Lucas 13:1-35
13 Tsaychömi runakuna Jesústa wilapäkurqan kayno nir: “¡Galilea runakuna templucho sacrificiuta rupaykätsiptinshi soldädunkunata *Pilato kachashqa wanutsinanpaq!”
2 Tsawraqa Jesús kayno nirqan: “¿Wakin Galilea runakunapita tsay wanuq runakuna mas jutsayuq kashqantaku yarpapäkunki?
3 Noqa kaynömi nï: Manami jutsayuq kashqanpitatsu wanupäkushqa. Tsayno kaptinpis jutsa rurayta mana kacharirqa paykunanömi wanunkipaq.
4 Tsaynöpis Jerusaléncho Siloé törri juchur chunka pusaq runakunatami wanutsirqan. ¿Jerusaléncho taq marka mayinkunapita tsay wanuq runakuna mas jutsayuq kashqantaku yarpapäkunki?
5 Noqa kaynömi nï: Manami jutsayuq kashqanpitatsu wanupäkushqa. Tsayno kaptinpis jutsa rurayta mana kacharirqa paykunanömi wanunkipaq”.
Mana wayuq hïgusman Jesús tinkutsishqan
6 Hïgusman tinkutsirmi Jesús kayno nirqan: “Juk runapashi üva chakrancho hïgusninpis karqan. Tsayshi wayuyninta palaq aywar juklaylatapis mana tarirqantsu.
7 Tsayshi minkayninta kayno nirqan: ‘Kimsa watanami kay hïguspa wayuyninta palaq shamushqä y manami ni juklaylatapis tarishqätsu. ¡Jukla muturiy! Mana wayuykarqa ¡imapaqtaq chakrachöpis kanqa!’
8 “Tsayno niptinshi minkaynin kayno nirqan: ‘Juk wata mas shuyaykushun, tayta. Chulpata winaparkur shumaq uryashaq.
9 Tsayno ruraptïqa paqta wayunmanpis. Tsaycho mana wayuptinmi itsanqa muturinkipaq’ ”.*
Kurku warmita Jesús aliyätsishqan
10 Jamay junaqmi *sinagögacho Jesús yachaykätsirqan.
11 Tsaychömi kaykarqan *supay kurkuyätsishqan warmi. Payqa imanöpapis derechakayta mana puëdirmi chunka pusaq wata nakaykarqan.
12 Tsayno kaykaqta rikarmi Jesús qayaykur kayno nirqan: “Kananqa aliyashqanami kaykanki”.
13 Tsayno nir yataykuptinmi tsay warmi jinan höra derechakarkur Tayta Diosta alabarqan.
14 Jamay junaqcho Jesús aliyätsiptinmi sinagögacho mandaq runa rabyakur kayno nirqan: “Soqta junaqmi kaykan runakuna arunanpaqqa. Aliyashqa kayta munarqa tsay junaqkunacho shapäkamunkiman. ¡Imanirtaq jamay junaqchöraq shapäkamunki!”
15 Tsawraqa Jesús kayno nirqan: “¡Ishkay cära runakuna! Jamay junaq kaptinpis ¿manaku töruykita bürruykita paskarkur yaku uputsiq qatinki?
16 Kay warmiqa Abrahampita miraqmi kaykan. Chunka pusaq watami *Satanás nakatsishqa. Tsayno kaykaptinqa ¿manaku jamay junaqchöpis aliyätsïman?”
17 Tsayno niptinmi contrankuna pasaypa penqakärirqan. Wakin runakunami itsanqa Jesús espantaypaq ruraykashqanta rikar kushikärirqan.
Ñäpush muruman Jesús tinkutsishqan
Mateo 13.31-32; Marcos 4.30-32
18 Mastapis Jesús kayno nirqan: “Tayta Dios *mandaykashqanta ¿imamanraq tinkutsïman? ¿Ima tinkutsikuywanraq tantiyatsïman?
19 Tayta Dios mandaykashqanqa ñäpush muruta juk runa chakranman murushqannömi kaykan. Winamur jatunyaptinmi rämankunacho pishqukunapis qeshwankunata rurapäkun”.*
Levadüraman Jesús tinkutsishqan
Mateo 13.33
20 Nirkur kaynöpis nirqan: “Tayta Dios *mandaykashqanta ¿imamanraq tinkutsïman?
21 Tsayqa levadüranömi kaykan. Tantata rurananpaq ishkay arröbano harinaman levadürata winaptin mäsa shumaqmi jakan”.*
Kichki punkuman Jesús tinkutsishqan
Mateo 7.13-14, 21-23
22 Tsaypita Jerusalénpa Jesús aywarmi markakunapa y jalqakunapapis yachatsiraykar pasarqan.
23 Tsaychömi juk runa kayno nir tapurqan: “Tayta, ¿walkaqlaku salvakunqa?”
Tsaymi Jesús kayno nirqan:
24 “Imanöpapis kichki punkupa yaykapäkuy. Noqa kaynömi nï: Atskaqmi yaykuyta munanqa. Itsanqa manami kamäpakärinqatsu.
25 Wayipa duëñun punkunta wichqarkamuptinqa waqtacho quëdar kayno nirmi takakärinkipaq: ‘¡Tayta, punkuta kichapaykalämay!’ Tsawraqa pay kayno nishunkipaq: ‘Qamkunataqa manami reqïtsu. ¡Maypitaraq kakunkipis!’
26 Tsaymi kayno nipäkunkipaq: ‘Qamwanmi mikurqantsi y upurqantsi. Markäkunachöpis yachatsirqaykimi’.
27 Tsawraqa yapaymi kayno nishunkipaq: ‘Qamkunataqa manami reqïtsu. ¡Maypitaraq kakunkipis! ¡Jutsasapa runakuna, nawpäpita witikäriy!’
28 “Tsayno nishuptikimi fiyupa waqar kiruykikunatapis uchupäkunkipaq. Tsay hörami Abrahamta, Isaacta, Jacobta y profëtakunata rikapäkunkipaq Tayta Dios *mandaykashqancho karkaykaqta. Qamkunami itsanqa yaykuyta kamäpakärinkipaqtsu.
29 Maytsay nacionkunapitapis juntakaykurmi Tayta Dios mandaykashqancho mikupäkunqapaq.*
30 Tsay hörami qepa kaqkuna puntacho kanqa. Punta kaqkunanami qepacho kanqa”.
Jerusalén runakunapaq Jesús lakikur waqashqan
Mateo 23.37-39
31 Tsay junaqmi *fariseukuna chayaykur Jesústa kayno nipäkurqan: “¡Kaypita aywakuy! Herodesmi wanutsishunaykipaq juraykan”.
32 Tsawraqa Jesús kayno nirqan: “Tsay atuqta kayno nir wilapäkuy: ‘Juk ishkay junaqlanashi *supaykunata runakunapita qarqunqa y qeshyaqkunatapis aliyätsinqa. Warantinlanashi lapan rurananpaq kaqkunata ushanqa.
33 Imano kaptinpis kay junaqkunashi Jerusalénman aywanqa. Jerusalénpita juk läduchöqa profëtakuna manashi wanunmantsu’ ”.
34 Tsaypitami Jesús kayno nirqan: “¡Wawalaw, Jerusalén, Jerusalén! Qamqa Tayta Diospa profëtankunata nawpapita patsami wanuykätsinki.* Pay kachamushqan wilakuqkunatapis saqmaykankimi. Chipshankunata walpa oqlakuqno wawaykikunata* atska kuti shuntayta munaptïpis manami munashqankitsu.
35 Tsayno kashqaykipitami wayikikunapis templuykipis chunyaraykar quëdanqa. Noqa kaynömi nï: Manami yapay rikamankinatsu hasta kayno ninaykiyaq: ‘¡Tayta Diospa jutincho shamuq runa alabashqa kaykulätsun!’*”
Ichic wilacuycuna
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 13.9 Israel runakunata hïgus yöraman tinkutsirmi Jesús tsayno yachatsirqan.
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 13.19 Tsayno nirmi Jesús kayno nirqan: Takshala murulapita ñäpush jeqarkamur winashqannömi Tayta Diospa wilakuynin maytsaymanpis chayanqa.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 13.21 Tsayno nirmi Jesús nirqan: Ichikla levadüra mäsata jakatsishqannömi Tayta Dios mandaykashqanpis maytsaymanpis chayanqa.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 13.34 1Rey. 19.10; Jer. 2.30.
^ 13.34 Jerusalénpa wawankunaqa Jerusaléncho taq runakunami kaykan.
^ 13.35 Sal. 118.26.
