Juan 5:1-47
5 Tsaypitanami Israel runakunapa juk fiestan Jerusaléncho kaptin Jesúspis tsayman aywarqan.
2 Jerusalén yaykunachömi Uysha Punku nishqancho jatunkaray estanqui kaykan. Hebreo idiömachömi tsay estanquipa jutin Betesda*. Nawpankunapami pitsqa alarkuna kaykan.
3 Tsay alarkunachömi jitarpaykarqan atska qeshyaqkuna, qaprakuna, weqrukuna y paralïticu runakuna. [Paykunami shuyarpaykarqan yaku kuyumuqta.
4 Tsaychömi jana patsapita *ángel elaqpita urarpamur yakuta kuyutsiq. Yakuta kuyutsiptinnami mayqan qeshyaqpis yakuman puntata yaykuq kaqqa aliyashqana yarqamuq.]
5 Tsaychömi juk runa kimsa chunka pusaq (38) watana qeshyar jitaraykarqan.
6 Tsay runa unaypitana qeshyashqanta musyarmi Jesús kayno tapurqan: “¿Aliyayta munankiku?”
7 Niptinmi nirqan: “Aw tayta, aliyayta munämi. Manami pïnïpis kantsu yakuta ángel kuyutsiptin estanquiman yaykatsimänanpaq. Yaykunäpaq kaykaptïpis jukmi yaliman”.
8 Tsayno niptinmi Jesús nirqan: “¡Sharkuy! Kirmaykita apakurkur aywakuy”.
9 Tsaymi jinan höra aliyarkur kirmanta apakurkur kushishqa aywakurqan. Tsay junaq jamay junaqmi karqan.
10 Tsay aliyashqa runata rikarmi Israel autoridäkuna kayno nipäkurqan: “Jamay junaq kaykaptinqa ¿imanirtaq kirmayki aparishqa puriykanki?”*
11 Tsawraqa kayno nirqan: “Aliyätsimaqnï runami nimashqa kirmäta apakurkur aywakunäpaq”.
12 Tsawraqa kayno tapupäkurqan: “¿Pitaq tsayno nishushqanki?”
13 Tapuptinpis estanqui kaqpita Jesús aywakushqana kaptinmi rikatsinanpaq mana tarirqannatsu.
14 Tsaypitanami templu patiucho tsay aliyätsishqan runawan tinkurkur Jesús kayno nirqan: “Aliyashqana kaykarqa jutsata ama ruraynatsu. Yapay jutsata ruraptikiqa mas peormi imapis pasashunkipaq”.
15 Tsaypitanami tsay runaqa Israel autoridäkunaman aywaykur Jesús aliyätsishqanta wilarqan.
Diospa Tsurin kashqanta Jesús nishqan
16 Jamay junaqcho aliyätsishqanpitami Israel autoridäkuna Jesúspa contran sharkur [wanutsinanpaq] ashipäkurqan.
17 Tsaypitanami paykunawan tinkur Jesús kayno nirqan: “Jamay junaq kaptinpis Taytä arunmi. Tsaynölami noqapis aruykä”.
18 Tsayno niptinmi Israel autoridäkuna Jesústa wanutsiyta munarqan. Manami jamay junaqcho runata aliyätsishqalanpitatsu wanutsiyta munarqan, sinöqa “Diosmi Taytä” niptin Dios tukuykashqanta yarpashpanmi.*
19 Tsawraqa Jesús kayno nirqan: “Rasunpami kayno nï: Tayta Diospa Tsurin kashpämi Taytä lapan rurashqanta noqapis ruraykä. Manami kikïpa yarpayniläpitatsu imatapis rurä, sinöqa Taytä rurashqanta rikashqalätami ruraykä.
20 Taytä kuyamashpanmi lapan rurashqantapis rikatsiman. Mas wakinkunata ruranäpaqpis tantiyatsimanqami. Tsayta rikar masraqmi espantakärinkipaq.
21 Tsayno espantakärinki wanushkunata Taytä kawayta qoshqanno noqapis munashqä kaqkunata kawayta qoptïmi.
22 “Tsaynöpis manami Taytätsu pitapis juzganqa, sinöqa noqatami Tsurin kaptï pïmaytapis juzganäpaq churamashqa.
23 Tsayno churamashqa kikinta adorashqanno noqatapis lapan runakuna adoramänanpaqmi. Tsaymi noqata mana adoramaq kaqqa Taytätapis mana adoraykantsu.
24 “Rasunpami kayno nï: Wilakuynïta wiyar kachamaqnï Taytäman yärakuqkunaqa mana ushakaq kawaytami taripäkushqa. Paykunaqa manami infiernuman qaykushqatsu kanqa, sinöqa wanushqano kashqanpita mushuq kawaytanami taripäkushqa.
25 “Rasunpami kayno nï: Tiempu chayamushqanami wanushqano kaqkuna Diospa Tsurin wilakushqanta mayananpaq. Wilakushqanta chaskikuqkunaqa mana ushakaq kawaytami taripäkunqa.
26 Tsayno kananpaqmi munayninta Tayta Dios Tsurinta qoshqa. Tsaymi runakunata kawayta qonanpaq Tayta Dios munayniyuq kashqanno Tsurinpis munayniyuq kaykan.
27 Tsaynölami *Runapa Tsurin kaptin runakunata juzgananpaqpis Tayta Dios munayninta qoshqa.
28 “ ‘¿Imanöraq tsay kanqa?’ nir ama yarpachakäriytsu. Tiempu chayamunqami lapan wanushkuna Diospa Tsurinpa vozninta mayananpaq.
29 Alita ruraqkunaqa kawarirkamur imayyaqpis kawanqami. Jutsata ruraqkunami itsanqa kawarimurpis infiernuman qaykushqa kanqa.*
30 Manami kikïpa munayniläpitatsu juzgashaq, sinöqa kachamaqnï [Taytä] munashqannömi juzgashaq.
Tayta Dios kachamushqanta Jesús tantiyatsishqan
31 “Tayta Dios kachamashqanta kikïpa yarpayniläpita niptïqa manami criyimankimantsu.
32 Manami noqalatsu musyaykätsï, sinöqa kikin Tayta Diosmi noqapita musyaykätsishunki. Pay musyatsishushqaykiqa lapanpis rasun kaqmi kaykan.
33 “Bautizaq Juanman tapukuq kachaptiki paypis noqapita rasun kaqtami wilashurqayki.*
34 Manami runa wilamaptinraqtsu Tayta Dios kachamashqanta musyä, sinöqa Taytä musyatsimaptinmi. Tsaymi noqapita Juan wilakushqanta yarpaykätsï Tayta Dios kachamashqanta criyishpayki salvakärinaykipaq.
35 Juanqa rataykaq mechërunömi karqan. Wilakushqanta mayarmi qamkunaqa juk rätula kushikurqayki.
36 “Tayta Dios kachamashqantaqa manami Juan wilakushqanta mayalartsu runakuna tantiyarkaykan, sinöqa milagru rurashqäkunata rikar y yachatsishqäkunata mayarmi tantiyarkaykan. Lapantapis ruraykä Taytä nimashqalantami.
37 Tsaynöpami kikin Tayta Dios mana parlapäshushpaykipis y mana yuripäshushpaykipis musyaykätsishunki noqata kachamashqanta.
38 Tsayno musyaykätsishuptikipis noqata mana chaskikamarqa Tayta Diospa palabrantapis manami chaskikurkaykankitsu.
Runakuna mana chaskikushqanpita Jesús parlashqan
39 “Qamkunaqa *mana ushakaq kawayta tarinaykipaq kashqanta yarparmi Tayta Diospa palabranta liyir yachakurkaykanki. Tsayno yachakurpis manami tantiyapäkunkitsu tsay qelqarashqankuna noqapita parlaykashqanta.*
40 Tsayno qelqaraykaptinpis manami chaskikärimankitsu. Chaskikamarqa mana ushakaq kawaytami taripäkunkipaq.
41 “Noqaqa manami qamkuna alabamänaykita munätsu.
42 Musyämi Tayta Diosta rasunpa mana kuyapäkushqaykita.
43 Taytäpa jutincho shamushqa kaykaptïpis chaskikamayta manami munapäkunkitsu. Kikinpa munaynilanpita shamuq runakunatami itsanqa chaskikurkaykanki.
44 Qamkunaqa runa mayilaykiwan ali kawapäkunaykipaqmi yarpachakurkaykanki. Manami Tayta Dioswan ali kawanaykipaqqa yarpachakärinkitsu. Tsayno kaykarqa ¿imanöpataq criyipäkamankiman?
45 “Ama yarpapäkuytsu Tayta Diospa nawpancho careanäpaq kashqanta. Moisésman yärakäriptiki paymi qamkunata careashunki.
46 Moisés qelqashqankunaqa noqapitami qelqaraykan. Tsaymi pay qelqashqankunaman criyirqa noqa nishqäkunatapis criyipäkunkiman.
47 Pay qelqashqankunaman mana criyirmi noqa nishqäkunatapis mana criyirkaykankitsu”.
Ichic wilacuycuna
^ 5.2 Wakin traduccionkunachöqa Betzata ninmi.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 5.10 Neh. 13.19; Jer. 17.21.
^ 5.18 Juan 10.30-38.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 5.33 Juan 1.19-27; 3.27-30.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 5.39 O Tayta Diospa palabrancho mana ushakaq kawayta tarinaykipaq kashqanta yarpaykarqa paypa palabranta yachakäriy. Paypa palabranqa noqapitami qelqaraykan.
