Oseas 11:1-12
11 “Israel runakunata unaypita patsami kuyaykä.Tsurï kaptinmi Egiptupita qayamurqä.*
2 Pasaypa kuyaykaptïpis noqapita witikurkaykan.*Baal dioskunapaqpis sacrificiukunata ruparkaykätsin.Ïdulukunatapis inciensuwanmi qoshtarkaykätsin.
3 “Tsayno karkaykaptinpis wamrata makipita janchakurkur puriyta yachatsishqannömi Efraín runakunata puritsirqä.Tsayno yachaykätsiptïpis manami tantiyakärintsu yanapaykashqäta.
4 Paykunata pasaypa kuyashpämi shulwapaylapa* y taqlapaylapa nawpäman pushamurqä.Iti wamrata marqarkur qaqlanta qaqläman töpaykatsir kuyaqnömi kuyarqä.Tsayno kuyarmi mikuytapis kikï qararqä.
5 “Tsayno kuyaykaptïpis paykunaqa manami qelimantsu.Tsaymi Egiptuchötsu yapay ashmay kanqa, sinöqa Asiria runakunapa munayninchönami kanqa.
6 Markacho taqkunataqa espädawanmi wanutsipäkunqa.Markankuna murallashqa kaptinpis ushakätsinqami.Tsayno ushakätsinqa tsapakuyta yarpapäkuptinpis.
7 Kuyashqä runakunaqa conträ sharkur manami cäsukamannatsu.Munayniyuq Dios kashqäta niykarpis janan shonqulami sirvipäkaman.
8 “Efraín runakuna, ¡imanöpataq qamkunata qonqayküman!Israel runakuna, ¡imanöpataq qamkunata kachariyküman!*Adma markata y Zeboim markata ushakätsishqäno manami qamkunata ushakaykatsïmantsu.*Qamkunata kuyapaptïmi shonqüpis pasaypa lakinan.
9 Rabyanätsimaptikipis manami lapaykitaqa ushakätsishaykitsu.Castigarpis manami lapaykitaqa wanutsishaykitsu.Noqa manami runatsu kä, sinöqa qamkunawan kaykaq *santu Diosmi.Manami lapaykitatsu ushakätsishayki.
10 “Qamkunaqa tantiyakurmi qatirämankipaq.Leonno qaparaptïmi inti jeqanan kaq lädupita siksikyarraq kutipäkamunkipaq.
11 Pishqukuna wiwyayla pärishqannömi Egiptupita wiwyayla kutipäkamunkipaq.Palumakuna wiwyayla pärishqannömi Asiriapita wiwyayla kutipäkamunkipaq.Wayikicho yapay tänaykipaqmi yanapashaykipaq”.TAYTA DIOSMI tsayno nin.
Israel runakuna jutsata rurapäkushqan
12 (12.1) “Israel runakunaqa tukuynöpami lulapaykäman.Judá runakunapis mana cäsukamashpanmi ïdulu adorayman churakashqa.*
Ichic wilacuycuna
^ 11.1 Éxo. 4.22; Mat. 2.15.
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 11.4 Wakin runakunaqa waylupaylapa nipäkun.
^ 11.8 Efraínpaq y Israelpaq parlarqa Israel nación runakunapaqmi parlan.
^ 11.8 Deut. 29.23.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 11.12 Kay textuqa hebreucho manami clärutsu. Tsaymi wakin traduccionkuna kayno nipäkun: Judá runakunami itsanqa cäsukamar imaypis yärakaman.
