Lucas 18:1-43
18 Imaypis mana ajayaypa Tayta Diosta manakärinanpaq discïpulunkunata Jesús imamanpis tinkutsiypa yachatsirmi
2 kayno nirqan: “Juk markachöshi Tayta Diosta mana *mantsakuq ni runakunatapis mana respitaq juez karqan.
3 Tsay markachöshi tarqan juk viüda warmipis. Payshi tsay juezman yaparir yaparir aywar kayno nirqan: ‘Quejakushqäta arreglaykalämay, tayta juez’.
4 Tsayno aywaptinpis juezqa manashi cäsurqantsu. Nirkurnashi kayno nir yarpachakurqan: ‘Diosta mana mantsakurpis ni runakunata mana respitarpis
5 kay warmi quejakamashqanta jukla arreglaykushaq. Mana arreglaptïqa umäta nanätsirmi imay hörapis kutiykämunqa’ ”.
6 Tsayno wilaparkurmi Señor Jesucristo kayno nirqan: “Mana ali juez imata nishqantapis shumaq tantiyakäriy.
7 ¿Manatsuraq Tayta Diospis akrashqankunata yanapanqa paqasta junaqta manakurkaykaptinqa? Mana shuyarätsiylapami yanapanqa.
8 Noqa kaynömi nï: Manakuq kaqtaqa Tayta Dios mana shuyarätsiylapami yanapanqa. Tsayno kaptinpis *Runapa Tsurin kay patsaman kutimur ¿tarinqatsuraq pilapis Tayta Diosman yärakuykaqta?”
Fariseuman y impuestu cobraqman Jesús tinkutsishqan
9 Runa mayinta manakaqman churaq runakunapaqmi Jesús tinkutsiypa wilaparqan kayno nir:
10 “Ishkay runashi aywarqan templuman Diosta manakunanpaq. Jukaqshi karqan *fariseo y jukaqnashi karqan impuestu cobraq.
11 Tsayshi fariseuqa ichirkur Tayta Diosta manakurqan kayno nir: ‘Tayta Dios, qamta agradëcikü wakin runakunano mana kashqäpitami. Paykunaqa karkaykan suwa, jutsasapa y majanta jarukuqmi. Noqaqa manami taqay impuestu cobraq runanötsu kaykä.
12 Ayunäpis semänacho ishkay kutimi. Tsaynölami lapan gänashqäpita imaypis templuman diezmüta apä’.
13 “Impuestu cobraq kaqnashi itsanqa karulacho ichikuykur jana patsaman rikäriylapis rikärirqantsu. Tsaypa trukanqa pasaypa lakikurshi makinta choqpakurkur kayno nirqan: ‘Kuyapaykalämay, Tayta Dios. Noqaqa jutsasapa runami kaykä’.
14 “Noqa kaynömi nï: Impuestu cobraq runami jutsanpita perdonashqana wayinman kutirqan. Fariseo kaqtami itsanqa Tayta Dios mana perdonarqantsu. Orgullösu kaqkunaqa penqayman churashqami kanqa. Humildi kaqkunami itsanqa aliman churashqa kanqa”.
Wamrakunapaq Jesús manakushqan
Mateo 19.13-15; Marcos 10.13-16
15 Tsaypitanami wamrakunata Jesús kaqman apapäkurqan umankunata yataykur Tayta Diosta manakunanpaq. Tsayta rikarmi discïpulunkuna michäpäkurqan.
16 Tsawraqa wamrakunata qayaykur discïpulunkunata Jesús kayno nirqan: “Wamrakunata apakamunanta ama michäpäkuytsu. Wamrano kaqkunapaqmi Tayta Dios *mandaykashqan kaykan.
17 Rasunpami kayno nï: Pipis Tayta Dios mandaykashqanta wamrano mana chaskikurqa manami pay mandaykashqanman yaykunqatsu”.
Rïcu runa sasataraq salvakunanpaq kashqan
Mateo 19.16-30; Marcos 10.17-31
18 Juk mandaq runami Jesústa kayno nirqan: “*Rabí, ali runami kanki. ¿Imatataq ruräman *mana ushakaq kawayta tarinäpaq?”
19 Tsawraqa Jesús kayno nirqan: “¿Imanirtaq ali runa kashqäta nimanki? Tayta Dioslami aliqa.
20 Musyankimi mandamientukuna kayno nishqanta: ‘Majaykita ama jarukunkitsu.* Runa mayikita ama wanutsinkitsu.* Ama suwakunkitsu.* Manakaqtaqa pitapis ama tumpankitsu.* Mamaykita y taytaykita respitanki*’ ”.
21 Tsayno niptinmi tsay runa kayno nirqan: “Tsaykunataqa wamra kashqäpita patsami lapanta cumplishqä”.
22 Tsawraqa Jesús kayno nirqan: “Pishiykanraqmi cumplinaykipaq. Lapan imaykaykikunatapis rantikuykur tsay qellayta waktsakunata qoykuy. Tsayno ruraptikiqa jana patsachömi riquëzayki kanqa. Nirkur qatirämay”.
23 Tsayno niykuptinmi pasaypa rïcu kar tsay runa lakikurqan.
24 Lakishqa kaykaqta rikarmi Jesús kayno nirqan: “¡Pasaypa sasami kaykan rïcu runakuna Tayta Dios *mandaykashqanman yaykunanpaq!
25 Rïcu runa Tayta Dios mandaykashqanman yaykushqanpitaqa mas raslami *camëllupis awjapa uchkunpa ushturinman”.
26 Tsayno niqta mayaqkunami Jesústa tapupäkurqan: “Tsayno kaptinqa ¿piraq salvakunqa?”
27 Niptin Jesús kayno nirqan: “Runakunapaq sasa karpis Tayta Diospaqqa manami sasatsu”.
28 Tsawraqa Pedro kayno nirqan: “Noqakunaqa lapan imaykäkunatapis kachaykurmi qamta qatirpaykä, tayta”.
29 Tsayno niptin Jesús kayno nirqan: “Rasunpami kayno nï: Pipis wayinta, mamanta, taytanta, wawqinkunata, paninkunata, warminta o tsurinkunata Tayta Dios mandaykashqan rayku kacharirqa
30 kay vïdacho mas atskatami chaskinqa. Tsaynölami juk vïdachöpis mana ushakaq kawayta tarinqa”.
Wanutsipäkunanpaq kashqanta Jesús yapay wilakushqan
Mateo 20.17-19; Marcos 10.32-34
31 Chunka ishkay discïpulunkunata qayaykurmi Jesús kayno nirqan: “Jerusalénman chayanantsipaq walkalanami pishiykan. Tsaychömi profëtakuna qelqashqannöla *Runapa Tsurinta lapanpis pasanqa.
32 Mana Israel autoridäkunapa makinmanmi churapäkunqa. Paykunami asipanqa, ashlinqa y toqapanqa.
33 Astarkurmi wanutsipäkunqa. Tsayno kaptinpis kimsa junaqtaqa kawarimunqami”.
34 Tsayno niptin discïpulunkuna manami tantiyapäkurqantsu imapita parlaykashqantapis.
Jericó markacho qaprata aliyätsishqan
Mateo 20.29-34; Marcos 10.46-52
35 Tsaypita Jericó markaman Jesús yaykuykaptinnami juk qapra runa limushnata manakur nänicho jamaraykarqan.
36 Atska runakuna aywarkaykaqta mayashpanmi ima pasaykashqantapis tapukurqan.
37 Tsaymi wilapäkurqan kayno nir: “Nazaretpita kaq Jesúsmi pasaykan”.
38 Tsayno niptinmi qayakur kayno nirqan: “¡*Davidpa Tsurin* Jesús, kuyapaykalämay!”
39 Tsayno niptinmi puntanta aywaykaq runakuna olqüparqan upälakunanpaq. Olqüpaptinpis masraqmi qayakur kayno nirqan: “¡Davidpa Tsurin, kuyapaykalämay!”
40 Tsaymi Jesús ichiykur tsay qaprata qayatsirqan. Nawpanman chayaykatsiptinna kayno tapurqan:
41 “¿Imacho yanapanätataq munaykanki?”
Tsawraqa qapra kayno nirqan: “¡Nawïta aliyaykatsilämay, tayta!”
42 Niptinmi Jesús kayno nirqan: “¡Rikayna! Yärakamashqaykipitami nawiki rikanqa”.
43 Tsayno niptinmi jinan höra nawin aliyarkuptin Tayta Diosta alabaraykar Jesúspa qepanpa aywarqan. Tsayta rikaykurmi lapan runakuna Tayta Diosta alabapäkurqan.
Ichic wilacuycuna
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 18.20b Éxo. 20.13; Deut. 5.17.
^ 18.20e Éxo. 20.12; Deut. 5.16.
^ 18.20d Éxo. 20.16; Deut. 5.20.
^ 18.20c Éxo. 20.15; Deut. 5.19.
^ 18.20a Éxo. 20.14; Deut. 5.18.
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ Davidpa Tsurin Davidpa Tsurin nirqa Tayta Dios kachamushqan Cristupaqmi nirqan. Tsayno nipäkurqan rey Davidpa miraqninkunapita Cristo yurinanpaq Tayta Dios promitishqa kaptinmi (2Sam. 7.10-16; Sal. 89.1-4, 19-37; 132.11-12; Isa. 11.1-10). Jesucristo salvakuq Cristo kashqanta tantiyarmi Davidpa Tsurin kashqanta nipäkurqan (Mat. 9.27; 12.23; 21.9; 22.41-46).
^ 18.38 Tayta Dios kachamushqan Cristuta runakuna nirqan Davidpa Tsurin kashqantami. Tsayno nirqan rey Davidpita miraq imayyaqpis mandananpaq Tayta Dios promitishqa kaptinmi. Tsaypita masta musyanaykipaq liyinki 2Sam. 7.10-16; Sal. 89.1-4, 19-37; 132.11-12.
