakätsimayta munaykanki?Tsakishqa oqshano kaykaptïqa ¿imanirtaq qatikachaykämanki?
26 ¿Imanirtaq castigamashpayki lakikatsimanki?¿Imanirtaq mözu kar jutsata rurashqäpita nakatsimanki?
27 Chakïkunatapis cadinawannömi watashqanki.Imata rurashqätapis musyaykankimi.Maypa aywaptïpis rikaykämankimi.
28 Imapis ismur ushakaykaqnömi ushakaykä.Puyu ushashqa röpanömi kaykä.
Ichic wilacuycuna
^ 13.5 Prov. 17.28.
^ pakakushqan, Dios pakakushqan Tayta Dios pakakushqanpaq Bibliacho parlarqa Tayta Dios mana yanapashqanta o mana tantiyatsishqantami niykan (Sal. 10.1; 13.1; 44.24; 89.46; 143.7).
^ 13.24 Sal. 44.24.
