Oseas 10:1-15
10 Israel runakunaqa rïcu kashpan tampiyparaq wayuq üvanömi karkaykan.Rïcuyarmi mana väliq dioskunapaq *altarkunata rurarkaykan.Mikuynin ali wayuptinmi kuyaylapaq kananpaq adorashqan wankakunatapis adornarkaykan.
2 TAYTA DIOSLATA sirvinanpaq promitirpis manami cumplirkaykantsu.Kananqa TAYTA DIOSTAMI cuentata qopäkunqapaq.Paymi altarninkunata y ichitsishqan wankakunatapis talamar ushakätsinqa.
3 Tsaymi Israel runakuna kayno nipäkunqapaq:“TAYTA DIOSTA mana *mantsakushqantsipitami mandamaqnintsi reypis manana kannatsu.Itsanqa rey karpis ¡imanöparaq yanapamashwan!
4 Mandamaqnintsi reykunaqa lulapämashpantsimi imatapis awnimantsi.*Pactuta rurarkurpis manami cumplipäkuntsu.China aselgas mirar chakracho atska kashqannömi nacionnintsicho mana ali ruraykunalana kaykan”.
5 ¡Samaria runakunaqa mantsakashqami karkaykan!¡Bet-avéncho* adorapäkushqan qoripita rurashqa turituta apakärinanpaq kashqantami tantiyarkaykan!Cürakunapis y runakunapis waqarkaykan kuyashqan ïdulu manana kananpaq kashqanta musyarmi.
6 Soldädukuna tsay ïduluta apakurmi Asiria nacionpa mandaqnin reyta qaraykärinqa*.Tsaynöpami Efraín runakuna* pasaypa penqapaypaq kanqa.Ïduluman yärakushqanpitami penqaytukushqa uysurpanqa.
7 Samariacho taq reytapis shakluta yaku apashqannömi prësu apakärinqa.
8 Avéncho kaykaq altarkunatapis lapantami juchutsipäkunqa.Tsay altarkunachömi Israel runakuna ïdulukunata adorar jutsata rurarkaykan.Juchutsir ushaptinmi tsay altarkuna kashqancho kashakuna y shirakakuna winanqa.Tsay witsanmi runakuna pasaypa nakar puntakunata kayno nipäkunqa:“¡Jukla ushakänäpaq janäman juchumuy!”Qaqakunatapis kaynömi nipäkunqa:“¡Jukla nitipäkamay!”*
Israel runakuna mana cäsukushqan
9 TAYTA DIOSMI kayno nin:“Israel runakuna, unay ayluykikuna Gabaa markacho* jutsata rurapäkushqanpita patsa kananyaq jutsa rurayta manami kacharinkitsu.Tsaymi fiyu runakuna Gabaacho unay ushakashqanno qamkunapis ushakankipaq.
10 Imaypis munashqä hörami castigashayki.Penqakuypaq jutsata rurashqaykipita castigaptïmi maytsay nacionpita runakuna shapäkamunqa atacashunaykipaq.
11 “Manshu töru trïguta kushishqa jarushqannömi Israel nacionpis kaykan.Kananqa kuyaylapaq matankanman yügutanami watashaq.Judá nacionpis armädata tsutaq törunömi kanqa.Jacobpita miraqkunaqa cospiadörata qarachaqnömi kanqa.
12 “Munashqäno ali kawapäkuy.Tsayno kawarqa chakrata ali muruwan muruqnömi karkaykanki.Tsaymi cosëchata shuntar kushikärishqaykino qamkunata kuyapashqäta tantiyar kushikärinki.Tsayno kaptinqa purun chakrata kichaqno shonquykita kichapämay.Höra chayamushqanami lapan shonquykiwan *ashimänaykipaq.Mana utikaypa manakamay shamur salvanäyaq.
13 “Itsanqa jutsata ruralarmi kawapäkushqanki.Jukniki juknikipis lulapänakurmi mana ali kawarkaykanki.Guërra carrëtaykikunaman y atska soldäduykikunamanmi yärakurkaykanki.
14 Tsaymi nacionnikicho guërralana kanqapaq.Amparakärinayki wayikunapis juchutsishqami kanqapaq.Bet-arbelcho guërra kaptin Salmán runakunata ushakätsishqannömi qamkunatapis warmikitapis y wamraykikunatapis ushakätsishunkipaq.
15 Bet-el runakuna, aläpa jutsata rurapäkushqaykipita qamkunatapis tsaynömi rurashunkipaq.Israel nacionta atacashpanmi mandaqnin reytapis patsa manaraq waraptin wanutsipäkunqapaq”.
Ichic wilacuycuna
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 10.5 Bet-avén ninanqa jutsa wayi ninanmi. Bet-avénpaq parlarqa Bet-el markapaqmi parlarqan. Bet-elpaq tsayno parlarqan Tayta Diosta tsaycho adorananpa trukan turitu niraq ïduluta tsaycho adoraptinmi. Tsaypita masta musyanaykipaq liyinki 1Rey. 12.28-32; Ose. 8.5. Tsaynölami 10.8 versïculucho Avénpaq parlar Bet-elpaq parlaykan.
^ 10.6a Wakin runakunaqa regalapäkunqapaq nipäkun.
^ 10.6b Efraín runakunapaq parlarqa Israel nación runakunapaqmi parlarqan.
^ 10.8 Luc. 23.30; Apoc. 6.16.
^ 10.9 Jue. 19.22-26.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
