Job 26:1-14
26 Tsayno niptinmi Job kayno nirqan:
2 “Nakaykaptï tsayno nimarqa ¿yanapaykämankitsuraq?Kalpä mana kaptinpis ¿valuraykätsimankitsuraq?
3 Yätsimaptikiqa alichari kawäman ¿aw?Mana yachaq kaptïchari tsayno tantiyaykätsimanki ¿aw?
4 ¡Pitaq tsayno parlanaykipaq yachayta qoshushqanki!¡Pitaq tsayjinanpa ali yarpayta qoshushqanki!
5 “Wanushqa runakunapa almanqa lamarpita mas rurincho karmi fiyupa mantsakärin.
6 Tsaycho kaptinpis paykunataqa Tayta Dios rikaykanmi.Maycho kashqantapis musyaykanmi.
7 Imapis mana kaykaptinmi jana patsata y kay patsatapis Tayta Dios kamashqa.
8 Paymi yakutapis pukutaycho tsararan.Yaku mayjina lasarpis pukutayta manami rachikätsintsu.
9 Killapa atsikyaynintapis pukutaywanmi tsakätsin.
10 Tsaynölami intitapis nishqa lamarpa juk kuchunpa jeqarkamur atsikyänanpaq y jukaq kuchunpa jeqarpur tsakänanpaq.
11 “Tayta Dios rabyakuptinqa jana patsata tuknaraqkunapis mantsakushpanmi siksikyan.
12 Munayniyuq karmi lamartapis pulchaqyaykaqta chawätsin.Poderösu karmi *Rahab uywatapis vincishqa.*
13 Pükariptinmi jana patsapis atsikyarkurqan.Mantsakuypaq jatunkaray culebratapis* qeshpiykaqta paymi tsarirkur wanutsishqa.
14 “Tsaykunaqa kaykan Tayta Dios juk ishkay rurashqan kaqkunalaraqmi.Pay rurashqankunataqa ichiklatami musyantsi.Pasaypa munayniyuq kashqantaqa ¿piraq shumaq tantiyanman?”
Ichic wilacuycuna
^ Rahab uywa Unay runakuna nipäkurqan Tayta Dios kay patsata kamashqan witsan Rahabqa lamarcho jatunkaray mantsakuypaq uywa kashqanta. Tsay uywa Tayta Diospa contran kaptinmi Tayta Dios vincirqan (Job 26.12; Sal. 89.10; Isa. 51.9).
