Oseas 13:1-16
13 Nawpataqa Efraín runakuna yätsiptin Israelcho wakin trïbukuna chaskikuqmi.Tsayno kaykarpis *Baal diosta adorarmi Efraín runakunaqa wanushqanöna karkaykan.
2 Jutsa ruraytaqa manami kacharipäkuntsu.Qellayta fundirkatsirmi munashqanno ïdulukunata rurarkaykätsin.Nirkurmi kayno nipäkun: “Ïduluntsipaq sacrificiuta rupatsipäkushun”.Tsayno nirmi turitu niraq ïduluta mutsapäkun.
3 Tsaymi tutapa pukutaypis y shulyapis elqakäkuqno elqanqa.Tsaki oqshata wayra apakushqanno y hornupita qoshtay yarqur elqakaqnömi elqanqa.*
4 TAYTA DIOSMI kayno nin:“Egiptucho unay ayluykikuna kashqanpita patsami TAYTA DIOSNIKI kaykä.Noqalami qamkunapa salvadorniki kaykä.Tsayno kaykaptïqa imamanpis ama ‘diosnï’ nir yärakäriytsu.*
5 “Unay ayluykikuna chunyaq jirkapa puriptin noqami ali rikarqä.
6 Qamkunaqa putsuy putsuy mikuyta kamariptïmi ali chölu tukärishqanki.Tsaymi qonqaykamar mana cäsukärimashqankitsu.*
7 Tsayno kapäkushqaykipitami leonno y nänicho tigri pakakuykur atacaqno atacashayki.
8 Wawankunata suwapaptin ösu atacashqannömi qamkunatapis ushakätsishayki.León atacar ushaqnömi pasaypa ushakätsishaykipaq.Fiyu uywanömi pedäzu pedäzu ushakätsishayki.
9 “Israel runakuna, yanapaykaptïpis conträ kaptikimi ushakätsishayki.
10 Unay ayluykikunami manakärirqan mandashuqniki reykuna kananpaq.*Kananqa ¡maychötaq tsay rey kaykan salvashunaykipaq!Autoridänikikunapis ¡maychötaq karkaykan yanapashunaykipaq!
11 Mandashuqniki reykunata churapänäpaq manakamaptinmi rabyashqa karpis reyta churaparqä.*Kananqa qamkunapitapis rabyashqa karmi mandashuqniki reyta elqätsishaq.*
12 “Qamkuna jutsata rurashqaykikunaqa lapanmi librucho apuntaraykan.
13 Wachay nanaywan warmi nakashqannömi qamkunapis nakapäkunkipaq.Wachay nanay tsariptinpis yurinanpaq mana kamakaq y caprichüdu wamranömi karkaykanki.Tsay wamra mamanpa pachancho jatikashqa kar wanushqannömi qamkunapis wanunkipaq.
14 “¿Wanuypita salvashaykitsuraq?¡Manami salvashaykitsu!¡Wanuy! ¡Ushakätsinaykipaq yarqamuy!¡Sepultüra! ¡Ultakurkunaykipaq shamuy!Tsay runakunata manami kuyapäshaqtsu.*
15 “Israel runakuna, pasaypa rïcuyashpayki kuyaylapaq waytano kaptikipis ushakätsishaykipaqmi.Akaq wayra chunyaq tsaki jirkapita shamur yakuta y pukyukunata tsakitsishqannömi qamkunata ushakätsishaykipaq.Contraykikuna shamurmi riquëzaykikunata y alhäjaykikunatapis qechurishushpayki apakärinqapaq.
16 (14.1) Samaria marka asulashqami kanqa.Conträ rikakushqaykipitami espädawan wanutsishunkipaq.Tsurikikunatapis pampamanmi saqtarinqapaq.Chichu warmikunapa pachantapis qasharqärinqami”.
Ichic wilacuycuna
^ Baal Baalqa cananeo runakuna adorashqan diosmi karqan. Juk dios kashqanta yarpaptinpis manami rasunpatsu dios karqan. Cananeo runakuna yarpapäkurqan tsay diosta adoraptin uywankuna mirananpaq kashqanta y chakrankuna ali wayunanpaq kashqantami. Tsaynöpis yarpapäkurqan löcu tamyata y ali tamyatapis kachamushqantami.
^ 13.3 Sal. 1.4; Jer. 13.24; Sof. 2.2.
^ 13.4 Éxo. 20.2; Isa. 43.11; 45.21.
^ 13.5-6 Deut. 8.11-17.
^ 13.10 1Sam. 8.5-6.
^ 13.11a 1Sam. 10.17-24.
^ 13.11b 1Sam. 15.26.
^ 13.14 1Cor. 15.55.
