Job 7:1-21
7 “Musyashqantsinöpis runaqa nakarmi kay patsacho kawan.Arupakuq runanömi waran waran nakan.
2 Shanaycho arur ashmay runa lantukuyta munashqannömi kaykan.Tsaynöpis arupakuq runa pägunta shuyaraqnömi kaykan.
3 “Tsaynömi noqapis nakaycho killatsarkü killatsarkü.Tsakaykunapis nanaywan qochpaykälarmi wararkü.
4 Cämächo jitararpis kaynömi nï: ¿Imay höraraq patsapis waraykunqa?Wakman kayman tikrapakur qochpaptïpis patsa manami warantsu.Nakashqäpita yarpachakuykälarmi wararküpis.
5 “Cuerpüta chipyaq qeri ushaptinmi tishyayparaq kurukuna kaykan.Intëru cuerpüpitami esquylana yarquykan.
6 Kawaynïqa kaykan telarcho awaq runa lanzadërata pasatsiptin rasla pasaqnömi.Kawanäpaq kashqantapis mananami yarpänatsu.
7 “Tayta Dios, yarpaykulay jämaynöla kawaynï kashqanta.Mananami imaypis kushishqa kawashaqnatsu.
8 Wara warantinkuna wanuptï manami pipis rikamanqatsu.Rikamayta munaptikipis manami kashaqnatsu.
9 “Pukutay yurirkamur elqakäkushqannölami runapis wanur elqan.Pamparashqanpitaqa manami pipis sharkamunqanatsu.
10 Wanuqkunaqa imaypis manami wayinman kutinqanatsu.Watakuna pasaptin aylunkunapis qonqaykunnami.
11 Tsayno kaykaptinqa manami upälakushaqtsu.Pasaypa lakikur lapan yarpashqäkunatami parlashaq.
12 “Tayta Dios, ¿imanirtaq nakatsimänaykipaq imay hörapis tumapaykämanki?¿Lamarno kashqäta yarparku tsayno tumapaykämanki?¿Lamarcho mantsakuypaq uywa kashqätaku yarpaykanki?
13 Aybësis punur yarpachakü manana nakanäpaq kashqantami.Tsaynöpis yarpä punurqa lakikuytapis qonqanäpaq kashqantami.
14 Tsayno yarpaptïpis punuykaptï almawanmi nititsimanki.Mantsakuypaq kaqkunatami sueñupäkatsimanki.
15 Tsayno nakatsimänaykipa trukanqa alimi kanman jukla jurkaramaptiki.
16 ¡Manami kawaytapis munänatsu!¡Imapaqnataq kawashaqpis!Jämayno ushakaqla kaykaptïqa amana nakatsimaynatsu.*
17 “Runaqa ¿imanataq kaykan tsayjinanpa nakaykaqtapis kawatsinaykipaq?¿Imanirtaq runapaq pasaypa yarpachakunki?*
18 ¿Imanirtaq waran waran rikapaykanki?¿Imanirtaq cadala probaykanki?*
19 Noqataqa mana kachaypami cuidaraykämanki.Toqaynïta ultanalätapis manami kachapämankitsu.
20 “Lapan runakunata rikaykaq Tayta Dios, jutsata rurashqäpis manami imanäshunkipistsu.Kayjinanpa nakatsimaptiki manami awantänatsu.
21 Wanukunäpaqna kaykaptïqa ¿imanirtaq jutsa rurashqäkunata perdonamankitsu?Wanuptïqa perdonamänaykipaq ashimarpis manami tarimankipaqnatsu”.
