Lucas 21:1-38
21 Tsaypitanami templucho Jesús rikarqan ofrenda winakunan babulman rïcu runakuna ofrendata winarkaykaqta.
2 Tsaynöpis rikarqan waktsa viüdata ishkay centävulata winaykaqta.
3 Tsaymi Jesús kayno nirqan: “Rasunpami kayno nï: Kay waktsa viüdaqa lapan runakunapita mas atskatami winashqa.
4 Wakinkunaqa putsuq qellaynilantami winashqa. Kay viüdami itsanqa tsaylawan rantipakunanpaq kaykaptinpis lapan qellayninta winashqa”.
Templuta juchutsinanpaq kashqanta Jesús wilashqan
Mateo 24.1-2; Marcos 13.1-2
5 Templu perqarashqan rumikuna kuyaylapaq kashqanta y templu shumaq adornashqa kashqanta parlapäkuptinmi Jesús kayno nirqan:
6 “Kay lapan rikarkaykashqaykita chipyaqmi juchutsipäkunqa. Manami ni juk rumilapis perqaranqanatsu”.
Manaraq kutimuptin imano kananpaq Jesús nishqan
Mateo 24.3-28; Marcos 13.3-23
7 Tsawraqa Jesústa tapupäkurqan kayno nir: “*Rabí, ¿imaytaq nishqaykino kanqa? Tsayno kananpaq ¿ima señaltaq kanqa?”
8 Tsawraqa Jesús kayno nirqan: “Paqta pipis lulapaykäshunkiman. Atskaqmi jutïcho shamunqa: ‘Noqami Cristo kä’ nir y ‘kay patsa ushakanqanami’ nir. Tsayno nishuptikipis ama chaskipankitsu.
9 Guërra kashqanta y wanutsinakuy kashqanta mayarpis ama mantsakäriytsu. Puntataqa tsaykunaraqmi kanqa. Tsayno kaptinpis kay patsaqa manaraqmi ushakanqaraqtsu”.
10 Mastapis Jesús kayno nirqan: “Juk nacionmi juk nacionwan guërrata ruranqa y juk marka runakunami juk marka runakunawan wanutsinakunqa.
11 Patsapis fiyupami kuyunqa. Muchuypis y pesti qeshyapis maytsaychömi kanqa. Jana patsachöpis mantsakuypaq señalkunami rikakämunqa.
12 “Tsaykuna manaraq kaptinmi qatikachäshushpayki prësu tsaripäkushunkipaq. *Sinagögakunaman apaykurmi juzgashushpayki carcilman wichqapäkushunkipaq. Noqaman yärakamashqaykipitami reykunamanpis y gobernadorkunamanpis prësu apapäkushunkipaq.
13 Tsaynöpami wilakuynïta paykunatapis wilapanki.
14 Tsaycho imata parlanaykipaqpis ama yarpachakärinkitsu.
15 Noqami tantiyatsishayki imata ninaykipaqpis. Tsaymi chikishuqnikikunapis ima niytapis mana kamäpakunqatsu.
16 “Qamkunapa contraykimi sharkapäkunqa mamaykikuna, taytaykikuna, wawqikikuna, ayluykikuna y reqinakushqaykikunapis. Wakinnikitaqa wanutsishunkipaqmi.
17 Noqaman yärakamashqaykipitami pïmaypis chikishunkipaq.
18 Tsayno kaptinpis Tayta Dios manami kachaykushunkipaqtsu. Manami juk aqtsalaykipis oqrakanqatsu.
19 Imano nakarpis noqaman yärakamashqaykipitami salvakärinkipaq.
20 “Soldädukuna Jerusalénta tumaparaykaqta rikarmi ushakänanpaqna kaykashqanta musyapäkunkipaq.
21 Tsayno kaykaqta rikar Judea markakunacho taqkuna jirkakunapa qeshpir aywakäritsun. Jerusaléncho taqkunapis qeshpikäritsun. Chakracho kaykaqkunapis markaman ama kutitsunnatsu.
22 Tsay junaqkuna fiyupa castïgu kaptinmi Tayta Diospa palabrancho qelqaraykashqankuna lapan cumplikanqa.
23 “¡Wawalaw, imanöraq nakanqa chichu warmikuna y iti wawayuqkuna! Maytsaychöpis Israel runakunata Tayta Dios castigaptinmi fiyupa nakapäkunqapaq.
24 Wakintami espädawan wanutsipäkunqa y wakin kaqtanami maytsay nacionkunaman prësu apapäkunqa. Tayta Diosta mana cäsukuq runakunami Jerusalénta munaynincho tsararanqa Tayta Dios nishqanyaq.
Jesucristo kay patsaman kutimunanpaq kashqan
Mateo 24.29-31; Marcos 13.24-27
25 “Intipis, killapis y qoylarkunapis mantsariypaqmi rikakunqa. Kay patsachönami lamar bunyaypa bunyar laqchikachaptin runakuna mantsakushpan ima ruraytapis mana kamäpakunqatsu.
26 Jana patsapis siksikyaptinmi imapis kay patsata pasananpaq kashqanta yarpar runakuna pasaypa mantsarishpan pitinqa.
27 Tsaypitanami runakuna rikapäkunqa *Runapa Tsurin pukutay janancho chipchipyaykar pasaypa munayniyuq aywaykämuqta.*
28 Tsay nishqänöla lapanpis qalaykuptin kalpatsakur kushikärinki. Tsaykunata rikarmi musyapäkunkipaq nakaykunapita Tayta Dios salvashunaykipaq kaykashqanta”.
29 Tsaynölami tinkutsiypa yachatsir Jesús kayno nirqan: “Hïgus yörata y wakin yöratapis rikar tantiyakäriy.
30 Raprankuna tsintsimushqanta rikarmi musyapäkunki usya tiempu qalaykunanpaqna kashqanta.
31 Tsaynölami nishqäno pasaykashqanta rikar musyapäkunki Tayta Dios *mandaykashqan cercachöna kashqanta.
32 Rasunpami kayno nï: Kanan tiempu runakuna manaraq ushakaptinmi lapan nishqäkuna cumplikanqa.
33 Jana patsa y kay patsa ushakaptinpis noqa nishqäkunaqa manami ushakanqatsu.
34 “Paqta tsay junaq elaqpita shamur qamkunata tarishunkiman jutsata ruraykaqta, shinkashqa kaykaqta y imaykayuqpis kanaykipaq yarpachakur chukru shonqu kaykaqta.
35 Elaqpita uywata trampa tsarishqannömi kay patsacho lapan runakunata tsay junaq elaqpita tsapunqa.
36 Tsayno kananpaq kaykaptinqa Tayta Diosta imaypis manakur kamarikushqala karkaykay. Tsaynöpami shamunanpaq kaq nakaykunapita qeshpir Runapa Tsurinpa nawpancho kushikärinkipaq”.
37 Junaqpami templucho Jesús yachatsiq y tsakaypanami Olivos jirkanman aywaq tsaycho patsakunanpaq.
38 Jesús yachatsishqanta mayananpaqmi tuta tutala lapan runakuna templuman aywapäkuq.
Ichic wilacuycuna
^ rabí Rabíqa Tayta Diospa palabranta yachaq y yachatsiq runami karqan. Jesucristo kawashqan witsanmi Tayta Diospa palabranta yachatsir markan markan rabíkuna puripäkurqan. Rabíkunawanmi wakin runakunapis yachakuyta munar puripäkurqan. Tsay runakunatami rabípa discïpulun kashqanta nipäkurqan. Jesucristupis rabími karqan (Juan 1.38; 3.2, 26; 4.31; 6.25).
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
