Oseas 1:1-11
1 Kaychömi qelqaraykan TAYTA DIOSPA wilakuyninta Beeripa tsurin Oseas wilakushqan. Judá nacioncho Uzías rey kaykänan witsanmi Oseas wilakurqan.* Tsaynölami wilakurqan Jotam rey kaykänan witsan,* Acaz rey kaykänan witsan* y Ezequías rey kaykänan witsanpis.* Israel nacionchönami Joáspa tsurin Jeroboam rey kaykarqan.*
Wayrapakuq warmiwan tänanpaq Oseasta Tayta Dios nishqan
2 Puntata parlaparmi Oseasta TAYTA DIOS kayno nirqan: “*Wayrapakuq warmiwan taptiki paycho tsuriki katsun. Israel runakuna noqata kachariykamashpan juk dioskunata adorarmi wayrapakuq warmino karkaykan”.
Oseaspa tsurinkuna yurishqan
3 Tsawraqa Diblaimpa tsurin Gomerta warminpaq Oseas ashirqan. Tsay warmichömi Oseaspa qechpa olqu tsurin yurirqan.
4 Tsawraqa Oseasta TAYTA DIOS kayno nirqan: “Jezreel markacho tsaytsika runakunata Jehú wanutsishqannömi* noqapis castigar Jehúpita miraqkunata wanutsishaq. Tsayno castigaptïmi Israel nacionpa mandaqnin reykuna mana kanqanatsu. Tsayno ruranäpaq kashqanta musyapäkunanpaq tsurikipa jutinta churapanki Jezreel jutin kananpaq.
5 Tsaynöpis Israel nacionpa soldädunkunata Jezreel pampachömi ushakätsishaqpaq”.
6 Tsaypitanami Oseaspa warmin Gomer wacharqan warmi wamrata. Tsawraqa Oseasta TAYTA DIOS kayno nirqan: “Tsay tsurikipa jutinta churapay Lo-ruhama* jutin kananpaq. Jutin tsaynöqa kanqa Israel runakunata manana kuyapänäpaq kaptinmi. Paykunataqa mananami perdonashaqnatsu.
7 “Judá nación runakunatami itsanqa kuyapar kikï salvashaq. Manami guërrawantsu, flëchawantsu, espädawantsu, cawalluwantsu ni cawalluta muntaraq soldädukunawantsu salvashaq, sinöqa munaynïwanmi”.*
8 Lo-ruhamata wasqirkurnami Gomerqa yapay chichu rikakurqan. Tsay wawan olqumi yurirqan.
9 Tsawraqa Oseasta TAYTA DIOS kayno nirqan: “Tsurikipa jutinta churapay Lo-ammi* jutin kananpaq. Tsay jutin kanqa Israel runakuna noqapa manana kashqanta tantiyakärinanpaqmi. Mananami noqapis paykunapa Diosninnatsu kashaq”.
Israel runakuna alina kawananpaq nishqan
10 (2.1) “Tsaypitami Israel runakunata yanapashaq tsaytsikaman mirananpaq.Lamar kuchuncho aquyshanöraqmi yupaytapis mana atipaypaq atska kanqapaq.*‘Paykunaqa manami noqapanatsu’ nishqä partichöpis runakuna kaynömi nipäkunqa:‘Paykunaqa imayyaqpis kawaq Tayta Diospa wamrankunami karkaykan’.*
11 (2.2) Tsaymi Judá nación runakuna y Israel nación runakuna juk nacionlana kanqapaq.Mandaqnin reytapis juklaylatanami churapäkunqa.Maytsay nacionkunacho kashqanpita kutipäkuptinmi kushikuypaq kanqa.Tsay junaqpa jutintapis churapanqa Jezreel* jutin kananpaqmi.
Ichic wilacuycuna
^ 1.1a 2Rey. 15.1-7; 2Crón. 26.1-23.
^ 1.1b 2Rey. 15.32-38; 2Crón. 27.1-8.
^ 1.1c 2Rey. 16.1-20; 2Crón. 28.1-27.
^ 1.1e 2Rey. 14.23-29.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 1.4 Jezreelcho Jehú wanutsirqan Israel nacionpa mandaqnin rey Joramta (2Rey. 9.24), Jorampa maman Jezabelta (2Rey. 9.33), Acabpa aylunkunata, Acab kuyanakushqan amïgunkunata y Acab churashqan cürakunatapis (2Rey. 10.11).
^ 1.6 Lo-ruhama ninanqa mana kuyashqa ninanmi.
^ 1.9 Lo-ammi ninanqa manami noqapatsu ninanmi.
^ 1.10a Gén. 22.17.
^ 1.10b Rom. 9.25-26.
^ 1.11 Jezreel ninanqa Diosmi murun ninanmi. Tsayno nin Israel runakunata muruman tinkutsirmi. Israel runakunata nacionninman kutitsir atskaman mirananpaq kamakätsirmi chakraman muruta muruqnömi Tayta Dios kanqa.
