Marcos 2:1-28
2 Tsaypita juk ishkay junaqtanami Jesús kutirqan Capernaúmman. Tsaycho kaykashqanta musyaykurmi
2 kaykashqan wayiman juntapäkurqan. Wayi rurincho pasaypa kichki kaptinmi punkuchöpis runakuna juntarparqan. Tayta Diospa wilakuyninta Jesús wilapaykaptinmi
3 paralïticu runata chusku runakuna wintushqa chayatsirqan.
4 Tsaytsika runakuna kichkiraptinmi punkupa yaykatsiyta mana kamäpakärirqantsu. Tsaymi wayi jananman witsarkatsir qataraykashqanta kichariykur kirmantinta Jesúspa nawpanman urätsirqan.
5 Tsay runakuna payman yärakushqanta musyarmi qeshyaykaq runata Jesús kayno nirqan: “Hïju, lapan jutsaykipita perdonashqanami kaykanki”.
6 Tsayno niptinmi ley yachatsiqkuna yarpachakurqan kayno nir:
7 “¿Imanirtaq kay runa tsayno parlan? ¡Tsayno nirqa Dios tukuykanmi! Tayta Dioslami runakunapa jutsantaqa perdonan”.
8 Tsayno yarparkaykashqanta musyarmi Jesús kayno nirqan: “¿Imanirtaq tsayno yarparkaykanki?
9 ¿Mayqantaq mas sasa kaykan? ¿Runapa jutsankunata perdonayku? ¿O qeshyaqta aliyätsiyku?
10 *Runapa Tsurin kay patsacho munayniyuqmi kaykan runakunata perdonananpaq. Tsaytami kanan musyatsishayki”.
Nirkurmi paralïticu runata kayno nirqan:
11 “¡Sharkuy! Kirmaykita apakurkur wayikipa aywakuy”.
12 Tsayno niptinmi jinan höra sharkurkur kirmanta apakurkur aliyashqana aywakurqan. Tsayta rikaykurmi runakuna kushikushpan Tayta Diosta alabapäkurqan kayno nir: “¡Kay runa aliyätsishqantanöqa manami imaypis rikashqantsitsu!”
Discïpulun kananpaq Levíta Jesús qayashqan
Mateo 9.9-13; Lucas 5.27-32
13 Tsaypitanami Galilea qocha kuchunman Jesús kutirqan. Pay kaykashqan kaqman atska runakuna juntakaptinmi yachatsirqan.
14 Tsaypita aywakurmi Alfeupa tsurin Leví* impuestuta cobrar jamaraykaqta Jesús rikarqan. Tsawraqa kayno nirqan: “Qatirämay”.
Tsayno niptinmi Jesúswan Leví aywakurqan.
15 Tsaypitanami Jesústa Leví qayatsirqan wayincho mikunanpaq. Tsaychömi impuestu cobraq runakuna y jutsasapa runakunapis Jesúswan y discïpulunkunawan mikupäkurqan. (Jesústaqa atskaq impuestu cobraq runakuna y jutsasapa runakunapis qatirparqan.)
16 Tsayta rikaykurmi ley yachatsiq *fariseukuna Jesúspa discïpulunkunata kayno nipäkurqan: “¿Imanirtaq impuestu cobraqkunawan y jutsasapa runakunawan Jesús mikuykan?”
17 Tsayno nishqanta mayaykurmi Jesús kayno nirqan: “Sänu kaqkunaqa manami jampikuqta munantsu, sinöqa qeshyaqkunalami. Noqa manami jutsaynaq runakunamantsu shamushqä, sinöqa jutsasapa runakunamanmi”.
Yachatsikuynin mushuq kashqanta Jesús tantiyatsishqan
Mateo 9.14-17; Lucas 5.33-39
18 Juk kutichömi Juanpa discïpulunkuna y *fariseukunapis ayunarkaykarqan. Tsawraqa runakuna Jesústa tapurqan kayno nir: “Juanpa discïpulunkuna y fariseukunapa discïpulunkunaqa imaypis ayunapäkunmi. Qampa discïpuluykikunaqa ¿imanirtaq mana ayunapäkuntsu?”
19 Tsayno tapuptinmi Jesús kayno nirqan: “Casaraq mözu kaykaptinqa casaray fiestaman qayatsishqan runakuna ¿ayunanmantsuraq?
20 Casaraq mözuta wanutsiptinmi itsanqa ayunapäkunqapaq”.
21 “Manami pipis makwa röpata mushuq ratashwan shilpantsu. Mushuq ratashqa qentir makwa röpata masmi rachikätsin.
22 Tsaynöpis manami pipis tsayraq rurashqa vïnuta makwa urpuman winantsu. Winaptinqa vïnu poqur pakiriykunqami. Tsawraqa vïnupis jichanqami y urpupis ushakanqami. Tsaymi tsayraq rurashqa vïnuta sänu urpuman winantsi”.*
Jamay junaqpaq Jesús munayniyuq kashqan
Mateo 12.1-8; Lucas 6.1-5
23 Jamay junaqchömi discïpulunkunawan Jesús pasarkaykarqan trïgu poquraykaq chakrakunapa. Tsaypa pasarmi discïpulunkuna trïguta palarkur uchupäkurqan.*
24 Tsawraqa *fariseukuna kayno nipäkurqan: “Rikay. ¿Imanirtaq jamay junaq kaykaptin leynintsita mana cäsukur discïpuluykikuna trïguta palarkaykan?”
25 Tsaymi Jesús nirqan: “¿Manaku imaypis liyipäkushqanki David yanapaqninkunawan mikanar imata rurashqantapis?
26 Mas mandaq cüra Abiatar kaykashqan witsanshi Tayta Diospa wayinman yaykuykur Diospaq churaraykaq tantata David mikurqan. Tsaynölashi yanapaqninkunatapis qararqan.* Tsay tantaqa manami David ni paywan kaykaq runakuna mikunanpaqtsu karqan, sinöqa cürakunala mikupäkunanpaqmi”.*
27 Nirkur Jesús kayno nirqan: “Manami jamay junaq raykutsu runata Tayta Dios kamarqan, sinöqa runakuna raykumi jamay junaqta kamarqan.
28 Tsayno kaptinqa *Runapa Tsurin jamay junaqpaqpis munayniyuqmi kaykan”.
Ichic wilacuycuna
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 2.14 Levípa jukaq jutinmi karqan Mateo.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 2.22 Makwa röpata y makwa urputa Jesucristo tinkutsirqan runakunapa unay costumbrinkunamanmi. Mushuq ratashta y tsayraq rurashqa vïnutanami Jesucristo tinkutsirqan kikinpa yachatsikuyninman. Tsayno tinkutsirmi Jesucristo nirqan paypa yachatsikuynin mushuq kar unay costumbrinkunaman mana tinkushqanta.
^ 2.23 Deut. 23.25.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 2.26a 1Sam. 21.1-6.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
