Jueces 19:1-30
19 Israel runakunacho rey manaraq kaptinmi Efraín jalqakunacho Leví trïbupita juk runa tarqan. Payqa wakin runakunapita karuchömi tarqan. Juk kutimi Judá particho kaykaq Belén markaman aywaykur tsaypita warmita aparqan *concubïna warmin kananpaq.
2 Taykashqanchömi tsay warmiqa runanta kachariykur papänin kaqpa Belénman kutikurqan. Papänin kaqchömi chusku killana tarqan.
3 Tsaymi runanqa ali shimilanpa parlapar kutitsimunanpaq aywarqan juk ashmayninta pushakurkur y ishkay bürrunta qatikurkur. Chayapäkuptinmi warminqa papäninpa wayinman chaskikurqan. Mashanta rikaykurmi suedrunpis kushikurqan.
4 Qoyäpänanpaq niptinmi suedrunpa wayincho mikushpan upushpan kimsa junaq qoyarqan.
5 Chusku kaq junaqnami tutala sharkurqan kutikunanpaq. Yarqukuykaptinna suedrunqa kayno nirqan: “Yarqanaykarqa aywakärinkimanraqtsu. Imalatapis mikurkushunraq”.
6 Tsawraqa jamaykur ishkan mikurqan upurqan. Tsaychömi suedrunqa nirqan tsay tsakaypis punupänanpaq.
7 Tsayno niptinmi aywakunanpaq kamarikushqa kaykarpis tsay tsakaypis tsaycho punurqan.
8 Pitsqa kaq junaqnami aywakunanpaq tsaka tsakala sharkurqan. Tsay junaqpis suedrun yapay kayno nirqan: “Mikur upur jamapärishun. Mas tardiraqmi aywakunkipaq”.
Tsaymi mikur upur jamarparqan.
9 Tsaypita concubïna warminta y ashmayninta pushakurkur aywakunanpaq kamarikuptinmi suedrunqa kayno nirqan: “Intipis jeqaykaptinnaqa yapay punukushun, tayta. Wara tutana tsaka tsakala aywakärinkipaq”.
10 Tsayno niykaptinmi Leví trïbu runaqa tsaycho punuyta mana munar concubïna warminta y ashmayninta pushakurkur y ishkay silla bürrunkunata qatikurkur aywakurqan. Tsayno aywakurmi Jerusalén nishqan Jebús marka tsimpanman chayarqan.
11 Jebús markaman tardina chayaykarmi ashmaynin kayno nirqan: “Jebuseo runakunapa markalanman patsakushun”.
12 Tsawraqa patronnin kayno nirqan: “Jäpa runakuna tashqanmanqa manami may markamanpis yaykushwantsu. Tsaypa trukanqa Gabaa markayaqraqmi chayashun.
13 Jukla aywashun Gabaacho karpis o Ramácho karpis patsakunantsipaq”.
14 Tsayno nishpan aywarmi inti jeqaykaptinna Benjamín trïbu runakuna tashqan Gabaa marka nawpanman chayarqan.
15 Tsaymi patsakunanpaq Gabaa markaman yaykurqan. Pipis mana patsatsiptinmi pläzalaman jamaykärirqan.
16 Patsa tsakaykaptinnami chakracho arushqanpita kutir juk awkin runa pasaykarqan. Tsay awkinqa Efraín jalqakunapita karpis tsay witsan Gabaa markachönami taykarqan. Gabaa markachöqa Benjamín trïbu runakunami tarqan.
17 Pläzacho jamaraykaq runata rikarmi awkinqa kayno nirqan: “¿Maypitataq shapäkamushqanki? ¿Maypataq aywarkaykanki?”
18 Tapuptinmi kayno nirqan: “Judácho kaykaq Belénman aywashqäpitami kutiykämü. Wayï kaykan Efraín karu jalqakunachöraqmi. Tsaymi wayïpa kutikuykä. Pipis mana patsatsimaptinmi kaylacho jamarpaykä.
19 Bürrükuna mikunanpaq qewatapis y gransatapis apaykämi. Kikïkuna mikunäpaqpis kaykanmi tantapis vïnupis. Manami imapis pishïmantsu”.
20 Niptinmi awkinqa kayno nirqan: “Imano kaptinpis manami kaychöqa warankimantsu. Wayïman aywakushun patsakunaykipaq. Imata munashqaykitapis kamaripäshaykimi”.
21 Tsayno nirmi awkinqa wayinman paykunata pushar bürrunkunatapis qewata qararqan. Tsaychömi qorpankunaqa chakinkunata maylakurir mikupäkurqan y upupäkurqan.
22 Kushishqa karkaykaptinmi tsay markacho taq fiyu runakuna wayiman juntapaykurqan. Nirkurmi punkuta fuertipa takakushpan awkinta kayno nirqan: “¡Wayikiman patsakamuq runata waqtaman qarqamuy! Tsay runata tsaripakuytami munapäkü”.
23 Niptinmi wayiyuq yarqurir kayno nirqan: “Wayïcho patsakushqa kaykaptinqa tsayta ama ruraykulaytsu, taytakuna. Tsayqa pasaypa penqakuypaq jutsami kaykan.
24 Munaptikiqa virginlaraq warmi tsurïta y qorpäpa concubïna warminta jorqapämushayki munashqaykita rurapäkunaykipaq. Kay runata itsanqa ama imatapis ruraykulaytsu”.
25 Tsay runakunaqa awkin imata niptinpis manami mayaq tukurqantsu. Tsaymi Leví trïbu runaqa concubïna warminta waqtaman qarqaparqan. Paytami runakuna warayta forsarkur patsa wararkuptinna kacharir aywakärirqan.
26 Kachariptinmi warmiqa runan patsaraykashqan wayi punkuman kutiykur wanurqan.
27 Aywakunanpaq punkuta tutala kicharmi runaqa concubïna warminta tarirqan kikin punku quiciunman makin churashqa jitaraykaqta.
28 Tsawraqa kayno nirqan: “Sharkuy. Aywakushunna”.
Tsayno niptinpis warminqa mana rimakurqannatsu. Tsawraqa wanushqata bürrunman cargakurkur wayinpa apakurqan.
29 Wayinman chayaykatsir kutsurqan chunka ishkay pedäzuman. Nirkur intëru Israel runakuna tashqan kaqpa cada trïbuman juk pedäzuta apatsirqan.
30 Tsayta rikaykur warmita runakuna forsaypa wanutsishqanta musyashpan lapanpis kayno nipäkurqan: “Egiptupita yarqamushqantsipita patsa manami imaypis mayashqantsitsu tsayno jutsata rurashqanta. Tsayno rurashqanpita imata ruranantsipaqpis shumaq yarpachakushun”.
Ichic wilacuycuna
^ concubïna Concubïnaqa manami runapa legïtimu warmintsu karqan. Concubïnanwanqa manami pakaylapatsu purikurqan, sinöqa warminwannömi tarqan (Jue. 8.31; 19.1-4; 2Sam. 5.13; 15.16; 16.21-22; 20.3; Est. 2.9).
