Miqueas 2:1-13
2 ¡Wawalaw! Qamkunaqa punurpis yarpachakurkaykanki lutanta ruranalaykipaqmi.Munashqaykita rurapäkunaykipaq munayniyuq kashpaykimi patsa wararkuptinqa yarpapäkushqaykino lutankunata rurarkaykanki.
2 Tsaymi jukpa chakrankunata acapararkaykanki.Runa mayikipa wayintapis qechurkaykanki.Tsayno rurarmi warmintinta tsurintinta nakarkaykätsinki.Posisionnintapis mana kuyapaypami qechurkaykanki.
3 Tsayno kapäkuptikimi TAYTA DIOS kayno nin:“Noqapis yarpachakuykänami qamkunata castiganäpaq.Makïpita manami imanöpapis qeshpipäkunkipaqtsu.Fiyupa nakatsiptï orgullösu kashqaykipis manakaqlapaqmi kanqapaq.
4 Vincishuqnikikunami kushipäshushpayki cantapar kayno nipäkushunkipaq:‘Benëchu pasaypa ushakashqanami karkaykanki.Diosnikimi chakraykikunata noqakunatana qoykamashqa.Qamkunata vincirkurmi qechupäkushqä.Chakraykikunaqa noqakunapanami kaykan’.Tsayno nirmi wiyatsipäshushpayki cantapäshunkipaq”.
5 Tsaynöpami TAYTA DIOS qomashqantsi nacioncho qamkunataqa pipis posisionta mana aypushunkipaqnatsu.
6 Tayta Dios tsayno castigananpaq kashqanta wilakuptïmi runakuna kayno nirkaykäman:“Qam nimashqaykinöqa manami imaypis pasapäkamanqatsu.*
7 Jacobpita miraqkuna kaptï TAYTA DIOS manami noqakunapita rabyakuntsu.Castigamänanpaq kashqanta wilakuptikipis payqa manami castigamanqatsu.Ali runakuna kaptïmi payqa imaypis yanapamanqa”.
8 Tsayno niqkunapaqmi Tayta Dios kayno nin:“Qamkunaqa kuyashqä runakuna kaykarpis conträmi sharkurkaykanki.Guërrapita wayinkunaman jawkala kutiq runakunapa röpantapis qechurkaykankimi.
9 Kuyaylapaq wayinta qechunayki kashqami warmikunata qarqurkaykanki.Tsaynölami wawankunapa herenciantapis qechurkaykanki.
10 “¡Qamkunata manami rikaytapis munätsu!¡Kaypita jukla aywakäriy!Kay nacionchöqa manami qamkuna tankipaqnatsu.Qamkunami jutsayuq karkaykanki kay nacioncho jutsa ruraykuna kananpaq.Tsaymi pasaypa ushakankipaq.
11 Wakinkunaqa lulakärishpan kaynömi nipäkun:‘Tayta Diosmi bendicionta churamunqa vïnupis y ima shinkatsikuqpis atska kananpaq’.Tsayno nir wilakuptinmi profëtayki kananpaq kushishqa chaskiparkaykanki”.
Kuyashqan runakunata Tayta Dios salvananpaq nishqan
12 “Jacobpita miraq runakuna,kawaykar quëdaqkunataqa uyshakunata juk patsaman shuntaqnömi nacionnikiman yapay shuntamushaykipaq.Shuntamuptïmi walkala karpis atskano büllata rurar kushikärinkipaq.
13 Juk lädu nacioncho karkaykashqaykipita kikïmi nacionnikiman pushamushaykipaq.Marka punkupa yarqapäkuptikipis manami pipis tsapäshunkipaqtsu.Mandaqniki rey karmi nawpaykita kikï aywashaqpaq”.
Ichic wilacuycuna
^ 2.6 Isa. 30.10.
