Marcos 5:1-43
5 Qochata tsimparkurnami Gerasa* nishqan partiman discïpulunkunawan Jesús chayarqan.
2 *Büquipita Jesús urarpuptinmi *supaykuna löcuyätsishqan runa panteonpita yarqamurqan.
3 Tsay runaqa panteonlachömi imaypis täkuq. Cadinawan watarpis manami watarätsiyta kamäpakuqtsu.
4 Chakipita makipita wataptinpis cadinata rachirmi ushariq. Tsaymi pipis ima ruraytapis mana kamäpakuqtsu.
5 Tsay runaqa paqaspapis junaqpapis panteoncho y jirkakunachömi qaparaykar rumikunawan takakuraykar purikuq.
6 Paymi Jesústa rikärishpan warakayla aywaykur nawpanman qonqurpakuykur
7 fuertipa kayno nirqan: “¡Munayniyuq Diospa Tsurin Jesús! ¡Imatataq noqawan munanki! Diospa jutinchömi ruwakü mana nakatsimänaykipaq”.
8 Tsayno nirqan “¡supay, kay runapita yarquy!” Jesús nishqa kaptinmi.
9 Tsaypitami Jesús kayno tapurqan: “¿Imataq jutiki?”
Tsawraqa kayno nirqan: “Noqapa jutïqa Legiónmi.* Noqakunaqa atskaqmi karkaykä”.
10 Tsayno nirkushpanmi supaykuna pasaypa ruwakurqan karuman mana qarqunanpaq.
11 Washa lädu jirkanchömi tsaytsika kuchikunata mitsirkaykarqan.
12 Tsawraqa supaykuna Jesústa ruwakärirqan kayno nir: “Kuchikunalaman yaykunäpaq kachapaykalämay”.
13 Ruwakushqanta Jesús awniptinmi runapita yarqurir tsay kuchikunaman supaykuna yaykukuykurqan. Tsay kuchikunaqa ishkay waranqanömi (2,000) karqan. Tsaymi kuchikuna tunapa cörrir qochaman jeqashpan shenqaypa wanupäkurqan.
14 Tsayta rikaykurmi kuchi mitsiqkuna warakayla aywapäkurqan markacho y cercancho taq runakunata wilapäkunanpaq. Wilaptinmi runakuna aywapäkurqan ima pasashqantapis rikapäkunanpaq.
15 Jesús kaqman chayashpanmi tsay löcuyashqa runata taripäkurqan röpan jatishqana y yarpayninchöna jamaraykaqta. Tsayta rikaykurmi mantsakashqa rikakärirqan.
16 Jesús aliyätsishqanta rikaqkunami wilapäkurqan tsay runa imano aliyashqanta y kuchikuna shenqaypa wanushqanta.
17 Tsaymi runakuna Jesústa ruwakärirqan tsaypita aywakunanpaq.
18 *Büquiman Jesús witsarkuptinmi aliyaq runa Jesústa ruwakurqan paywan aywakunanpaq.
19 Ruwakuptinpis mana awnishpanmi Jesús kayno nirqan: “Wayikipa kutiykur ayluykikunata wilapay Tayta Dios kuyapäshushpayki aliyätsishushqaykita”.
20 Tsayno niptinmi aywar jinan Decápolis provinciacho wilakurqan Jesús aliyätsishqanta. Tsayno wilakuptinmi mayaqkuna kushikärirqan.
Jairupa tsurinta kawaritsimushqan y warmita aliyätsishqan
Mateo 9.18-26; Lucas 8.40-56
21 Tsaypitanami qocha wak tsimpanman *büquiwan Jesús yapay kutirqan. Qocha kuchuncho kaykaptinmi atska runakuna juntaparqan.
22 Tsaymanmi chayarqan *sinagögacho mandaq Jairo jutiyuq runa. Paymi Jesúspa nawpanman qonqurpakuykur
23 ruwakurqan kayno nir: “Warmi tsurïmi wanuykanna. Aywaykuläshun, tayta. Yataykuptikiqa aliyanqami”.
24 Tsayno ruwakuptinmi Jairuwan Jesús aywarqan. Aywaptinmi tsaytsika runakuna kichkiyparaq qatirparqan.
25 Tsay runakunawanmi chunka ishkay watana yawar apaywan qeshyaykaq warmipis aywaykarqan.
26 Tsay qeshyawan pasaypa nakarmi mëdicukunata pägananpaq imaykantapis rantikur usharqan. Imaykawan jampiptinpis mas peormi antsarqan.
27 Jesús munayniyuq kashqanta musyarmi atska runakuna kaykaptinpis tsay warmi qepalanpa yaykuykur Jesúspa röpanta yataykurqan.
28 Tsayno rurarqan kayno yarparmi: “Jesúspa röpalantapis yataykurqa aliyäshaqmi”.
29 Yataykuptinmi jinan höra yawar apaynin chawarqan. Tsaymi tantiyarqan aliyashqana kaykashqanta.
30 Munayninwan pipis aliyashqanta musyarmi tikraykur Jesús kayno nirqan: “¿Pitaq röpäta yataykamashqa?”
31 Tsaymi discïpulunkuna kayno nirqan: “Tayta, kayno kichki aywaykarqa ¿imanöparaq musyapäküman mayqan yataykushushqaykitapis?”
32 Tsayno niptinpis Jesús wakpa kaypami rikachakurqan pï yataykushqantapis musyananpaq.
33 Tsawraqa tsay warmi mantsakashqa siksikyaykar Jesúspa nawpanman qonqurpakuykurqan. Nirkurmi wilarqan röpanta yataykur aliyashqanta.
34 Tsawraqa Jesús kayno nirqan: “Yärakamashqaykipitami aliyashqanki, hïja. Kananqa kushishqana aywakuy”.
35 Jesús tsayno parlaykaptinraqmi Jairupa wayinpita wilakuq taripaykur Jairuta kayno nirqan: “Tayta, tsuriki wanushqanami. Jesústa amana pushaynatsu”.
36 Tsayno niqta mayaykurmi Jesús kayno nirqan: “Ama lakikuytsu. Tayta Diosman yärakuy”.
37 Tsayno nirkushpanmi Pedruta, Santiaguta y Santiagupa wawqin Juanta pushakurkur Jairupa wayinman Jesús aywarqan. Wakin aywanantaqa manami munarqantsu.
38 Chayaykurnami tarirqan runakuna fiyupa lakikushpan waqarkaykaqta.
39 Tsaymi Jesús yaykurir kayno nirqan: “¿Imanirtaq tsayjinanpa waqarkaykanki? Wamraqa manami wanushqatsu, sinöqa punuykanlami”.
40 Tsayno niptinmi runakuna asiparqan. Tsaypitanami lapan runakunata waqtaman qarqurir Jairuta warmintinta y paywan kaykaq discïpulunkunata pusharkur wamra tsutaraykashqanman Jesús yaykurqan.
41 Tsaychömi makipita aptarkur wamrata kayno nirqan: “Talita, cumi”.
Tsay nishqanqa “wamra, sharkuy” ninanmi.
42 Tsaymi jinan höra kawarirkamur purirqanna. Payqa karqan chunka ishkay watayuqmi. Kawarimushqanta rikaykurmi runakuna pasaypa kushikärirqan.
43 Tsayno kushikuptinpis Jesús nirqan aliyätsishqanta pitapis mana wilapänanpaqmi. Nirkurnami wamrata mikuyta qarananpaq nirqan.
Ichic wilacuycuna
^ 5.1 Wakin griego copiakunachöqa Gadara ninmi. Wakinnami Gergesa nipäkun.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 5:9 Legión ninanqa atska waranqa ninanmi.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
