Joel 2:1-32
2 TAYTA DIOS juzganan junaq chayaykämunnami.udácho taqkuna, lapaniki mantsakushpayki siksikyapäkuy.Pïmaypis musyananpaq *sagrädu *Sión jirkancho *cornëtata tukapäkuy.
2 Tsay junaq patsa tsakakäkunqami.Yanawyayparaqmi pukutay tsapakurkunqa.Patsa waraptin puntakunapa inti mashtashqannömi tsaytsika soldädukuna shapäkamunqa.Tsaynöqa manami imaypis kashqatsu ni imaypis kanqatsu.
3 Imatapis tarishqan kaqta nina ushaqnömi lapantapis ushapäkunqa.Atacananpaq manaraq chayamuptin Edén huertanömi lapanpis kuyaylapaq kanqa.Pasarkuptin itsanqa chunyaqlana rikakunqa.Manami imapis tsay soldädukunapita qeshpinqatsu.
4 Guërra cawallukunanömi mantsariypaq kanqa.Cawalluta muntakurkur cörriq soldädukunanömi cörripäkunqa.
5 Guërra carrëtakuna elaqpita puntapa tumamur taqrarayla aywashqannömi paykunapis patatayla aywapäkushqan mayakanqa.Usya witsan muntita nina bunyaypa bunyar ushaqnömi qaparpanqa.Guërraman aywaq tsaytsika soldädukuna kamarikushqa aywashqannömi aywapäkunqa.*
6 Tsayta rikaykurmi runakuna pasaypa mantsakar cäranpis yoraqashqa rikakärinqa.
7 Atacaqkunaqa ali chölu karmi mana mantsakuypa cörrishpan marka murälla jananman witsäpäkunqa.Lapanmi maypapis mana jeqaykachaypa fïlaylanpa aywapäkunqa.
8 Mana tanqanakuypami lapanpis aywashqalanpa aywapäkunqa.Paykunata flëchaykaptinpis mana qeshpiypami yaykapäkunqa.
9 Markakunamanpis mana mantsakuypami yaykapäkunqa.Tapia jananpapis cörripäkunqami.Wayikunamanpis achpaypami witsäpäkunqa.Ventänapapis suwanömi yaykapäkunqa.
10 Kay patsapis pasaypami mantsakanqa.Jana patsapis siksikyanqami.Intipis y killapis tsakakäkunqami.Qoylarkunapis manami atsikyanqanatsu.*
11 Tsay atacaqkunapa puntantami TAYTA DIOS aywanqa.Atacananpaq mandaptin räyu pashtaqnöraqmi mayakanqa.Nishqanta ruraqkunaqa yupaytapis mana atipaypaqmi kanqa.Paykunaqa tsaytsikami aywapäkunqa.TAYTA DIOS juzganan junaq pasaypa mantsariypaqmi kanqa.Tsaytaqa manami pipis awantanqatsu.*
Jutsa ruraykunata kacharinanpaq nishqan
12 Tsaymi TAYTA DIOS kayno nin:“Lapan shonquykiwan perdonta manakamashpayki makïman kutipäkamuy.Jutsayuq kashqaykipita lakikur ayunashpayki waqapäkuy”.*
13 Jutsata rurashqaykipita lakikur röpaykita rachinaykipa trukanqa jutsaykikunata kachariy.Lapan shonquykiwan kuyashuqniki TAYTA DIOSNINTSI munashqanno kawapäkuy.Payqa kuyapäkuq y perdonakuqmi kaykan.Imapitapis juklaqa manami rabyakuntsu.*Perdonashushpaykiqa manami castigashunkinatsu.
14 Capazchari castigashunaykipa trukanqa bendiciontapis qoykushunkiman.Tsaynöpami TAYTA DIOSNINTSITA agradëcikur tsaki mikuy ofrendata y vïnutapis apapäkunkipaq.
15 *Sión jirkancho *cornëtata tukapäkuy.Lapayki wilanakäriy juntakaykur ayunapäkunaykipaq.
16 Purificakärinaykipaq lapayki juntakay.Awkinpis wamrapis lapayki aywapäkuy.Chuchuykaq wamrakunatapis apapäkuy.Tsayraq casarashqa kaykaqkunapis punukunaykipita yarqur ayunaq aywapäkuy.
17 TAYTA DIOSTA sirviq cürakuna, *altar kaqcho waqapäkuy.Tayta Diosta kayno nir manakäriy:“Kuyashqayki runakunata perdonaykulay, Tayta.Ama kachapaykulaytsu jäpa nación runakuna munayninman churapäkamänanta.Ama kachapaykulaytsu qamman mana yärakamuq runakuna asipämashpan kayno nipäkamänanta: ‘¿Maychötaq kaykan Diosnin?’ ”*
18 Tsayno manakuptintsiqa kuyapäkuq kashpanmi TAYTA DIOS perdonamäshunpaq.
19 Tsaymi kayno nimäshun:“Saksashqa kapäkunaykipaqmi trïgutapis, vïnutapis y aceititapis kamaripäshayki.Mana yärakamaqkuna makitsakushunaykita manami kachapäshaqtsu.
20 Norti kaq lädupita shamuqkunataqa chunyaq jirkamanmi qarqushaq.Puntanta aywaqkunatami *Kachi Lamarman qarpushaq.Qepanta aywaqkunatanami Mediterráneo Lamarman qarpushaq.Tsaychömi lapanpis ismushpan pasaypa asyanqa.Tsayno ruraptï espantaypaqmi kanqa.
21 “Israel runakuna, ama mantsakäriytsu.Yanapanäpaq kaykaptinqa kushikäriy.
22 Jirka uywakuna, ama mantsakäriytsu.Qewapis loqluyparaqmi winamunqa.Früta yörakunapis wayunqami.Hïguspis üvapis tsaytsikatami wayunqa.
23 Sióncho taqkuna, noqaman yärakamashpayki kushikäriy.Unaynömi punta kaq tamyata y qepa kaq tamyatapis tiempulancho tamyatsimushaq.
24 Tsaymi trïgutapis atskata shuntapäkunkipaq.Vïnupis aceitipis tsaytsikami kanqapaq.
25 “Kachamushqä chukluskuna wata wata ushashqanpitawanmi arushqaykiman bendicionnïta churamushaq.
26 Tsaymi mikuynikipis putsuy putsuy kanqa.Qamkunata yanapashpämi espantaypaq kaqkunata rurashaq.Tsaymi lapan shonquykiwan kushishqa alabapäkamankipaq.Manami imaypis yapay penqayman churashaykinatsu.
27 Tsaychömi tantiyapäkunkipaq qamkunawan kaykashqäta.Tsaynöpis tantiyapäkunkipaq TAYTA DIOSNIKI kashqäta.Noqapita masqa manami juk Dios kantsu.Kanan kaykashqaykinöqa manami penqaycho yapay kankipaqtsu”.*
Espíritu Santuta Tayta Dios kachamunanpaq nishqan
28 (3.1) “Tsaypitanami Espïritüta kachamushaq lapan runakunaman.*Tsaymi olqu tsurikikuna y warmi tsurikikunapis wilakuynïta wilakärinqa.Awkinkunatapis sueñuyninchömi musyatsishaq.Mözukunapis revelaciontami rikapäkunqa.
29 (3.2) Tsay junaqkunami olqumanpis y warmimanpis sirvimaqnïkunaman Espïritüta kachamushaq.
30 (3.3) Jana patsachöpis y kay patsachöpis rikakätsimushaq imaypis mana rikashqaykikunatami.Yawartapis, ninatapis y ichiraykaq qoshtaytapis rikapäkunkipaqmi.
31 (3.4) Intipis tsakakäkunqami.Killapis yawarmanmi tikranqa.*Tsaykuna kanqa juzganä junaq manaraq chayamuptinmi.Tsay junaqqa mantsariypaqmi kanqa.
32 (3.5) Tsayno kaptinpis noqata manakamaq kaqtaqa pïmaytapis salvashaqmi.*Promitishqänölami *Sión jirkancho kaykaq Jerusaléncho runakunata salvashaqpaq.Qayashqä kaqkunataqa lapantami salvashaq”.
Ichic wilacuycuna
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ sagrädu Liyinki santupita tantiyatsikuyta.
^ 2.4-5 Apoc. 9.7-9.
^ 2.10 Amós 8.9; Apoc. 8.12.
^ 2.11 Apoc. 6.17.
^ 2.12 Deut. 4.29; Jer. 29.13.
^ 2.13 Éxo. 34.6; Neh. 9.17; Sal. 86.15.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 2.17 Sal. 79.10; Miq. 7.10.
^ Kachi Lamar Kachi Lamarqa (Gén. 14.3; Núm. 34.3) chusku pachak ishkay kimsa (423) metru bajo el nivel del marmi kaykan. Anchunmi chunka pusaq kilömetru kaykan y largunnami pusaq chunka (80) kilömetru. Kachi Lamarmanqa Jordán mayumi yaykuykan. Maypapis yaku mana yarquptinmi tsay lamarqa pasaypa pochquq kaykan. Tsaymi ima jachapis ni ima pescädupis tsaycho kantsu. Kachi Lamarpa jukaq jutinmi kaykan Arabá Lamar (Deut. 3.17; Jos. 3.16) y jukaq jutinnami kaykan inti jeqamunan kaq lädu qocha (Eze. 47.18; Zac. 14.8). Kananqa runakuna reqipäkun Mar Muerto jutiwanmi.
^ 2.27 Isa. 42.8; 45.5-6, 18; Eze. 36.11.
^ 2.28-32 Hech. 2.17-21.
^ 2.32 Rom. 10.13.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
