Miqueas 3:1-12
3 Tsaypitami noqa kayno nirqä:¡Jacobpita miraq runakunapa autoridäninkuna!¡Israel runakunapa mandaqninkuna!¡Shumaq mayapäkamay!¿Manaku tantiyapäkunki ali kaqta ruranaykipaq kashqanta?
2 Qamkunaqa alita ruranaykipa trukan mana alikunatami rurarkaykanki.Tsaymi runa mayikipa qaranta lushtiqno y tulunpita aytsanta shipliqno karkaykanki.
3 Tayta Dios kuyashqan runakunata mikuqnömi karkaykanki.Qaranta leqparir tulunta pakiqnömi karkaykanki.Caldunaykipaq aytsanta kutsuqnömi munashqaykita rurarkaykätsinki.
4 Tsayno kapäkushqaykipitami manakäriptikipis Tayta Dios mana yanapashunkitsu.Rabyanätsir jutsata rurapäkushqaykipita rikaytapis manami munashunkitsu.
Lula profëtakunata castigananpaq nishqan
5 Lula profëtakunami TAYTA DIOS kuyashqan runakunata lulaparkaykan.Paykunaqa imatapis qoykuq kaq runapaqqa bendición kananpaq kashqantami nipäkun.Imatapis mana qoykuq kaq runapaqmi itsanqa maldición kananpaq kashqanta nipäkun.Tsay lula profëtakunatami TAYTA DIOS kayno nin:
6 “Qamkunataqa imata ruranäpaq kaqtapis manami musyatsishaykinatsu.Imano kananpaq kaqtapis manami wilapäshaykinatsu.Tsaymi tsakäpakushqano kar imata wilakärinaykipaq kaqtapis mana musyankipaqnatsu”.
7 Tsay lula profëtakunaqa pasaypa penqaypaqmi kanqapaq.Tayta Dios mana tantiyatsiptinmi imata wilakärinanpaqpis shimin mana tarinqatsu.
8 Noqatami itsanqa TAYTA DIOSPA Espïritun yanapaykäman pay munashqanno wilakunäpaq.Tsaymi valornï kan Israel runakuna mana cäsukuq kashqanta y jutsayuq kashqanta mana mantsakuypa wilakunäpaq.
Jerusalén marka ushakänanpaq nishqan
9 ¡Jacobpita miraq runakunapa autoridäninkuna!¡Israel runakunapa mandaqninkuna!¡Shumaq mayapäkamay!¿Imanirtaq demandakamuptin shumaq mana arreglapäkunkitsu?¿Imanirtaq leykunatapis mana cumplipäkunkitsu?*
10 Tsayno kapäkuptikimi Jerusalénchöqa mana ali ruraykunala y wanutsinakuyla kaykan.
11 Autoridäkunapis sobornuta apaq kaqpami favornin sharkurkaykan.Cürakunapis qellaypaq kashqalami yachatsipäkun.Profëtakunapis qellaypaq kashqalami wilakurkaykan.Tsayno kaykarpis kaynömi nipäkun: “Tayta Dios yanapaykämantsimi.Manami ima desgraciapis pasamäshuntsu”.
12 Tsayno qamkuna kashqaykipitami Sión jirkan* barbichashqa chakrano quëdanqapaq.Jerusalén markata ushakätsiptin raqälanami quëdanqapaq.Templuta juchutsipäkuptin jachakunalanami tsaycho winanqapaq.*
