Miqueas 5:1-15
5 (4.14) Jerusalén runakuna, contraykikunata ichipänaykipaq kamarikäriy.Qamkunata atacashunaykipaq jäpa runakunami chayamunqa.Paykunami vincishushpayki mandaqniki reyta qaqlancho fiyupa wirupäkunqapaq.
2 (1) Belén Efrata marka, Judácho kaq wakin markakunapita mas takshala kaptikipis qamchömi Israel runakunapa mandaqnin rey yurinqa.*Payqa unaypita patsami kaykan.
3 (2) Wamrata warmi wachashqanyaqlami contrankunapa makincho Israel runakunata Tayta Dios kachaykunqa.Wamra yuriykuptinnami Israel runakuna mashtakashqa kaykashqanpita kutipäkamunqa.
4 (3) Tsay wamra winarkurnami TAYTA DIOS yanapaptin uysha mitsiqno kuyashqan runakunata shumaq rikanqa.Maytsaychöpis runakuna payta adoraptinmi Israel runakuna pitapis mana mantsakuypa jawka kawapäkunqa.
5 (4) Paymi salvamäshun jawka kawanantsipaq.Tsay witsan Asiria runakuna markantsita atacar palaciuntsikunaman yaykamuptinpis ichipänanpaq atska capitankunatami kachashun.
6 (5) Tsay capitankunami espädankunawan Asiria runakunata vincirkur munayninman churapäkunqa.Tsaynöpami Nimrodpa* markanpita salvamäshunpaq.
Contrankunata Israel runakuna vincinanpaq nishqan
7 (6) Jacobpita miraqkunata wakinta wanutsiptinpis kawaykar quëdaqkunataqa maytsay markakunachöpis respitapäkunqami.Shulyapis y tamyapis TAYTA DIOSPA bendicionnin kashqannömi paykunapis lapan marka runakunapaq bendición kanqapaq.
8 (7) Mayqan markapis contran sharkur atacaptinqa munti uywakunata león atacaqnöraqmi Israel runakuna atacanqapaq.Manta león uyshakuna kaykashqanman yaykur wanutsir ushashqannömi paykunapis contrankunata wanutsir ushapäkunqapaq.Kawaykaqtaqa manami juklaylatapis kachaykunqatsu.
9 (8) TAYTA DIOS, tsaynöpami Israel runakunapa lapan contrankunata ushakätsinkipaq.
10 (9) Tsay contran runakunatami TAYTA DIOS kayno nin:“Tsay junaqmi cawalluykikunatapis chipyaq wanutsishaq.Guërra carrëtaykitapis lapantami ushakätsishaq.
11 (10) Markaykikunatapis y amparakunaykipaq sharkatsishqayki jatun wayikunatapis lapantami juchutsir ushakätsishaq.
12 (11) “Brüjukunatapis lapantami ushakätsishaq.Rikakuqkunapis qamkunacho manami kanqanatsu.
13 (12) Adorapäkushqayki ïdulukunatapis y wankakunatapis ushakätsiptï kikiki rurashqayki dioskunata manami imaypis adorankipaqnatsu.
14 (13) *Asera diösapaq jawipäkushqayki raku qerukunatapis lapantami ushakätsishaq.Markaykikunatapis lapantami juchutsir ushashaq.
15 (14) Pasaypa rabyashpämi mana cäsukamaq runakunataqa may markacho taptinpis castigashaqpaq”.
Ichic wilacuycuna
^ 5.6 Nimrodmi Asiria nacionpa capitalnin Nínivita sharkatsirqan. Nimrodpita masta musyanaykipaq liyinki Gén. 10.8-12.
^ Asera Aseraqa cananeo runakuna adorashqan diösami karqan. Paykunaqa yarpapäkurqan tsay diösa imatapis miratsiq kashqantami. Aserata adorananpaqmi raku qerukunata jawipäkuq. Cananeo runakunaqa yarpapäkurqan tsay jawishqan qerukunacho Asera kashqantami (Éxo. 34.13; Deut. 7.5; 12.3; 16.21; 1Rey. 16.33; 18.19; 2Rey. 13.6).
