Job 29:1-25
29 Tsaymi Job yapay kayno nirqan:
2 “¡Imanöparaq kutirküman nawpata kawashqäman!Tsay witsanqa Tayta Dios alimi rikamarqan.
3 Atskinwan atsikyapaqnömi yanapamarqan.Ima rurayta mana kamäpakuptïpis tantiyatsimarqanmi.
4 Wayïcho taqkunatawan imapitapis tsapämaptinmi kushishqa kawarqä.
5 Lapanpaq munayniyuq Tayta Dios yanapamaptinmi tsurïkunapis nawpächo karqan.
6 Tsay witsanqa lëchipis yakunöraq atskami karqan.Aceitipis putsuy putsuymi karqan.
7 “Noqaqa marka yaykuna punkuchömi imaypis mayor runakunawan jamakuq kä.
8 Tsay witsanqa juntaraykashqanman yaykuptï mözukunapis respitamashpanmi witikäriq.Awkinkunapis respitamashpanmi ichikäriq.
9 Mayor runakunapis parlaykashqanpita upälakäriqmi.
10 Mandaqkunapis rimaykashqanpita jinan hörami upälakäriq.Manami mayqanpis rimakuqnatsu.
11 “Reqimaq runakunapis noqapa favornïmi rimapäkuq.Pïmaypis ali kashqätami parlapäkuq.
12 Tsay witsanqa waktsakunata yanapaqmi kä.
13 Muchuycho kawaqkunapis yanapashqäpita agradëcikamaqmi.Viüdakunapis yanapaptï kushikäriqmi.
14 “Noqaqa pïmaywanpis alimi kawarqä.Manami pitapis engañarqätsu.
15 Qaprakunatapis alimi pusharaq kä.Weqrukunatapis alimi yanapaq kä.
16 Waktsakunapapis papäninnömi karqä.Jäpa runakunapapis favorninmi sharkuq kä.
17 Pitapis fiyu runakuna nakatsinanta manami kachapaqtsu kä.Pitapis nakatsiptinqa leonpa shiminpita qechuqnömi washaq kä.
18 “Noqaqa yarparqä wanuptï lapan tsurïkuna pampamänanpaq kashqantami.Tsaynöpis yarparqä atska wata kawanäpaq kashqantami.
19 Noqaqa karqä yaku kuchuncho yöra kaykaqnömi.*Yörapa raprankuna shulyapashqa warämushqannömi noqapis kushishqa warämuq kä.
20 Noqataqa pïmaypis respitamarqanmi.Imaypis kalpä mana ushakänanpaq kashqantami yarparqä.
21 “Rimaptïqa lapanpis kushishqami mayakamaq.Yätsishqätaqa lapanpis chaskikamaqmi.
22 Parlashqäta shumaq tantiyarmi pipis manakaqman churamaqtsu.
23 Usya tiempu tamyata shuyaraqnömi yachatsinäpaq shuyarpämaq.
24 Ali rikaptïqa paykunapis kushikäriqmi.Kushishqa kaykaqta rikamarqa shonqunpis atsikyarkuqmi.
25 Runakunawan juntakaykurmi mandaqninnöpis ali kawananpaq yätsirqä.Soldädukunapa nawpancho rey kaykaqnömi noqapis karqä.Waqapäkuptinpis shoqarqämi”.
