Job 18:1-21
18 Tsaypitanami Súa partipita shamuq Bildad kayno nirqan:
2 “¿Imayyaqtaq tsaynöla rimaykanki?Shumaq parlanantsipaq tantiyakuy.
3 ¿Imanirtaq uywatano rikamanki?¿Imanirtaq upa kashqäta yarpanki?
4 Rabyashqaykiwanqa manami imatapis jorqunkitsu.Mayjina rabyakuptikipis kay patsa manami chunyaq rikakunqatsu ni qaqakunapis juk läduman witikunqatsu.
5 “Jutsasapa runaqa atski upiqnömi elqanqapaq.
6 Wayinpis tsakaqlami kanqa.*
7 Ali puriykaptinmi chankankunapis siksikyanqa.Runa mayinpaq lutanta yarpashqanpis kikinmanmi chayanqa.
8 “Tsaynöpis trampaman yaykuqnömi kanqa.Trampapita yarquyta mana kamäpakuqnömi kanqa.
9 Utsuputunpita tsarishqano karqa manami qeshpinqatsu.
10 Paykunapaq churashqan trampa mana rikakaylami kaykan.
11 “Fiyu runataqa wakpita kaypitami imalapis mantsakätsin.Manami imaypis jawka kawantsu.
12 Yarqaylawanmi kalpanpis ushakan.Paytaqa ima desgraciapis pasanmi.
13 Qeri qeshyami intëru cuerpunta ushanqa.Tsay qeshyawanmi rikranpis y chankanpis wanunqa.
14 Wayincho jawkala kaykaqtami wanuy apakunqa.Nirkurmi pasaypa nakananpaq kachaykamunqa.
15 Wayinchöpis manami kikinpa wayinchönötsu tanqa.Tsay wayimanqa azufritaraqmi shikanqa.*
16 “Fiyu runaqa sapin ismushqa y räman tsakishqa yöranömi kanqa.
17 Wanuptinqa kay patsacho pasaypami qonqaykärinqa.Cällikunachöpis manami pipis jutinta joqarinqanatsu.*
18 Atsikyaq patsapitapis tsakayman jitarpushqami kanqa.Kay patsapitapis qarqushqami kanqa.
19 “Paypaqa manami tsurinpis ni wilkanpis kanqatsu.Tashqan markachöpis manami paypita miraqkuna tanqatsu.*
20 Tsayno pasashqanta pïmaypis musyaykurmi maytsaychöpis mantsakashqa rikakunqa.
21 “Fiyu runakunaqa tsaynömi ushakanqa.Tayta Diosta mana cäsukuqkunaqa lapanmi tsayno ushakanqa”.
Ichic wilacuycuna
^ 18.6 Wayinpis tsakaqlami kanqa ninanqa imaypis desgracia pasanqa ninanmi.
^ 18.15 Tsay witsanmi imamanpis azufrita shikarqan qeshyata y diabluta qarqunanpaq kashqanta yarpar.
^ 18.19 Sal. 37.28.
