Juan 3:1-36
3 Juk *fariseo runami karqan Nicodemo jutiyuq. Payqa Israel runakuna respitashqan runami karqan.
2 Tsakaylapa Jesús kaqman aywaykurmi kayno nirqan: “*Rabí, musyämi yachatsimänaykipaq Tayta Dios kachamushushqaykita. Tayta Dios mana yanapaptinqa manami pipis qam rurashqayki milagrukunata ruranmantsu”.
3 Tsaymi Jesús kayno nirqan: “Rasunpami kayno nï: Pipis yapay mana yurirqa manami Dios *mandaykashqanman yaykunqatsu”.
4 Tsayno niptinmi Nicodemo kayno tapurqan: “¡Imanöpataq awkisna kaykarqa yapay yurinman! ¿Mamanpa pachanman kutinmantsuraq yapay yurinanpaq?”
5 Niptinmi Jesús kayno nirqan: “Rasunpami kayno nï: Pipis yakuwan y Espíritu Santupa munayninwan* mana yurirqa manami Tayta Dios mandaykashqanman yaykunqatsu.
6 Mamanpita yuriqkunaqa runalami karkaykan. Espíritu Santupita yuriqkunami itsanqa Diospa wamranna karkaykan.
7 “Lapan runakunapis yapayraqmi yurinman* niptï ama mantsakaytsu.
8 Wayrämushqanta mayarpis manami musyankitsu maypita shamushqanta ni maypa aywashqantapis. Tsaynölami pipis mana tantiyantsu Espíritu Santupa munayninwan runakuna imano yurishqantapis”.*
9 Tsayno niptinmi Nicodemo kayno nirqan: “Nishqaykiqa ¡imanöpashi kanqa!”
10 Tsawraqa Jesús kayno nirqan: “Israel runakunapa yachatsiqnin kaykarpis ¿manaku tantiyanki?
11 Rasunpami kayno nï: Rikashqäta y musyashqätami wilapaykä. Tsayno kaptinpis nishqäta qamkuna manami criyipäkunkitsu.
12 Kay patsacho kaqkunapaq nishqäta mana criyiykarqa ¿imanöpataq criyipäkunkiman jana patsacho kaqkunapaq niptï?*
13 “Manami pipis gloriaman aywarkur kutimushqatsu. *Runapa Tsurinmi itsanqa gloriapita shamushqa kar rasun kaqta wilakun.
14 Chunyaq jirkacho broncipita fundishqa culebrata* qeruman Moisés joqarishqannömi Runapa Tsurintapis joqarinqa.* *
15 Tsaynöpami pipis payman yärakuq kaqqa *mana ushakaq kawayta tarinqa”.
Tsurinta Tayta Dios kachamushqan
16 Runakunata kuyashpanmi juklayla Tsurinta Tayta Dios kachamurqan. Tsaymi pipis payman yärakuq kaqqa mana ushakanqatsu,* sinöqa *mana ushakaq kawayta tarinqa.
17 Manami runakunata infiernuman qaykunanpaqtsu Tayta Dios Tsurinta kachamurqan, sinöqa payman yärakuptin salvananpaqmi.
18 Tayta Diospa Tsurinman yärakuqkunataqa manami infiernuman qaykunqatsu. Mana yärakuqkunatami itsanqa infiernuman qaykunqa. Tsayno kanqa Tayta Diospa juklayla Tsurinman mana yärakushqanpitami.
19 Kay patsaman atski shamushqa kaptinpis runakunaqa tsakäpakushqano kar y jutsa ruraycho kawarmi tsay atskita mana chaskikärintsu.
20 Lapanpis jutsalacho kawaqkunaqa Tayta Dios kachamushqan atskita chikir manami chaskikärintsu. Tsayno mana chaskikärintsu jutsata rurashqankuna musyakänanta mana munarmi.*
21 Alita ruraqkunami itsanqa Tayta Dios kachamushqan atskita chaskikärin. Tsayno chaskikuptinmi Tayta Dios munashqanno kawashqan musyakan.
Jesúspita Bautizaq Juan wilakushqan
22 Jerusalénpita yarqurnami Judea provinciacho juk läduman discïpulunkunawan Jesús aywarqan. Tsaychömi runakunata *bautizarqan.
23 Bautizaq Juannami Enón nishqan raqracho atska yaku kaptin tsaycho bautizaykarqan. Enón karqan Salim cercanchömi. Tsaycho bautizaykashqanta musyarmi wakin runakuna tsayman bautizakuq aywapäkurqan.
24 Tsay witsanqa Juan manaraqmi carcilcho wichqararqanraqtsu.*
25 Tsaychömi imano purificakunanpaq kashqanpita Juanpa discïpulunkuna Israel mayinkunawan rimanakurqan.
26 Tsaymi Juan kaqman aywaykur kayno nipäkurqan: “*Rabí, ¿yarpankiku Jordán tsimpancho kaykar juk runata rikaykur paypita wilapämashqaykita? Kananqa paypis bautizaptinmi lapan runakuna payman aywarkaykan”.
27 Tsayno niptinmi Juan kayno nirqan: “Payman runakuna aywarkaykan Tayta Dios yanapaptinmi.
28 Qamkunata nishqänöpis noqaqa manami Cristutsu kä,* sinöqa paypa puntanta wilakunäpaq Tayta Dios kachamashqan runalami kaykä.
29 Majatsakänanpaq* kaq mözulami parlakushqan jipashyuqqa. Majatsakaq mözu parlashqanta mayar amïgun kushikushqannölami noqapis kushikü.*
30 Mas alimi kaykan noqaman shamunanpa trukanqa paymanna aywapäkuptin.
Jana patsapita Jesús shamushqan
31 “Kay patsapita kaqkunaqa kay patsacho kaqkunalata musyarmi kay patsacho kaqkunalapita parlapäkun. Jana patsapita shamuq kaqmi itsanqa jana patsacho kaqkunata y kay patsacho kaqkunatapis musyan. Payqa lapanpitapis mas munayniyuqmi kaykan.
32 Jana patsacho rikashqankunata y mayashqankunata wilakuptinpis runakuna manami chaskikärintsu.
33 Chaskikuqkunami itsanqa tantiyapäkun Tayta Diospa wilakuynin rasunpa kashqanta.
34 Tsayno tantiyapäkun jana patsapita shamuq runa Tayta Dios nishqankunata parlaptinmi. Tsayno parlananpaqmi Espíritu Santuta Tayta Dios qorqan.
35 “Tsurinta kuyarmi Tayta Dios lapantapis paypa makinman churashqa.*
36 Tsaymi Diospa Tsurinman yärakuq kaqqa *mana ushakaq kawayta tarin. Tsurinman mana yärakuq kaqmi itsanqa tsay kawayta mana tarinqatsu. Tsaypa trukanqa Tayta Diosmi rabyashpan infiernuman qaykunqa”.
Ichic wilacuycuna
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 3.5 Eze. 36.25-27.
^ 3.3-7 1Ped. 1.3, 23.
^ 3.12 Tsayno nirqa Jesucristo kaynömi nirqan: “Yapay yurinaykipaq nishqäta mana criyiykarqa ¿imanöpataq criyipäkunkiman jana patsacho kaqkunapaq niptï?”
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 3.14 Runapa Tsurinta joqarinanpaq kashqanta nirqa cruzcho wanutsinanpaq kashqanta y jana patsaman kutinanpaq kashqantami Jesús nirqan.
^ 3.14b Juan 8.28; 12.32-34; 18.32.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 3.16 Ushakanqatsu nishqanqa infiernuman qaykushqatsu kanqa ninanmi (Mat. 10.28; Juan 10.28; Apoc. 20.14; 21.8).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 3.20 Job 24.13-17.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 3.24 Mat. 14.3; Mar. 6.17; Luc. 3.19-20.
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ 3.29a Wakin runakunaqa casarananpaq nipäkun.
^ 3.29b Kay textuchömi Bautizaq Juan casaraq mözupa amïgunman tinkutsikurqan. Jesucristutami mözuman tinkutsirqan. Jesucristuman aywaq runakunatanami parlakushqan jipashman tinkutsirqan.
^ 3.35 Mat. 11.27; Luc. 10.22.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
