Job 39:1-30
39 “¿Qam musyankiku munti cabrakuna imay wachashqantapis?¿Rikashqankiku luychukuna wachaqta?
2 ¿Musyankiku tsarikushqanpita ayka killa wachashqanta?
3 Qochpaykashqancho wachariptinqa nanayninpis pasanmi.
4 Wawankunapis lushwaypa lushwar winarkurmi mamanta kacharir maypapis aywakärin.
5 “¿Pitaq chucaru bürruta libri purikunanpaq kamashqa?¿Pitaq tsayno kananpaq kamakätsishqa?
6 Noqami kamakätsishqä chunyaq jirkacho tänanpaq.Qewa mana kashqancho kawananpaqmi churashqä.
7 Tsay uywakuna markacho mana yachakaptinmi pipis mana cargakuntsu.
8 Pipis mana tashqanchömi loqyu qewata ashir jirkakunapa purin.
9 “¿Büfaluta* qam yügunkimantsuraq?¿Corralcho pununanpaq wichqankimantsuraq?
10 ¿Büfaluta yügurkur arutsinkimantsuraq?¿Chakraykicho arunanpaq qatinkimantsuraq?
11 ¿Kalpasapa kaptintsuraq büfaluman yärakunkiman?¿Arutsinaykipaq yügunkimantsuraq?
12 Tsay büfaluwan ¿tsaki mikuynikita ëraman ashtankimantsuraq?
13 “Älankunata *avestruz kushishqa tapsikushqanta tantiyakuy.Avestruzpa plümanpitapis mas kuyaylapaqmi kaykan *cigüeñapa plümankuna.
14 Avestruzqa runtuta alpalachömi mana oqlaypa kacharin.Tsaylachömi shanaylawan qoñurir pashtakun.
15 Manami yarpachakuntsu runa jarunanpaq kashqanta ni uywakuna jarunanpaq kashqantapis.
16 Chipshankunatapis manami cäsuntsu.Kikinpa wawan kaykaptinpis manami kuyapantsu.
17 Tsayno kaykan mana tantiyakuqta y yarpayniynaqta kamashqäpitami.
18 Tsayno karpis cörriyta qalaykurqa cawallun muntashqa aywaqtapis yalinmi.
19 “¿Qamku cawallutapis kalpata qonki?¿Qamku kunkancho aqtsantapis winatsishqanki?
20 ¿Qamku chuklustanöraq saltaykachätsinki?Wijijyashqanpis pasaypa mantsakuypaqmi.
21 Kalpanman yärakurmi pampatapis aspinraq.Mana mantsakuypami guërramanpis aywan.
22 Manami imatapis mantsakuntsu.Espädata rikashpanpis manami qeshpintsu.
23 Janancho flëchakuna shaqraraptinpis manami utukyantsu.Espäda y lanza chipchipyaykaqta rikarpis manami mantsantsu.
24 Tsaynöpis pasaypa rabyashqa karmi alpatapis aspinraq.*Cornëta waqamuptinqa juklami guërraman yaykun.
25 Pelyaman qayakuptinqa masraqmi wijijyan.Guërracho capitankuna qayaykachashqanta y bülla kashqanta karupita mayarmi pasaypa löcutan.
26 “Sur kaq läduman anka pärinanpaq ¿qamku yarpayta qoshqanki?
27 Manami qam mandaptikitsu ankapis pärin ni qaqacho qeshwantapis ruran.
28 Payqa altunnin qaqakunachömi tan.
29 Tsaypitami imatapis tsarinanpaq rikachakur mayjina karumanpis rikan.
30 Pushapankunapis tsaychömi yawarta upun.Wanushqa uywa kashqanchömi tsaykunaqa karkaykan”.
Ichic wilacuycuna
^ 39.9 Büfaluqa törunömi.
^ avestruz Avestruzqa cäsi kimsa metruyaqmi winan. Älayuq y jatun chankayuqmi kaykan. Itsanqa manami pärintsu (Lev. 11.16; Job 39.13; Isa. 34.13).
^ cigüeña Cigüeñaqa wachwa niraqmi kaykan. Itsanqa älanpis, chankanpis, kunkanpis y tupshinpis mas jatulanmi kaykan. Tsaynöpis shumaqmi pärin (Lev. 11.19; Deut. 14.18; Job 39.13; Sal. 104.17; Jer. 8.7; Zac. 5.9).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
